YEHISKIEL 21 - BALA LUK DO'

Pelapet Tuhan

¹ Kebala Tuhan negku,

² “O lemulun, do' ngadu' bawang Yerusalim, idi ngadu' su luk inan pupu ineh sembayang. Mada' bawang Israil,

³ ‘Kudeng ini bala Tuhan, Ui pian munu' nemuyuh, idi ngaté nemuyuh ku pelapetKu, do' lemulun luk do' idi lemulun luk dat pana',

⁴ ngaceku Ui miak ngaté lemulun rat pa tinueh busat aco macing pa kabing busat aco ku pelapetKu.

⁵ Amung lemulun miak kali' Ui pangeh nenginat pelapetKu idi na pian nganug neneh bang binanneh baruh teh.’

⁶ “O lemulun, do' iko ngarod rayeh-rayeh siren amung lemulun mepad kudeng lemulun luk na merapet.

⁷ Kareb ideh ngitun namu anun punmu ngarod, do' mada' nedeh ratnan luk miak mangun. Mada' nedeh ratnan tot luk miak manu' niatdeh. Ticu'deh miak melaya', pad ideh na mekuu' teh. Alebdeh pana' megegker. Tarekneh pangeh macing.” Tuhan Allah pangeh nepebala.

⁸ Kebala Tuhan negku,

⁹ “O lemulun, mada' bala luk biré Tuhan. Mada' pupu ini luk belén Tuhan: Pelapet, ieh ineh pelapet luk metadem idi mesilo;

¹⁰ inau' metadem pad miak ngaté, idi merasat mepad kudeng kilep. Ieh na miak uen ngagka', ngaceku muyuh na neninger bada'.

¹¹ Pelapet ineh uen mesilo, pad ieh temina' uen makai. Ieh metadem idi mesilo, temina' kuan lemulun luk ngaté.

¹² Ngarod idi nangi', O lemulun; pelapet ini tinina' kuan pupuKu, idi kuan amung lun rayeh Israil. Ideh miak pitayen denga pupuKu luk baken. Do' mepag ruukmu ku susa' niatmu!

¹³ Ui nutun pupuKu, idi kudeng ideh ara' uren, kali' rungen amung ini mangun kuandeh.

¹⁴ “O lemulun, do' iko mada' bala luk biré Tuhan. Mepag paladmu, idi pelapet miak ngaté dueh, teluh kua'. Pelapet ineh ngatot idi ngaté,

¹⁵ pad pupuKu na mekuu' idi metebaceng. Ui ngatot bawangdeh ku pelapet luk merasat, mepad kudeng kilep idi luk temina' ngaté.

¹⁶ O pelapet luk metadem, natek pa kabing idi pa tinueh! Natek pad iapeh ulekmu.

¹⁷ Ui miak mepag paladKu, pad usehKu ugka'. Ui ini Tuhan pangeh nepebala.”

Pelapet Raca' Babil

¹⁸ Kebala Tuhan negku,

¹⁹ “O lemulun, do' nabpu' dueh dalan luk bén raca' Babil dengan pelapetneh. Dueh dalan ineh remuat rat bang sebuleng bawang mo'. Do' nganau' tanu' su lisangen dalan.

²⁰ Aceh tanu' mada' dalan luk bén raca' amé' Raba luk bang bawang Amon, idi luk baken mada' dalan amé' Yahuda, petacu semuet bang Yerusalim.

²¹ Raca' Babil tuped iring tanu' déi' lisangen dalan, idi ieh ngimet tuda'-tuda' ileb idi nengebpeh nedeh luun tana' pad ieh kali' sapeh dalan luk bénneh. Idi teh ieh nala' udi, idi nier até pung luk kirat.

²² Bang paladneh luk pa tinueh ieh ngimet ileb luk nicul Yerusalim. Ileb ineh ngecuk neneh amé' mudut repapeh luk ku ngusag bawang idi ngitang ngecuk lemulun amé' pebunu'; repapeh luk ku ngusag bawang ineh uen ngerareng iring tanga' bawang, idi ibpeng dengan abang pana' miak ruendeh.

²³ Lun Yerusalim na manu ku ineh ngaceku jani' luk pangeh pinututdeh. Iamo' bada' luk biré atun ineh mada' nedeh ratnan sala'deh idi mangun ku tanu' ratnan ideh tebanen.

²⁴ Kudeng ini bala Tuhan Allah. Sala' muyuh pangeh ginala'. Amung lemulun kali' muyuh mesala'. Sala' muyuh megala' bang kekamen muyuh. Muyuh kali' rungen mesala', idi Ui maré nemuyuh bang palad bunu' muyuh.

²⁵ “O raca' Israil luk dat idi luk na meligan. Tarekmu pangeh nacing, ieh ineh aco luk inanmu kumin.

²⁶ Ui ini Tuhan Allah pangeh nepebala. Do' ngedita' luk mebeneh, idi ngebeneh luk medita'!

²⁷ Yerusalim uen ngusag. Matu, Ui ngusag bawang ineh. Iamo' ini na miak mangun pad macing Ui pangeh nemili' lemulun luk ngukum bawang ineh.

Aceh pelapet Idi Lun Amon

²⁸ “O lemulun, do' iko mada' bala luk biré Tuhan. Kudeng ini bala Tuhan Allah ratnan lun Amon luk ngedat nelun Israil. Do' mada' nedeh, kebalamu, ‘Pelapet ineh temina' ngusag; ieh mesilo pad miak ngaté, idi merasat kudeng kilep.’

²⁹ Mada' nelun Amon ratnan luk sirendeh luk na matu, idi ratnan bada'deh luk mebalih. Lun Amon ineh pelaba dat. Tarekdeh pangeh nacing, ieh ineh aco luk inandeh miak kumin. Pelapet ineh miak macing nan dierdeh.

³⁰ “Nganug pelapetmu bang binanneh. Ui ngukum namu bang su luk inanmu pangeh pinudut, ieh ineh bang bawang su luk inanmu tinganak.

³¹ Iko miak kali' usehKu kareb usehKu namu mepad kudeng apui luk mebudung. Ui maré namu bang palad lemulun luk mesangit luk mileh ngusag,

³² pad iko uen ngusag ku apui. Dara'mu uen ngutang bang bawangmu sebuleng, pad na lemulun ngerawé namu teh!” Tuhan pangeh nepebala.