YEHISKIEL 2 - BALA LUK DO'

¹ “O lemulun, do' iko mudur. Ui pian pebala namu.”

² Kareb Ieh uned pebala, Roh Allah nesemuet bang negku idi nengiding negku, idi ui neninger uni tang ineh pebala,

³ “O lemulun, Ui ngecuk namu amé' nelun Israil, luk sikal metueh idi luk neteketed rat Negku. Macing nekini pana' ideh sikal metueh rat Negku mepad kudeng tepundeh.

⁴ Ideh metueh niat idi na ngedita' Negku. Ui ini Tuhan ngecuk namu amé' mada' nedeh ratnan luk belénKu nedeh.

⁵ Kudeng ideh ninger, kian na ninger lek, na miak na ideh kali' aceh nabi pangeh iné' nedeh.

⁶ “Iamo' aleg iko matot nedeh idi ku baladeh, O lemulun. Ideh miak ngelibut namu mepad kudeng tabpa'. Idi teh iko tudo arangdeh mepad kudeng tudo arang menipal kara'. Iamo' aleg iko matot ku kiung idi bala lemulun ineh luk sikal metueh.

⁷ Iko miak mada' nedeh anun-anun luk dukenKu namu, kudeng ideh ninger, kian na ninger lek. Idi ngerawé do'-do', ngaceku lemulun ineh sikal metueh.

⁸ “O lemulun, do' ninger balaKu namu. Aleg iko metueh niat kudeng ideh. Ngukab tangmu idi kuman luk barénKu namu.”

⁹ Ui nenier aceh ticu' nicul luk negku, idi inan aceh surat bang paladNeh.

¹⁰ Ieh nengukab surat ineh, idi ui nekali' inan luk inayud pekop surat ineh — ieh ineh tido, arod, idi bala ratnan susa'.