YEHISKIEL 26 - BALA LUK DO'

Bada' Luk Biré Tuhan Ratnan Sur

¹ Aceh aco bulan ... bang lak luk kepulu' aceh, kebala Tuhan negku,

² O lemulun, lun Sur ngitang ku awang niatdeh, kebaladeh, ‘Bunu' tau Yerusalim pangeh inusag! Amung tanga'neh pangeh mukab kuan tau. Usagneh miak ngacing utung kuan tau!’

³ “Ngaceku ineh kudeng ini bala Tuhan: O bawang Sur, Ui ini bunu'mu. Ui nguit mula' pupu ngerieng namu. Ideh macing mepad kudeng ribut abpa' rayeh.

⁴ Ideh miak ngusag libung bawangmu idi pudutmu luk medita' pana'. Ui miak ngapuh amung abuh pad batu mo' luk ketecan.

⁵ Ieh mangun ku su luk inan midang rabat uned abpa' rayeh. Ui ini Tuhan Allah pangeh nepebala. Pupu baken miak ngaro binaweh Sur.

⁶ Idi amung lun luk bang bawang isuut aput bawang Sur miak pitayendeh, pad Sur kali' Ui ini Tuhan.”

⁷ Kebala Tuhan Allah, “Ui nguit raca' luk meluun rayeh, ieh ineh Nebukadnesar, raca' Babil, pad ieh ngerieng Sur. Ieh macing rat pa tinueh busat aco dengan aceh baweh luk pelaba rayeh dengan kuda, keréta, idi lun luk maya' kuda.

⁸ Lemulun luk bang bawang isuut ineh miak pitayen. Bunu' ineh miak ngukat abang idi nganau' ibpeng; idi utapdeh mangunku alad luk meraben pa kiungmu.

⁹ Ideh miak ngusag libungmu ku repapehdeh luk ku ngusag bawang, idi teh ideh ngusag pudutmu luk medita' ku belawan.

¹⁰ Kipuh luk mepalid ku kudadeh miak ngebpu namu. Uni kudadeh luk ngeruid keréta repapeh idi keréta pebunu' miak ngegio libungmu kareb ideh lemaba maya' tanga' bawang luk inusag ineh.

¹¹ Lun luk upun maya' kuda luun dalanmu miak ngaté amung pupumu ku pelapetdeh. Amung dirimu luk meraben miak metabpa.

¹² Bunu'mu miak ngaro binawehmu idi luk pisuenmu pana'. Ideh miak ngusag amung aladmu idi ruma'mu luk do'. Ideh miak ngalap amung batu, kayuh, idi arap, talan bang abpa'.

¹³ Ui miak ngagka' amung nanimu, idi uni giula'mu.

¹⁴ Sebuleng batu mo' miak tacinKu, su luk inan lemulun midang rabatdeh. Bawang ineh na miak piduten baruh. Ui ini Tuhan pangeh nepebala.”

¹⁵ Kudeng ini bala Tuhan Allah kuan bawang Sur: “Kareb iko uen ngelaya', lemulun luk tudo tangeb abpa' rayeh miak matot ku arod lemulun luk pitayen.

¹⁶ Raca' amung pupu luk mileh maya' kapal déi' abpa' rayeh miak temurun rat luun kerusideh. Ideh miak ngelengu kuyu' raca'deh luk tibaruh, idi tudo luun tana' dengan megegker. Ideh pelaba tot ku ukummu, pad ideh na miak ugka' megegker.

¹⁷ Ideh miak menani tido ini kuanmu: Bawang luk mebala ineh inusag! Kapalneh pangeh tila' rat luun abpa' rayeh. Pupu bawang ini nengimet abpa' rayeh, idi ngatot lemulun luk tudo tangeb abpa' rayeh.

¹⁸ Nekini ieh pangeh netabpa. Amung pulau megegker. Idi pupudeh megagap ku usag ineh.’ ”

¹⁹ Kebala Tuhan Allah, “Ui miak nganau' namu dat ali mepad kudeng bawang luk inusag idi luk tican. Ui mapen namu ku ribaruh abpa'.

²⁰ Ui maré namu semuet bang su luk inan até, pad iko perurum nelun luk mulun bang kareb luk mon. Ui ngecuk namu tudo meparud pa liang tana' arang usag luk meruked dengan lun naté. Iko na miak lemubed rat ieneh, pad tudo bang tana' lun luk mulun.

²¹ Ui nganau' namu mangun ku pinginud luk inan matot. Ieh ineh kekipedmu. Lemulun miak nakap namu, iamo' iko na miak kali'deh.” Tuhan Allah pangeh nepebala.