YEHISKIEL 27 - BALA LUK DO'

Tido Kuan Sur

¹ Kebala Tuhan negku,

² “O lemulun, do' menani aceh tido kuan Sur,

³ ieh ineh bawang luk tangeb abpa' rayeh idi luk pepua' dengan amung lemulun luk tudo tangeb abpa' rayeh. Kudeng ini bala Tuhan Allah: ‘O Sur, iko medita' niat ratnan iko metaga.

⁴ Ruma'mu ineh luun abpa' rayeh. Lun luk mudut namu nganau' namu kudeng kapal luk do' ayu.

⁵ Amung bangarmu inau'deh ratnan kayuh tongor, idi kayuh tumuh rat Lebanon mangun ku dirimu.

⁶ Ideh nengalap kayuh luk meraben rat Basan ku buému. Ideh nenganau' apinmu ratnan kayuh tongor rat Siprus. idi nengayung ineh ku gading.

⁷ Kibung luk ku nganau' kapal nalan inau' ratnan kibung pu luk tibaruh rat Masir, pad megala' rat mado. Apomu inau' ratnan kibung luk meluun do', idi luk sia' merirem rat pulau Elisa.

⁸ Lunmu luk mué ineh rat Sidon idi Arwad; idi lunmu luk mileh nengimet kapal.

⁹ Lun ngakem kayuh luk luun kapal, ieh ineh lun mileh rat Gebal. Lun ngimet kapal rat anid kapal luun abpa' rayeh, iné' pepua' bang amung-amung kadaimu.’

¹⁰ “Lun pebunu' rat Parsi, Lidia idi Libia, inan bang bawehmu. Ideh nengekito utap idi tupideh bang ruma' bawehmu. Idi teh ideh luk nengacing ubur kuanmu.

¹¹ Lun pebunu' rat Arwad nematar libungmu, idi lun rat Gamad nematar pudutmu luk medita'. Ideh nengekito utapdeh luun aladmu. Idi teh ideh luk nenganau' namu metaga.

¹² “Iko pepua' déi' Tarsis, idi nengalap pirak, belawan, semara' luk mebuda', idi semara' luk mitem ku libal binawehmu luk mula' ineh.

¹³ Iko pepua' déi' Grika, Tubal, idi Misek idi nengalap demulun idi tekaling ku libal binawehmu.

¹⁴ Iko nengalap kuda ku ngeruid keréta, kuda luk nguit lemulun, idi aya' luk seupa kuda idi seupa keladai rat Bait Togarma ku libal binawehmu.

¹⁵ Lun Dedan pepua' namu, idi lun rat bang bawang luk tangeb abpa' rayeh nemaré gading idi kayuh luk mitem ku libal binawehmu.

¹⁶ Lun Aram nemelih binaweh luk pisuenmu. Ideh nemaré batu luk bata' uduh, kibung luk sia' merirem, kibung luk tibaruh, kibung pu, batu luk meraga rat bang abpa' rayeh, idi batu luk mesia' ku libal binawehmu.

¹⁷ Lun Yahuda idi lun Israil nemaré padé, duru', umau saitun, idi umau luk do' buen ku libal binawehmu.

^18-19 Damsik nemelih binaweh luk pisuenmu idi nemaré abpa' anggur rat Helbon idi buluh dumba rat Sahar ku libalneh. Ideh nemaré belawan luk tinuno idi umau luk do' buen ku libal sebuang binawehmu.

²⁰ Lun Dedan nemaré kibung luk ku tapin keted kuda ku libal binawehmu.

²¹ Lun Arab idi lun rayeh bawang Kedar nemaré anak dumba, dumba, idi amék ku libal binawehmu.

²² Lun luk pepua' rat Siba idi Rama nemaré umau luk do' buen, batu luk meraga, idi amas ku libal binawehmu.

²³ Bawang Haran, Kani, Eden, lun luk pepua' rat Siba, bawang Asur, idi Kilmad pepua' namu.

²⁴ Ideh nemasui ayung luk do', kibung luk sia' merirem, idi kibung luk tibaruh, ugam luk do' taga, idi abet idi kalat luk do'.

²⁵ Binawehmu ineh inuit maya' kapal luk meluun rayeh. “Iko mepad kudeng kapal déi' luun abpa' rayeh, luk mepanu' ku binaweh luk meberat.

²⁶ Kareb lunmu luk mué nguit namu maya' abpa' rayeh, iko mekarem mado rat ku tangeb, ngaceku bui rat pa busat aco.

²⁷ Amung binaweh idi lun luk ngimet kapal, lun ngakem kayuh idi lun luk pepua', amung lun pebunu' luk bang kapal— neturem bang abpa' rayeh kareb kapalmu nekarem.

²⁸ Arod lun luk ngimet kapal luk nened pedingeren déi' tangeb abpa'.

²⁹ “Nekini amung kapal pangeh tican. Idi amung lun luk ngimet kapal pangeh numak luun tangeb.

³⁰ Ideh temido namu dengan abuh luun uluhdeh idi luun bururdeh teh.

³¹ Ideh ngiki uluhdeh idi nacung, idi ideh nangi' ku dat niatdeh namu.

³² Ideh menani aceh tido kuanmu, ‘Idéké miak uen maad dengan Sur, luk ungeng bang abpa' rayeh?

³³ Kareb binawehmu inuit maya' abpa' rayeh, iko nemaré petap kuan anid pupu. Raca' nangun ku lun do' ku binawehmu luk mula'.

³⁴ Nekini iko nekarem bang abpa' rayeh. Iko neturem bang ribaruh. Binawehmu idi amung lun tebarinmu, netutu' maya' namu bang abpa' rayeh.’

³⁵ “Amung lun luk tudo tangeb abpa' rayeh megagap ku ukummu. Raca'deh pana' matot pad kiungdeh mebudi.

³⁶ Iko metutu' ruked-ruked, idi amung lun luk pepua' pelaba tot, ngaceku kian ideh mekaneh ukummu lek.”