YEHISKIEL 16 - BALA LUK DO'

Yerusalim Na Lutep Maya' Tuhan

¹ Kebala Tuhan negku,

² “O lemulun, mada' Yerusalim ratnan kekamendeh luk pelaba dat.

³ Mada' Yerusalim ratnan bala Tuhan Allah nedeh: “Iko tinganak déi' bawang Kanaan. Tamanmu ineh lun Amori, idi tinanmu lun Hiti.

⁴ Kareb iko tinganak, abet puedmu na binulu', na iko diniu', na iko piniid ku tucu' idi na iko libin ku kibung.

⁵ Na lun méi' namu pad ideh nganau' luk kudeng ineh. Kareb iko tinganak na lun méi' namu, idi ideh nenala' namu luun natad.

⁶ “Kareb Ui nelemaba, Ui nekali' namu sigio bang dara'mu sebuleng. Iamo' sagan tu pana' iko medara', Ui mebpeng namu na maté.

⁷ Ui nenganau' namu temubu' mepad kudeng aceh tibu luk do' ulun. Iko iuk-iuk metueh idi medita', pad iko mangun ku anak adi' decur. Iti'mu petap rayeh, idi abpukmu mekadang, iamo' iko lubpa.

⁸ “Kareb Ui nelemaba namu sekua'teh, idi Ui nekali' iko temina' inan mawa. Ui nemapen bururmu luk lubpa ku kuyu'Ku, idi nepejani' mawa namu. Matu, Ui nepejani' namu, idi iko mangun ku pupuKu.” Kudeng ini bala Tuhan Allah.

⁹ “Ui nengalap abpa', idi Ui nemaru' dara' rat luunmu. Ui nengumau luunmu ku umau saitun.

¹⁰ Ui nengayung namu ku kuyu' luk tibaruh idi nemaré namu kasut luk ratnan kubil pung luk meluun do', idi pata ratnan kibung pu, idi kuyu' ratnan kibung luk mesalud.

¹¹ Ui nemarénamu leku' idi bané.

¹² Ui nemaré namu susing icung, abé, idi pata luk metaga luun uluhmu.

¹³ Iko inayung ku amas idi pirak, idi kuyu'mu ratnan kibung pu luk tibaruh idi teh kibung luk mesalud. Iko nekuman ruti luk inau' ratnan banak luk meluun do' idi diru' idi umau saitun pana'. Iko pelaba do' taga idi teh iko mangun ku raca' decur.

¹⁴ Iko mebala ku tagamu aput-aput tana'. Iko pelaba do' taga, ngaceku Ui ini luk nemudut namu.” Kudeng ini bala Tuhan Allah.

¹⁵ “Iamo' iko merapet inan tagamu idi inan ngadanmu, pad iko pamung dengan idé-idé luk lemaba.

¹⁶ Iko nengayung su luk inanmu sembayang ku kibungmu luk do' taga, idi su ineh iko mangun ku decur luk mesawa'.

¹⁷ Iko nengalap amas idi pirak luk biréKu namu ku mudut akang deléi luk inanmu pasét.

¹⁸ Iko nengalap kibung luk tibaruh luk biréKu namu ku ngayung akang ineh. Idi iko nemaré kuan akang-akang ineh umau saitun, idi umau luk do' buen luk biréKu namu.

¹⁹ Ui nemaré akan namu, ieh ineh banak luk meluun do', umau saitun, idi duru', iamo' iko nemaré amung ineh ku baré, pad ngeruid niat amung akangmu ineh.” Kudeng ini bala Tuhan Allah.

²⁰ “Iko nengalap anakmu luk deléi idi decur luk tinganakmu kuanKu, idi nemaré nedeh ku baré kuan akang ineh. Naké sétmu petap dat teh?

²¹ Iamo' iko ngeluun sala'mu, pad iko nemaré anak-anakKu ku baré kuan akangmu.

²² Kareb iko bang ulunmu luk dat idi luk melutak, na tu iko nengerawé ulunmu kareb iko isuut, ieh ineh kareb iko lubpa idi sigio bang dara'mu sebuleng.”

