YEHISKIEL 10 - BALA LUK DO'

Rayeh Tuhan Necan Ruma' Allah

¹ Ui nenier luk melibuh luk pa luun uluh pung luk inan ilad ineh, idi pa luundeh ineh inan luk mepad kudeng ayu kerusi luk inau' ratnan batu luk bata' langit.

² Kebala Allah nan lemulun luk ngayung ku kibung pu ineh, “Amé' arang roda luk pa liang pung ineh, idi manu' dueh paladmu ku bareh apui luk mebudung. Idi ngisak bareh apui ineh aput bawang ineh.” Ui nenier neneh nalan.

³ Pung luk inan ilad ineh tuped pa kabing busat aco Ruma' Allah kareb ieh nesemuet, idi aceh laput maput natad luk déi' dalem.

⁴ Idi rayeh Tuhan numak ratnan pung ineh idi nemubuh iné' munung tanga' Ruma' Allah, idi laput ineh nemanu' Ruma' Allah, pad natad ineh mebudung ku rayeh Tuhan.

⁵ Idi uni ilad pung-pung ineh pedingeren luun natad luk déi' liang pana'. Idi unineh mepad kudeng arod Allah luk Melalud.

⁶ Kareb Tuhan nengecuk lemulun luk ngayung ku kibung pu ngalap apui rat arang roda luk liang pung-pung ineh, idi ieh iné' tuped iring sebuleng roda ineh.

⁷ Sebuleng pung ineh nenatang ticu'neh bang paui ineh luk arangdeh, idi nengalap bareh apui, idi nengerareng neneh bang palad lemulun luk ngayung ku kibung pu ineh. Lemulun ineh nengalap bareh apui ineh idi nenalan.

⁸ Ui nenier inan luk kudeng ayu ticu' lemulun liang anid ilad pung ineh.

⁹ Idi teh ui nenier inan sebuleng roda iring anid pung ineh, idi amung roda ineh mesilo mepad kudeng batu luk meraga.

¹⁰ Amungdeh mepad ayu, idi anid roda inan roda luk tepalang unedneh.

¹¹ Kareb pung ineh nalan, ideh nalan matun anid-anid lidung dengan na lumi. Ideh pad-pad nalan matun su luk ulekdeh dengan na lumi.

¹² Burur, keted, ticu', iladdeh, idi roda pana' maput ku mateh.

¹³ Amung roda ini mepad kudeng roda bang luk sinierku atun.

¹⁴ Anid-anid pung ineh inan apat kiung, luk pun-pun ineh kiung sapi' deléi, luk kedueh ineh kiung lemulun, luk keteluh ineh kiung balang, idi luk keapat ineh kiung kanui.

¹⁵ (Amung pung ineh mepad kudeng luk sinierku déi' tangeb Abpa' Kibar.) Pung-pung ineh nekemikit iné' arang gawa',

¹⁶ idi kareb ideh nalan, roda pana' nalan maya' nedeh. Kareb ideh malad iladdeh pian nalan, roda ineh pana' nemaya' nedeh.

¹⁷ Kareb pung ineh ucu', roda pana' ucu', idi kareb pung ineh temulud, roda pana' nemaya' nedeh, ngaceku pung ineh nguyut nedeh.

¹⁸ Idi rayeh Tuhan nenecan munung tanga' Ruma' Allah idi nemubuh iné' pa luun pung ineh.

¹⁹ Ideh nemalad iladdeh idi nekemikit rat luun tana' kareb ui nenier nedeh, idi roda pana' nemaya' nedeh. Ideh nucu' gageh munung tanga' Ruma' Allah pa busat aco, idi rayeh Allah lun Israil idi pa luundeh.

²⁰ Idi ui nengiti pung ini kali' rungen mepad kudeng luk sinierku déi' tangeb Abpa' Kibar luk nenguit Allah lun Israil luun kerusiNeh.

²¹ Anid-anid pung ineh inan apat kiung, idi apat ilad, idi teh inan luk kudeng ayu ticu' lemulun liang anid iladdeh.

²² Idi kiungdeh mepad kudeng luk sinierku déi' tangeb Abpa' Kibar. Anid pung neh nalan petacu su tuludeh.