YEHISKIEL 20 - BALA LUK DO'

Pian Allah Idi Tueh Lemulun

¹ Pulu' aceh bulan limeh bang lak luk ketudu', sebuang lun rayeh lun Israil iné' negku pad ngitun pian Allah. Ideh netudo pa kiungku,

² idi kebala Tuhan negku,

³ “O lemulun, mada' luk belén Tuhan Allah nan lemulun ini, ‘Muyuh macing Negku pad ngitun pianKuké?’ Ui ini Tuhan luk mulun. Idi muyuh na miak ngitun Negku anun-anun. Ui ini Tuhan Allah pangeh nepebala.

⁴ “O lemulun, temina'ké iko ngukum nedeh? Do' iko ngukum nedeh. Nganau' nedeh ngerawé ratnan kekamen tepundeh luk dat ineh.

⁵ Mada' luk belénKu nedeh. Kareb Ui nemili' Israil, Ui nepebulung nedeh. Ui nengegala' bururKu nedeh déi' bawang Masir idi nepebala nedeh, ‘Ui ini Tuhan Allah muyuh.’

⁶ Kareb ineh Ui nepejani' nguit nedeh remuat rat bang bawang Masir macing inan tana' luk pinili'Ku kuandeh, ieh ineh tana' luk mebaleng idi luk meluun do'.

⁷ Ui nengecuk nedeh nala' akangdeh luk pelaba dat luk inandeh mawa, pad ideh na ngelutak bururdeh ku allah luk mebalih rat Masir, ngaceku Ui ini Tuhan Allahdeh.

⁸ Iamo' ideh sikal metueh rat Negku idi ara' ninger balaKu. Na ideh nenala' akangdeh luk pelaba dat idi na ideh nenecan amung allah lun Masir. Ui netemina' ngukum nedeh ku usehKu déi' bawang Masir.

⁹ Iamo' na Ui nengukum nedeh, pad Ui na ngigu' ngadanKu pa kiung lun pupu baken bang bawang ineh, ngaceku Ui pangeh nepejani' nguit nelun Israil remuat rat bang bawang Masir.

¹⁰ “Idi Ui nenguit nedeh remuat rat bang bawang Masir amé' déi' su luk ali-ali.

¹¹ Ui nemaré bada'Ku nedeh, idi nemada' nedeh ratnan amung ukumKu, luk ngacing ulun kuan lemulun luk maya' nedeh.

¹² Ui nenganau' Aco luk inan Mudeng mangun ku tanu' jani' kai, pad ideh kali' Ui ini Tuhan ngeligan nedeh.

¹³ Iamo' déi' su luk ali-ali pana', ideh sikal metueh rat Negku. Ideh nengelaba ukumKu idi na nemaya' bada'Ku luk ngacing ulun kuan idé-idé luk maya' nedeh. Ideh na nemaya' ukum ratnan Aco luk inan Mudeng. Ui netemina' ngukum nedeh ku usehKu déi' su luk ali-ali, pad Ui ngaté nedeh.

¹⁴ Iamo' na Ui nengukum nedeh, pad Ui na ngigu' ngadanKu, ngaceku pupu baken ineh pangeh nenier Negku nguit nelun Israil remuat rat bang bawang Masir.

¹⁵ Idi Ui nepebulung déi' su luk ali-ali pelé Ui na nguit nedeh macing inan tana' luk pangeh biréKu nedeh, ieh ineh tana' luk mebaleng idi luk meluun do'.

¹⁶ Ui nepebulung ngaceku ideh na nemaya' bada'Ku idi nengelaba ukumKu, idi na nemaya' ukum ratnan Aco luk inan Mudeng. Ideh meluun pian sembayang inan akangdeh.

¹⁷ “Iamo' Ui méi' nedeh. Na Ui nengaté nedeh déi' su luk ali-ali.

¹⁸ Ui nengecuk anakdeh su ineh, kebalaKu, ‘Aleg maya' ukum luk inau' tepun muyuh; idi aleg maya' adatdeh, idi aleg ngelutak burur muyuh ku akangdeh.

¹⁹ Ui ini Tuhan Allah muyuh. Do' maya' ukumKu idi bada'Ku.

²⁰ Do' ngeligan Aco luk inan Mudeng, pad ieh mangun ku tanu' jani' luk inau' tau, pelé muyuh kali' Ui ini Tuhan Allah muyuh.’

²¹ “Iamo' anak-anak inuldeh pana' sikal metueh rat Negku. Ideh nengelaba ukumKu idi na nemaya' bada'Ku, luk ngacing ulun kuan idé-idé luk maya' nedeh. Ideh na nemaya' ukum ratnan Aco luk inan Mudeng. Ui netemina' ngukum nedeh ku usehKu déi' su luk ali-ali, pad Ui ngaté amung-amungdeh.

²² Iamo' na Ui nengaté nedeh, pad Ui na ngigu' ngadanKu arang pupu baken luk nenier Negku nguit nelun Israil remuat rat bang bawang Masir.

²³ Idi Ui nepebulung teh déi' su luk ali-ali, kebalaKu, Ui miak ngatad nedeh amé' aput-aput tana'.

²⁴ Ui nenganau' ineh ngaceku ideh na nemaya' bada'Ku, idi ideh nengelaba ukumKu, idi na nemaya' ukum ratnan Aco luk inan Mudeng; idi ideh nesembayang inan akang tepundeh.

²⁵ “Ngaceku ineh Ui nemaré kuandeh ukum luk na do', idi adat luk na miak ngacing ulun kuandeh.

²⁶ Ui nenima' nedeh ngelutak bururdeh ku barédeh sebuleng, idi ideh nemaré anakdeh luk atun ku baré, pad ini mangun ku ukum, pelé Ui ngegala' kuandeh ratnan Ui ini Tuhan.