Ulun Yerusalim Kareb Ieh Decur Mesawa'

²³ Kebala Tuhan Allah, “Mesusa' kuanmu! Mesusa' kuanmu! Kareb iko pangeh nenganau' amung kekamen luk dat ineh,

²⁴ iko nemudut su luk inanmu sembayang inan akang iring anid dalan pad iko pasét inan akang ineh.

²⁵ Iko nengedat tagamu. Iko nemaré bururmu kuan idé-idé luk lemaba idi sétmu iuk-iuk amé' mula'.

²⁶ Iko nenima' lun Masri, ieh ineh lun denganmu luk mepanu' ku lili, pasét namu, pad iko ngegio usehKu ku sétmu.

²⁷ “Nekini Ui natang ticu'Ku pian ngukum namu, idi nala' peruan luk biréKu namu. Ui pangeh nemaré namu kuan lun Pilistin luk megateh namu, ngaceku kekamenmu luk dat idi melutak.

²⁸ “Ngaceku lilimu na ugka' ku lun baken, iko nengerada' nelun Asur. Iko mangun ku decurdeh luk mesawa', iamo' lilimu na ugka' ku ineh teh.

²⁹ Iko mangun ku decur luk mesawa' kuan lun Babil, ieh ineh pupu luk pepua' ineh, iamo' nateh lilimu ugka' ku ineh.”

³⁰ Kudeng ini bala Tuhan Allah, “Iko nenganau' amung ineh mepad kudeng seburur decur luk mesawa' luk na migu'.

³¹ Iko nemudut su luk inanmu sembayang inan akang iring anid dalan, pad iko pasét nedeh. Iamo' na iko mepad kudeng decur luk mesawa' luk nakap usin mo'.

³² Iamo' iko mepad kudeng decur luk pasét nelun baken idi na mawa inan awanneh sebuleng.

³³ Decur luk mesawa' ngalap tabpar, iamo' iko nemaré baré kuan lemulun luk inanmu mawa, idi nemaré suap, pad ideh macing rat iapeh-iapeh-iapeh idi pasét namu.

³⁴ Iko decur luk mesawa' luk mebaken tu-tu. Na lun baken nengecuk namu pasét. Na iko nengalap tabpar. Iko nemaré tabpar nedeh! Matu, iko mebaken tu-tu.”

Ukum Allah Kuan Yerusalim

³⁵ O decur luk mesawa', ninger bala Tuhan.

³⁶ Kudeng ini bala Tuhan Allah: “Iko nengelebpa bururmu idi pasét nan lemulun luk inanmu mawa idi nan amung akangmu luk pelaba dat. Idi iko nengaté anak-anakmu ku baré kuan akangmu ineh.

³⁷ Ngaceku ineh Ui miak ngamung amung lemulun luk inanmu pasét ineh, do' luk inanmu mawa idi luk inanmu megateh pana'. Ui miak naped nedeh libut-libutmu, idi Ui ngelebpa bururmu, pad ideh kali' namu lubpa.

³⁸ Ui miak ngukum namu ngaceku pasét idi ngaté lemulun. Denga usehKu Ui ngukum namu macing maté.

³⁹ Ui maré namu bang paladdeh, idi ideh miak ngusag su luk inanmu pasét idi sembayang inan akang. Ideh miak ngalap ayungmu idi banému, pad iko lubpa.

⁴⁰ “Ideh miak ngegio useh lun mula', pad ideh mitung namu ku batu idi natek namu ku pelapetdeh.

⁴¹ Ideh miak ngeseb amung ruma'mu, pad mula' decur nier ukumKu namu ineh. Ui ngagka' namu pad iko na pasét, idi pad iko na maré baré kuan lemulun luk inanmu mawa.

⁴² Idi usehKu miak ugka' pad Ui mulai niat. Idi na Ui museh idi temaruh teh.

⁴³ Iko nekelupan do'Ku namu kareb iko isuut, idi iko nengegio usehKu ku amung kekamenmu luk dat. Ngaceku ineh Ui ngua' kekamenmu ineh. Ngudehké iko nengeluun sala'mu ku sét?” Tuhan Allah pangeh nepebala.

