YEHISKIEL 25 - BALA LUK DO'

Bada' Luk Biré Tuhan Ratnan Amon

¹ Kebala Tuhan negku,

² “O lemulun, do' mada' sala' bawang Amon.

³ Ngecuk nedeh ninger bala Tuhan Allah, ieh ineh, ‘Muyuh mawang niat kareb muyuh nenier Ruma'Ku linutak, idi bawang Israil inusag idi pupu Yahuda tiban.

⁴ Ngaceku muyuh mawang niat ku ineh, Ui miak nima' pupu-pupu rat su luk ali-ali luk pa busat aco ngelaya' nemuyuh. Ideh miak lupo bang bawang muyuh idi tebawang su ineh. Ideh miak kuman bua' idi ngirup rata sapi' muyuh.

⁵ Ui miak ngisu' bawang Raba mangun ku libung unta, idi Amon mangun ku libung dumba, pad muyuh kali' Ui ini Tuhan.’

⁶ “Kudeng ini bala Tuhan Allah, ‘Muyuh nemepag palad idi nuput ku awang niat muyuh. Muyuh nesitunga nan bawang Israil.

⁷ Ngaceku ineh, Ui miak maré nemuyuh bang palad lun pupu baken, pad ideh ngaro binaweh muyuh. Ui miak ngusag nemuyuh pad muyuh na mangun ku aceh pupu teh, idi na luk idi bawang muyuh sebuleng teh. Kareb ineh muyuh miak kali' Ui ini Tuhan.’ ”

Bada' Luk Biré Tuhan Ratnan Moab

⁸ Kebala Tuhan Allah, “Ngaceku kebala Moab, ‘Yahuda ineh mepad kudeng amung pupu baken,’

⁹ Ui miak nima' bawang luk matar lakan bawang Moab uen ngerieng, meluun teh bawang luk meluun do', ieh ineh Bait Yerimot, Baal Mion, idi Keriataim.

¹⁰ Ui miak nima' pupu-pupu rat su luk ali-ali luk pa busat aco ngelaya' bawang Moab dengan bawang Amon, pad Moab pana' na mangun ku aceh pupu teh.

¹¹ Ui miak ngukum Moab, pad ideh kali' Ui ini Tuhan.”

Bada' Luk Biré Tuhan Ratnan Edom

¹² Kebala Tuhan Allah, “Dengan megateh niat lun Edom nengua' dat Yahuda, idi ngaceku ineh Edom mesala'.

¹³ Kudeng ini bala Tuhan Allah: Ui miak ngukum Edom idi ngaté amung lemulun idi pung pana' bang bawang ineh. Ui nganau' bawang Edom mangun ku su luk ali-ali rat bawang Teman macing bawang Dedan. Amung pupu ineh pitayen bang bunu'.

¹⁴ PupuKu lun Israil miak ngacing ua'Ku kuan Edom, pad Edom kali' usehKu luk rayeh. Edom miak kali' dereh ua'Ku neneh.” Tuhan Allah pangeh nepebala.

Bada' Luk Biré Tuhan Ratnan Lun Pilistin

¹⁵ Kebala Tuhan Allah, “Dengan megateh niat lun Pilistin pangeh nengua' dat bunu'deh luk mon pad ideh pitayendeh.

¹⁶ Kudeng ini bala Tuhan: Ui miak ngerieng nelun Pilistin pad ideh mabud. Ui miak ngaté amung lemulun luk neketecan luun Raked Pilistin.

¹⁷ Ui ngukum idi ngua' nedeh dengan metueh, pad ideh kali' usehKu, idi teh ideh kali' Ui ini Tuhan.”