²⁷ “O lemulun, do' mada' luk belénKu nelun Israil. Kudeng ini teh tepundeh nengedat Negku ku lawédeh luk na lutep.

²⁸ Ui nenguit nedeh iné' inan tana' luk pijani'Ku kuandeh. Kareb ideh nenier pegkung-pegkung luk medita' idi lawa kayuh luk mebata', ideh nemaré baré luun anid pegkung ineh. Ideh nenganau' Negku museh ku baré luk isebdeh, idi baré luk rupen luk inuitdeh.

²⁹ Ui nengitun nedeh, ‘Anunké su luk medita' ineh luk ulek muyuh?’ Idi macing nekini ideh tinten, ‘Su Luk Medita.’

³⁰ Do' mada' luk belénKu nelun Israil. Ngudehké muyuh nganau' sala' luk kikem tepun muyuh, pad muyuh melili ku akangdeh?

³¹ Macing nekini pana' muyuh maré baré luk mepad, idi ngelutak burur muyuh akang ineh, idi maré anak muyuh ku baré lemaba apui. Idi muyuh lun Israil na ugka' ngitun luk pianKu. Ui ini Tuhan Allah luk mulun. Ui na nima' nemuyuh ngitun anun-anun Negku.

³² Pian muyuh mangun mepad kudeng pupu baken, ieh ineh mepad kudeng pupu luk tudo bang bawang baken idi luk sembayang inan lawa kayuh idi batu pana', iamo' na ineh miak mangun.”

Allah Ngukum Idi Maré Do'

³³ “Ui ini Tuhan Allah luk mulun, idi Ui miak ngimet nemuyuh ku ticu' luk metueh, dengan amung lalud idi usehKu.

³⁴ Ui miak ngegala' lalud idi usehKu, kareb Ui ngamung nemuyuh idi nguit nemuyuh lemubed ratnan amung bawang su luk inan muyuh pangeh pitad.

³⁵ Ui nguit nemuyuh macing déi' ‘Su luk Ali-Ali kuan Amung Pupu,’ pad Ui papu' nemuyuh su ineh idi ngukum nemuyuh.

³⁶ Ui ngukum nemuyuh mepad kudeng Ui nengukum tepun muyuh déi' Sinai, ieh ineh déi' su luk ali-ali.” Kudeng ini bala Tuhan Allah.

³⁷ “Idi Ui miak ngimet nemuyuh dengan metueh pad muyuh maya' jani' ineh.

³⁸ Ui miak ngatad rat arang muyuh lemulun luk sikal metueh rat Negku idi luk nganau' sala'. Ui miak ngalap nedeh ratnan bawang luk inandeh tudo nekini, iamo' na Ui nima' nedeh muli' amé' bawang Israil, pad muyuh kali' Ui ini Tuhan.”

³⁹ Kebala Tuhan Allah, “O lun Israil, aganeh muyuh sembayang nan akang muyuh! Iamo' Ui periteteng nemuyuh, muci ratnan ineh, na miak na muyuh maya' balaKu, pad muyuh na ngigu' ngadanKu luk meligan teh ratnan baré muyuh kuan akang.”

⁴⁰ Kebala Tuhan Allah, “Déi' bang bawang Yerusalim, luun surudKu luk meligan, ieh ineh luun pegkung Israil luk medita', amung muyuh lun Israil miak sembayang Negku. Kareb ineh Ui mawang niat nemuyuh, idi na miak na muyuh nguit amé' Negku, amung baré muyuh, bua' luk atun, idi baré muyuh luk meligan.

⁴¹ Kareb Ui pangeh nenguit nemuyuh remuat rat bang bawang su luk inan muyuh pangeh pitad, pad Ui ngamung nemuyuh, idi Ui miak ngalap baré luk sabpen muyuh. Ngaceku muyuh pian sembayang Negku, idi lun pupu baken miak kali' Ui ini luk meligan.

⁴² Kareb Ui nguit nemuyuh muli' amé' bawang Israil luk pijani'Ku kuan tepun muyuh, idi muyuh miak kali' Ui ini Tuhan,

⁴³ pad muyuh ngerawé ratnan amung-amung kekamen muyuh luk dat luk nengelutak burur muyuh, pelé muyuh megateh inan burur muyuh sebuleng, ngaceku amung kekamen muyuh luk dat.

⁴⁴ Kareb ineh muyuh kali' Ui ini Tuhan, ngaceku na Ui ngukum nemuyuh maya' sala' muyuh idi kekamen muyuh luk dat, iamo' Ui miak matar ngadanKu.” Tuhan Allah pangeh nepebala.

Apui Luk Pa Kabing Busat Aco

⁴⁵ Kebala Tuhan Allah negku,

⁴⁶ “O lemulun, nier pa kabing busat aco. Mada' bawang luk pa kabing busat aco, idi mada' bala luk barén Tuhan kuan pulung luk pa kabing busat aco.

⁴⁷ Ngaceku pulung luk pa kabing busat aco niner bala Tuhan Allah. ‘Siruh, Ui pian ngulun apui luk miak ngeseb anid lawa kayuhmu luk tekering idi anid lawa kayuhmu luk mebata'! Apui ineh na miak uen ngaté. Ieh miak meperuit rat pa kabing busat aco macing pa tinueh busat aco, pad ngilud kiung anid lemulun,

⁴⁸ pelé amung lemulun kali' Ui ini Tuhan pangeh nengulun apui luk na miak uen ngaté.’ ”

⁴⁹ Idi kebalaku, “O Tuhan Allah, amung lemulun ngilang negku, ngaceku ui megéi' pebala ratnan luk pinginud.”