YEHISKIEL 14 - BALA LUK DO'

Nabi Mebpeng Na Sembayang Inan Akang

¹ Sebuang lun rayeh lun Israil iné' negku pelé ideh kali' pian Tuhan.

² Idi kebala Tuhan negku,

³ “O lemulun, lun ini ucet ngerawé akangdeh, pad ideh nganau' sala'. Petuluké Ui tunindeh?

⁴ “Do' pebala nedeh: Kudeng ini bala Tuhan Allah, ‘Amung-amung lun Israil luk ucet ngerawé akang, pad ideh nganau' sala', idi luk ngitun nabi miak ngalap or rat Negku. Ieh ineh or luk petulu kuan tuda'-tuda' ngeratu akangdeh.

⁵ Amung-amung akang ineh pangeh nengeraruh nelun Israil rat Negku. Iamo' Ui merapet ngeruid niatdeh, pad ideh lutep maya' Negku.’

⁶ “Do' pebala nelun Israil: Kudeng ini bala Tuhan Allah, ‘Do' muyuh uren idi teketed ratnan akang muyuh idi kekamen muyuh luk dat.’

⁷ “Kudeng seburur lun Israil, kian sakai lek luk tudo arang lun Israil teketed rat Negku, idi ucet ngerawé akang, pad ieh nganau' sala', idi ngitun nabi, Ui ini Tuhan miak maré or kuanneh.

⁸ Ui sikal metueh rat neneh idi nganau' neneh mangun ku bada' kuan lun baken. Ui miak ngatad neneh ratnan pupuKu lun Israil, pad muyuh kali' Ui ini Tuhan.

⁹ “Kudeng seburur nabi saluken pad ieh maré or luk na matu, ieh ineh ngaceku Ui ini Tuhan nima' neneh saluken, Ui miak ngatad neneh rat nelun Israil.

¹⁰ Nabi ineh idi lun luk ngitun neneh pana' miak ngalap ukum luk mepad mo'.

¹¹ Ui nganau' kudeng ini pad lun Israil na necan Negku, idi na ngelutak bururdeh ku sala'deh ineh. Ideh mangun ku pupuKu, idi Ui mangun ku Allahdeh.” Tuhan Allah pangeh nepebala.

Noh, Danel, Idi Ayub

¹² Kebala Tuhan negku,

¹³ “O lemulun, kudeng aceh bawang nganau' sala' idi na lutep maya' Negku, Ui natang ticu'Ku idi ngusag akangdeh. Ui maré iru' luk ngaté lemulun idi pung pana'.

¹⁴ Sagan tu pana' Noh, Danel, idi Ayub idi arangdeh, kekamendeh luk do' ineh miak ngulun burur diteluh sebuleng mo'.”. Tuhan Allah pangeh nepebala.

¹⁵ “Kudeng Ui ngecuk pung luk meliput ngaté nedeh, idi bawang ineh pelaba susa', pad na miak nalan su ineh,

¹⁶ sagan tu pana' diteluh tudo su ineh, Ui ini Tuhan Allah luk mulun pebala, diteluh na miak ngulun anak diteluh sebuleng pana'. Diteluh ngulun burur diteluh sebuleng mo', idi bawang ineh pana' mangun ku su luk ali-ali.

¹⁷ “Kudeng Ui ngacing aceh bunu' kuan bawang ineh, pad lemulun idi pung pitayen ku pelapet,

¹⁸ sagan tu pana' diteluh tudo su ineh, Ui ini Tuhan Allah luk mulun pebala, diteluh na miak ngulun anak diteluh pana', iamo' diteluh ngulun burur diteluh sebuleng mo'.

¹⁹ “Kudeng Ui ngacing aceh ét kuan bawang ineh, pad mula' lemulun idi pung pana' maté ku usehKu,

²⁰ sagan tu pana' Noh, Danel, idi Ayub tudo su ineh, Ui ini Tuhan Allah luk mulun pebala, diteluh na miak ngulun anak diteluh sebuleng pana'. Kekamen diteluh luk do' ineh miak ngulun burur diteluh sebuleng mo'.”

²¹ Kudeng ini bala Tuhan Allah, “Ui maré kuan Yerusalim, apat ukumKu luk meluun dat, ieh ineh bunu', iru', pung luk mesangit, idi ét, pad lemulun idi pung pana' maté.

²² Idé-idé luk mulun idi luk ngulun anakneh, kali' rungen pelaba dat siren muyuh, pad muyuh kali' idi ukum luk uenKu ngacing kuan Yerusalim ineh petulu.

²³ Kareb muyuh nier kekamendeh luk dat, idi muyuh miak kali' na Ui ngukum nedeh mo'-mo'.” Tuhan Allah pangeh nepebala.