YEHISKIEL 23 - BALA LUK DO'

Dueh Denganak Decur Luk Mesala'

¹ Tuhan nepebala negku,

² “O lemulun, inan dueh denganak decur.

³ Kareb didueh anak adi' déi' bawang Masir, didueh pasét idi mangun ku decur luk mesawa'.

⁴ Ngadan kinanakneh aceh luk rayeh, ieh ineh Oholah (luk pinginud Samaria), idi ngadan kinanakneh aceh luk isuut, ieh ineh Oholibah (luk pinginud Yerusalim). Ui nengaweh nedidueh idi didueh inan anak.

⁵ Sagan tu pana' ieh awanKu, Oholah megéi' pasét idi melili ku deléi luk inanneh mawa rat bawang Asur, ieh ineh lun pebunu'

⁶ luk ngayung ku ayung luk mesia' merirem, lun do' idi lun rayeh pebunu' pana', amungdeh anak adi' luk do' taga idi lun rayeh lun luk maya' kuda.

⁷ Ieh mangun ku decur luk mesawa' kuan amung lun rayeh baweh Asur, idi lilineh ineh nenguit neneh ngelutak bururneh ngaceku sembayang inan akang lun Asur.

⁸ Ieh nengimun pasét déi' bawang Masir idi na ugka' teh. Rat kareb ieh anak adi', deléi pamung rudap neneh mepad kudeng dengan decur luk mesawa',

⁹ pad Ui nemaré neneh kuan lun Asur luk inanneh mawa idi luk pianneh.

¹⁰ Ideh nengelebpa neneh, idi nenaban anakneh luk deléi idi decur teh, idi ideh nengaté neneh, pad decur iapeh-iapeh pana' ngatum bala ratnan kekipedneh.

¹¹ “Sagan tu pana' Oholibah nekali' amung ineh, ieh meluun dat idi ucet pasét meluun ratnan kinanakneh Oholah.

¹² Ieh panu' ku lili inan lun rayeh lun Asur idi lun rayeh pebunu', ieh ineh lun pebunu' luk ngayung ku ayung luk do' taga — idi nan lun rayeh baweh luk maya' kuda, amungdeh anak adi' luk do' taga.

¹³ Ui nekali' neneh decur luk mesawa', idi didueh mepad dat.

^14-15 “Idi ieh iuk-iuk ucet pasét. Idi teh ieh melili ku ayu lun rayeh-rayeh Babil luk inarit luun alad luk sinat ku sat mesia', dengan abet awa'deh idi sigardeh pana'.

¹⁶ Kareb ieh nenier nedeh, idi ieh mepanu' ku lili, pad ieh nengecuk nelun dukenneh amé' nedeh déi' Babil.

¹⁷ Idi lun Babil ineh iné' pasét neneh. Ideh nengelutak neneh, pad ieh museh nedeh.

¹⁸ Ieh pasét dengan megala', pad amung lemulun kali' neneh decur luk mesawa'. Ui megileg ku kekamenneh mepad kudeng Ui megileg ku kekamen kinanakneh.

¹⁹ Ieh meluun ucet pasét, mepad kudeng luk inau'neh kareb ieh anak adi' decur luk mesawa' déi' Masir.

²⁰ Ieh pelaba pian ku deléi luk ucet ku decur mepad kudeng keladai idi kuda ucet ku tineh.” (

²¹ O Oholibah, iko pian nginud kekamenmu luk dat kareb iko anak adi' déi' Masir, kareb deléi marot ku iti'mu pad iko pasét.)

Allah Ngukum Dueh Denganak Decur Ineh

²² “O Oholibah, kudeng ini bala Tuhan Allah: Iko musam ku deléi ineh luk mawa namu, iamo' Ui nganau' nedeh megateh namu pad ideh ngelibut namu.

²³ Ui nguit amung lun Babil idi lun Kasdim, lun rat Pekod, Sua, Kua, idi amung lun Asur. Ideh ineh lun do' idi lun rayeh rat arang anak adi' luk do' taga. Amungdeh lun rayeh luk ngimet idi lun rayeh baweh luk maya' kuda.

²⁴ Ideh miak ngerieng namu rat pa tinueh busat aco, dengan aceh baweh rayeh luk nguit keréta bunu' idi keréta luk nguit repapeh pana'. Ideh miak ngelibut namu dengan ayung utap idi tupi lun pebunu'. Ui maré namu bang paladdeh, pad ideh ngukum namu maya' ukumdeh.

