YEHISKIEL 17 - BALA LUK DO'

Pinginud Anggur Idi Kanui

¹ Kebala Tuhan negku,

² “O lemulun, mada' nelun Israil aceh luk pinginud

³ pad ideh kali' luk belén Tuhan Allah nedeh. Inan aceh kanui luk pelaba rayeh. Idi ieh nemalad iladneh luk pelaba rayeh. Aput bururneh inan buluh luk pelaba do' taga. Ieh netemulud iné' luun Pegkung Lebanon idi ieh nenangal udung kayuh tumuh.

⁴ Ieh nenguit ineh iné' bawang lun luk pepua'.

⁵ Idi ieh nengalap aceh luk tinibu rat bawang Israil idi nenibu neneh luun tana' luk mebaleng su luk mula' abpa', pad ieh temubu'.

⁶ Luk tinibu ineh nenginulih, pad ieh mangun ku lawa anggur luk rayeh idi mebeneh. Angat-angatneh matun kanui ineh idi uatneh iuk-iuk medalem. Idi anggur ineh inan mula' angat idi don pana'.

⁷ “Inan aceh kanui luk rayeh luk baken teh. Idi ieh inan ilad luk rayeh idi mula' buluh. Idi uat anggur ineh matun kanui ineh, idi donneh pana' matun neneh pad ieh mubpur neneh idi ngula' abpa' kuanneh.

⁸ Iamo' anggur ineh pangeh tinibu luun tana' luk mebaleng, su luk mula' abpa', pad ieh ngeruat don idi bua' idi pad ieh mangun ku anggur luk meluun do'.

⁹ “Idi Ui ini Tuhan Allah nengitun, Miakké anggur ini mulun idi temubu'? Naké kanui luk pun-pun ineh mubput neneh idi ngalap bua'neh, idi nutu' angat-angatneh pad ideh melayuh? Dengan sesuut tueh mo' aceh pupu luk rayeh miak mubput neneh.

¹⁰ Matu, ieh tinibu, iamo' miakké ieh mulun idi temubu'? Naké ieh tekering kareb bui macing rat pa busat aco? Naké ieh tekering su luk inanneh mulun ineh?”

Pinginud Ineh Ginala'

¹¹ Kebala Tuhan negku,

¹² “Ngitun lun luk sikal metueh ineh ratnan ilung luk pinginud ineh. Do' mada' nedeh, kebalamu: Raca' Babil iné' Yerusalim idi nenaban raca' idi lun rayeh-rayehneh iné' Babil.

¹³ Idi ieh nengalap seburur lemulun luk inul raca' idi nepejani' neneh, idi nenguit neneh pebulung pad ieh lutep maya' jani'. Ieh nenutup tuda'-tuda' burur lun rayeh,

¹⁴ pad bawang ineh na sikal metueh teh, idi pad ideh na ngelaba jani' ineh.

¹⁵ Iamo' Raca' Yahuda sikal metueh idi nengecuk tuda'-tuda' demulunneh amé' Masir, pad ngalap mula' kuda idi aceh baweh luk rayeh. Miakké ieh metueh? Miakké lawéneh na ngalap susa'? Miakké ieh ngelaba jani' dengan na kumin?

¹⁶ Kebala Tuhan, “Ui ini Allah luk mulun. Idi raca' ini miak maté déi' Babil, ngaceku ieh na maya' bulungneh. Idi teh ieh nengelaba jani' luk inau'neh dengan Raca' Babil luk nengikit neneh mangun ku raca'.

¹⁷ Baweh raca' Masir luk melalud pana' na miak ngedengan neneh kareb ieh pebunu', ngaceku lun Babil miak mudut ibpeng idi ngukat abang, pad ideh ngaté mula' lemulun.

¹⁸ Raca' Yahuda na nemaya' bulungneh idi teh ieh nengelaba jani'neh. Amung ineh inau'neh, idi nekini ieh na miak mepuit.”

¹⁹ Kebala Tuhan Allah, “Ui ini Allah luk mulun, idi Ui miak ngukum neneh, ngaceku ieh ngelaba jani' luk binulungneh ku ngadanKu.

²⁰ Ui miak malad rabatKu idi ngakem neneh. Ui naban neneh amé' déi' Babil pad ieh kumin, ngaceku ieh na lutep maya' Negku.

²¹ Lun pebunu'neh luk meluun sangit miak pitayen bang bunu'. Idi lun luk ketecan miak uen ngatad amé' iapeh-iapeh, pad iko kali' Ui ini Tuhan pangeh nepebala.”

Jani' Allah Luk Inan Merapet

²² Kudeng ini bala Tuhan Allah: “Ui miak ngalap udung kayuh tumuh, idi nangal aceh angat luk mebaruh; Ui nibu ineh luun pegkung luk medita',

²³ ieh ineh pegkung Israil luk meluun dita'. Ieh miak inan angat idi kebua', pad ieh mangun ku tumuh luk meluun do'. Tuda'-tuda' suit miak mulun su ineh, idi nganau' arardeh luun angatneh.

²⁴ Amung-amung kayuh bang tana' ini miak kali' Ui ini Tuhan. Ui nebpeng kayuh luk medita', pad kayuh luk isuut temubu'. Ui nganau' kayuh luk mebata' metekering, idi kayuh luk tekering ruenKu mebata' teh. Ui ini Tuhan pangeh nepebala. Ui miak nganau' luk pijani'Ku ineh.”