YEHISKIEL 24 - BALA LUK DO'

Lacang Luk Metugor

¹ Pulu' aco, bulan pulu' bang lak luk keiwa' Tuhan nepebala negku.

² KebalaNeh, “O lemulun, do' ngayud aco bulan aco sini, ngaceku aco sini raca' Babil ngimun ngerieng Yerusalim.

³ Mada' luk pinginud ini kuan pupuKu luk sikal metueh. Kudeng ini bala Tuhan: ‘Nganau' lacang luun apui, idi manu' neneh ku abpa'.

⁴ Nganau' uang pung luk meluun do' — lipneh, kukudneh, idi uang luk muneng ku tulangneh.

⁵ Ngalap uang ratnan dumba luk meluun do', idi nganau' mula' kayuh iang lacang ineh. Nima' abpa' ineh menok, idi nanek tulang denga uang ineh.’ ”

⁶ Kudeng ini bala Tuhan Allah, “Bawang lun luk ngaté pangeh inukum! Ieh mepad kudeng lacang luk metugor luk na tu isa. Uang pung ineh ilap tesebuleng-tesebuleng pad na luk ketecan.

⁷ Ngaceku ina até bang bawang rayeh. Iamo' dara' na inutang luun tana' su luk inan abuh miak ngapung neneh. Iamo' ieh inutang luun batu.

⁸ Ui nenecan dara' ineh su ineh, su luk inanneh na miak pungen, idi su luk inanneh miak mutuh ua'.”

⁹ Kudeng ini bala Tuhan, “Bawang lun luk ngaté pangeh inukum! Ui sebuleng miak ngamung kayuh apui.

¹⁰ Do' nguit kayuh apui teh! Ngiup apui! Nanek uang pung. Nanek pad abpa'neh mekeket. Do' ngeseb tulangneh!

¹¹ Do' nganau' lacang tekaling ineh luk na uang luun bareh apui pad ieh mesia'. Idi tugorneh miak buro pad lacang ineh meligan baruh. (

¹² Iamo' baken amung tugorneh buro ku apui.)

¹³ O Yerusalim, kekamenmu luk dat pangeh nengelutak namu. Sagan tu pana' Ui nenutun ngeligan namu, iko melutak teh. Iko na mangun meligan teh kareb nateh iko kali' usehKu luk mebura'.

¹⁴ Ui ini Tuhan pangeh nepebala. Tarekmu pangeh nacing, pad Ui na miak méi' namu idi mekelupan datmu. Iko miak kumin ngaceku amung kekamenmu.” Tuhan Allah pangeh nepebala.

Até Awan Nabi

¹⁵ Kebala Tuhan negku,

¹⁶ “O lemulun, denak-denak Ui sikal ngalap lemulun luk inanmu meluun awa. Aleg iko medureng, temindo, idi nangi'.

¹⁷ Aleg tangi'mu pedingeren lun baken. Aleg iko nacung, iamo' ngayung ku sigar idi kasutmu. Aleg ngebpu kiungmu, idi aleg kuman akan lun luk nacung.”

¹⁸ Bang pekak ineh ui nepegayam nelun mula'. Idi malem ineh awanku naté. Kenebpa ui nenganau' luk pangeh bila Tuhan negku.

¹⁹ Kebala lun mula', “Ngudehké iko nganau' luk kudeng ineh?”

²⁰ Kebalaku nedeh, “Tuhan nengecuk negku

²¹ ngacing balaNeh ini nemuyuh lun Israil. Muyuh medita' niat ratnan raben Ruma' Allah ineh. Muyuh pian ngikak idi nier neneh. Iamo' Tuhan miak ngusag neneh idi anak muyuh luk isuut luk ketecan déi' Yerusalim miak pitayen bang bunu'.

²² Kareb ineh muyuh miak nganau' luk inau'ku ini. Muyuh na ngebpu kiung muyuh, idi na muyuh kuman akan lun luk nacung.

²³ Muyuh miak ngayung ku sigar idi kasut muyuh. Idi na muyuh temido idi nangi'. Muyuh miak melaya' ngaceku sala' muyuh, pad muyuh ngarod seburur nan seburur.

²⁴ Idi ui mangun ku tanu' kuan muyuh. Muyuh miak nganau' amung-amung luk inau'ku. Kebala Tuhan, “Kareb ini mangun idi muyuh miak kali' Ui ini Tuhan.’ ”

²⁵ Kebala Tuhan, “O lemulun, nekini Ui miak ngusag Ruma' Allah luk meraben luk inandeh medita' niat idi mawang niat, ngaceku ideh pian ngikak idi nier neneh. Idi Ui miak ngaté anakdeh luk deléi idi decur pana'.

²⁶ Bang aco sineh, kareb Ui nganau' ineh, lemulun luk mepuit ratnan usag ineh miak amé' mada' namu.

²⁷ Kareb aco sineh teh iko miak pebala teh idi pegayam neneh. Kudeng ineh teh iko mangun ku tanu' kuan lun mula', pad ideh kali' Ui ini Tuhan.”