YEHISKIEL 11 - BALA LUK DO'

Allah Miak Ngukum Yerusalim

¹ Roh Allah nengikit negku idi nenguit negku amé' matun tanga' Ruma' Allah luk pa busat aco. Idi ui nenier munung tanga' ineh dueh ngepulu' limeh burur lemulun, idi arangdeh ui nekali' ni Yasania Asur idi Pelatia Benaya lun nguyut pupu ineh.

² Idi kebala Allah negku, “O lemulun, ini lemulun luk dat luk ngakem bang bawang ini maya' terawédeh sebuleng.

³ Kebaladeh, ‘Tau miak ngalap utung ratnan mudut ruma'. Bawang ini mepad kudeng lacang, idi tau mepad kudeng uang pung bang ineh, iamo' lacang ineh ngelibung netau ratnan apui.’

⁴ O lemulun, ngadu' nedeh.”

⁵ Roh Tuhan neketukan negku, idi Tuhan nengecuk negku mada' bala ini nelun mula': “O lun Israil, Ui kali' luk belén muyuh idi luk teruayen muyuh.

⁶ Muyuh pangeh nengaté pelaba ula' lemulun bang bawang ini pad butung maput luun dalan.

⁷ “Ui ini Tuhan, idi ini balaKu nemuyuh. Matu bawang ini mangun ku lacang, iamo' uang pung pinginud anunké? Ieh ineh amung butung luk pinaté muyuh! Iamo' muyuh miak talan rat bang bawang ini.

⁸ Matotké muyuh ku pelapet? Ui ngecuk lemulun munu' nemuyuh ku pepalet.

⁹ Ui nala' nemuyuh rat bang bawang ini idi maré nemuyuh bang palad lun pupu baken. Muyuh mekaneh ukum maté.

¹⁰ Muyuh pitayen bang bunu' bang bawang muyuh sebuleng, pad muyuh kali' Ui ini Tuhan.

¹¹ Muyuh baken uang pung ineh, idi bawang ini na miak ngelibung nemuyuh. Ui ngukum nemuyuh su apeh luk inan muyuh bang bawang Israil,

¹² pad muyuh kai' Ui ini Tuhan idi ukum luk linaba muyuh, ieh ineh ukumKu, idi ecuk luk na binaya' muyuh, ieh ineh ecukKu, iamo' muyuh nemaya' ukum amung pupu baken luk libut muyuh.”

¹³ Kareb ui uned mada' luk biré Tuhan ineh, Pelatia Benaya neluka' idi naté. Ui netekeradung idi nengitang, “Adui, Tuhan Allah! Miakké Iko ngaté amung lun Israil luk ketecan?”

Jani' Allah Nelun Luk Tiban

¹⁴ Kebala Tuhan negku,

¹⁵ “O lemulun, lun luk tudo déi' Yerusalim pegayam ratnan iko idi teh ratnan kinanakmu lun Israil luk tiban. Kebaladeh, ‘Lun luk tiban ineh pelaba ado, pad ideh na miak sembayang inan Tuhan. Ieh pangeh nemaré tana' ini kuan tau.’

¹⁶ “Do' mada' balaKu inan kinanakmu luk tiban ineh. Ui ini luk nemasut nedeh pad ideh uen ngatad idi tudo bang bawang baken luk mado. Iamo' laba' ini Ui nima' nedeh sembayang Negku bang amung bawang luk ulekdeh ineh.

¹⁷ “Ngaceku ineh do' mada' nedeh, kebalamu, Kudeng ini bala Tuhan: Ui miak ngamung nedeh ratnan bawang su luk inanKu nengatad nedeh, idi Ui maré tana' Israil lemubed kuandeh.

¹⁸ Kareb ideh lemubed, do' ideh ngusag amung akang luk inan megani' idi luk inanKu megateh.

¹⁹ Ui maré kuandeh rok luk mebaruh idi niat luk lutep Negku. Niatdeh luk metueh kudeng batu ruenKu ngelibal ku niat luk melaya'.

²⁰ Pangeh ineh ideh miak ngimet amung ukumKu idi lutep maya' amung ecukKu. Ideh mangun ku pupuKu, idi Ui mangun ku Allahdeh.

²¹ Iamo' Ui miak ngukum lemulun luk mawa nan akang luk inan megani' idi luk inanKu megateh. Ui miak ngukum nedeh ngaceku luk inau'deh ineh.” Tuhan Allah pangeh nepebala.

Rayeh Allah Necan Yerusalim

²² Pung-pung luk inan ilad ineh nengimun temulud, idi roda-roda pana' nemaya' nedeh. Idi rayeh Allah lun Israil idi pa luundeh.

²³ Idi rayeh Tuhan nenecan bawang Yerusalim idi nemubuh iné' luun pegkung luk pa busat aco bawang ineh.

²⁴ Bang luk sinierku ineh Roh Tuhan nengikit negku idi nenguit negku lemubed amé' matun lun luk tiban déi' Babil ineh. Idi luk sinierku ineh na idi,

²⁵ idi ui nemada' nelun luk tiban ineh ratnan amung-amung luk ginala' Tuhan negku.