Anak Decur Mepad Kudeng Tinanneh

⁴⁴ Kebala Tuhan, “O Yerusalim, lemulun baken miak nganau' balé' ini ratnan namu: Anak decur mepad kudeng tinanneh.

⁴⁵ Matu, iko anak decur tinanmu. Ieh megateh inan awanneh idi anak-anakneh. Iko mepad kudeng kinanakmu luk decur luk megateh inan awandeh idi anak-anakdeh. Tinan muyuh ineh lun Hiti idi taman muyuh lun Amori.

⁴⁶ “Kinanakmu decur luk rayeh ineh Samaria luk pa tinueh busat aco dengan amung bawangneh. Kinanakmu decur luk isuut ineh Sodom luk pa kabing busat aco dengan amung bawangneh.

⁴⁷ Lilimu na ugka' kareb iko nemaya' lawédeh idi kekamendeh luk dat ineh. Idi iuk-iuk iko nenganau' kekamen luk meluun dat rat nedeh.

⁴⁸ “Ui ini Tuhan Allah luk mulun pebala: Kinanakmu Sodom dengan amung bawangneh na nenganau' luk dat mepad kudeng iko idi amung bawangmu.

⁴⁹ Sodom dengan anak-anakneh luk decur medita' niat ngaceku akandeh petap idi ideh do' udeng teh, iamo' na ideh méi' nelun masi' idi lun luk medereh pana'.

⁵⁰ Ideh medita' niat idi metueh niat idi nenganau' luk inanKu megateh pad Ui nengaté nedeh pa kiungmu.

⁵¹ “Samaria na mula' sala' mepad kudeng iko. Iko nenganau' kekamen luk meluun dat ratnan kekamenneh ineh. Ayu sala' kinanak-kinanakmu isuut kudeng uen maad dengan kekamenmu.

⁵² Na miak na iko migu' ngaceku sala' kinanak-kinanakmu isuut ratnan sala'mu. Do' iko migu' ngaceku kinanak-kinanakmu matu kudeng uen maad denganmu.”

Sodom Idi Samaria Uen Ngeperuan Baruh

⁵³ Kebala Tuhan ni Yerusalim, “Ui pian ngeperuan Sodom idi Samaria dengan amung bawangdeh baruh teh. Idi Ui ngeperuan Yerusalim teh.

⁵⁴ Kali' rungen iko migu', idi igu'mu ineh miak ngegala' peruan kinanak-kinanakmu.

⁵⁵ Ideh miak ngalap peruan teh, idi iko idi amung bawangmu miak uen nuneb.

⁵⁶ Naké' iko nesitunga ni Sodom kareb iko medita' niat,

⁵⁷ kareb nateh kekamenmu luk dat pangeh megala'? Nekini iko mepad kudeng Sodom. Lun Edom, lun Pilistin, idi lun denganmu luk megateh namu situnga namu.

⁵⁸ Na miak na iko mekaneh dereh, ngaceku kekamenmu luk dat idi melutak.” Tuhan pangeh nepebala.

Aceh Pejani' Luk Meruked

⁵⁹ Kebala Tuhan Allah, “Ui miak maré ukum luk petulu namu, ngaceku iko na nemaya' jani'mu, idi teh iko nengelaba bala.

⁶⁰ Iamo' Ui miak maya' jani'Ku namu kareb iko isuut. Idi Ui miak nganau' aceh jani' luk meruked kuanmu.

⁶¹ Iko miak ngerawé kekamenmu pad iko migu' kareb kinanak decurmu luk rayeh idi luk isuut muli' amé' namu. Ui nima' nedeh mangun mepad kudeng anak decurmu, sagan pana' Ui na nepejani' nganau' kudeng ineh.

⁶² Ui miak pejani' baruh pad iko kali' Ui ini Tuhan.

⁶³ Kareb Ui maré do' ratnan amung sala'mu, iko miak ngerawé sala'mu ineh pad iko ungeng ku igu'mu.” Tuhan Allah pangeh nepebala.