YEHISKIEL 19 - BALA LUK DO'

Nani Luk Inan Dat Niat

¹ Allah nengecuk negku menani aceh nani luk inan dat niat kuan dueh raca' Israil.

² Tinanmu ineh balang. Ieh nengasa' anakneh arang anak balang deléi.

³ Ieh nengasa' sebuleng anakneh, idi nemada' neneh nakap akan, pad ieh nakap lemulun kenenneh.

⁴ Amung pupu neninger balaneh, idi nengabang neneh bang lubang. Ideh nenganau' neneh bang belalung, idi nenguit neneh amé' Masir.

⁵ Tineh ineh na inan rapet teh. Idi ieh nengasa' sebuleng anakneh teh, pad ieh mangun ku balang luk mesangit.

⁶ Kareb ieh rayeh ieh nemaya' balang baken amé' nakap akan. Ieh nesibada' nakap akan, pad ieh kuman lemulun.

⁷ Ieh nengusag tuda'-tuda' bawang luk linibung idi bawang rayeh pana'. Lemulun bang bawang ineh pelaba tot kareb ieh ngeku.

⁸ Amung pupu nepamung pian munu' neneh; lemulun nacing rat iapeh-iapeh. Ideh nemalad rabatdeh, idi nengakem neneh ku abpungdeh.

⁹ Ideh nenganau' neneh bang belalung, idi nenguit neneh kuan Raca' Babil. Ideh nematar neneh, pad na lun ninger neneh ngeku teh, luun amung surud déi' bawang Israil.

¹⁰ Tinanmu mepad kudeng anggur, luk tinibu tangeb arur. Ngaceku petap abpa', idi mula' don idi bua'neh.

¹¹ Angat-angat anggur ineh metueh, pad ideh mangun ku rukud raca'. Idi lawa anggur netemubu' macing nan laput, Amung lemulun kali' neneh mula' don idi medita'.

¹² Iamo' ieh binubput ku gateh idi talan luun tana'. Bui rat pa busat aco nengekering bua'neh. Angatneh pana' tinutu' pad ideh tekering idi sabpen.

¹³ Nekini ieh pangeh tinibu déi' su luk ali-ali ieh ineh luun tana' luk tekering idi luk na abpa'.

¹⁴ Lawaneh nekaneh ku apui pad angatneh idi bua'neh pana' neseb. Idi angatneh pana' na metueh teh pad na mangun ku rukud raca'. Ini aceh nani luk inan dat niat luk megéi' uen menani.