²⁵ Ngaceku Ui megateh namu, Ui miak nima' nedeh mulu' icungmu idi lalidmu idi ngaté anakmu pana'. Ideh ngalap anakmu luk deléi idi decur idi ngeseb nedeh mulun.

²⁶ Ideh narak ayungmu idi ngaro banému rat luun bururmu.

²⁷ Ui ngagka' lilimu idi kekamenmu luk melutak luk inau'mu rat kareb iko déi' Masir, pad iko na nier akang idi ngerawé Masir.

²⁸ Kudeng ini bala Tuhan Allah, “Ui maré namu bang palad lemulun luk inanmu museh idi megileg.

²⁹ Idi ngaceku ideh megateh namu ideh miak ngalap amung-amung luk ilapmu, pad iko lubpa. Iko miak uen ngegala' dengan ayu decur luk mesawa'. Ini miak mangun ngaceku lilimu idi sétmu.

³⁰ Iko pangeh mangun ku decur luk mesawa' kuan amung-amung pupu, idi nengelutak bururmu ku akangdeh.

³¹ Iko nemaya' lawé kinanakmu, ngaceku ineh Ui ngukum namu mepad kudeng Ui nengukum kinanakmu ineh.”

³² Kebala Tuhan Allah, “Iko miak ngirup ratnan sangkir kinanakmu; ieh rayeh idi medalem. Amung lemulun miak situnga namu; sangkir ineh mepanu'.

³³ Iko miak mesusa' niat idi mabuk, ku sangkir tot idi usag, ieh ineh sangkir kinanakmu Samaria.

³⁴ Iko miak ngirup amung luk bang sangkir ineh, idi ngurat ruukmu ku bila'neh. Ui ini Tuhan pangeh nepebala.”

³⁵ Kudeng ini bala Tuhan Allah, “Ngaceku iko nekelupan Negku idi neteketed rat Negku, iko miak medereh ngaceku lili idi sétmu.”

Ukum Allah Kuan Dueh Denganak Decur

³⁶ Kebala Tuhan negku, “O lemulun, temina'ké iko ngukum ni Oholah idi Oholibah? Do' ngadu' nedidueh ngaceku kekamen didueh luk dat.

³⁷ Didueh sala' pasét idi ngaté lemulun — didueh nepasét nan akang idi nengaté anak-anak luk tinganak didueh kuanKu. Didueh nemaré anak didueh ku baré kuan akang ineh.

³⁸ Meluun teh, didueh nengelutak Ruma'Ku idi na nemaya' ukum ratnan Aco luk inan Mudeng, luk pangeh litepKu.

³⁹ Pangeh didueh nengaté anak-anakKu mangun ku baré kuan akang ineh, bang aco sineh didueh iné' Ruma'Ku idi nengelutak neneh. Ineh luk inau' didueh bang Ruma'Ku!

⁴⁰ “Didueh nengecuk nelun duken amé' nawar deléi rat bawang luk mado, idi deléi ineh nacing. Didueh decur ineh nediu' idi nenat mateh idi nenganau' bané.

⁴¹ Didueh netudo luun pagau luk do' dengan aceh méja pa kiung didueh. Idi didueh nengerareng luun méja ineh umau luk do' buen idi umau saitun luk biréKu nedidueh.

⁴² Arod lemulun luk marot pedingeren, ieh ineh deléi luk inuit rat déi' su luk ali-ali. Ideh nenganau' leku' luun langen dueh decur ineh idi pata luun uluh didueh.

⁴³ Idi keterawéKu, ideh pasét nan decur luk mengered bang sét.

⁴⁴ Ideh pesua' amé' nedidueh mepad kudeng deléi amé' nan decur luk mesawa'. Kudeng ineh teh lawédeh ni Oholah idi Oholibah, decur luk pasét ineh.

⁴⁵ Lemulun luk matu miak ngukum nedidueh ngaceku pasét idi ngaté lemulun, ngaceku didueh megéi' pasét idi teh inan dara' luun ticu' didueh.”

⁴⁶ Kudeng ini bala Tuhan Allah, “Nguit aceh baweh idi ngatot nedidueh idi ngaro binaweh didueh.

⁴⁷ Nima' baweh ineh mitung nedidueh ku batu idi ngeret nedidueh ku pelapet, idi ngaté anak didueh idi ngeseb ruma' didueh.

⁴⁸ Ui miak ngagka' sét aput bawang ineh, pad mebpeng decur na pasét mepad kudeng didueh.

⁴⁹ Idi menganak miak kuminKu ngaceku sala' pasét idi sembayang nan akang. Idi medueh kali' Ui ini Tuhan Allah.”