YEHISKIEL 1 - BALA LUK DO'

Luk Pun-Pun Sinier Yehiskiel Ratnan Allah ( 1.1—7.27 ) Kerusi Allah

¹ Limeh aco bulan apat bang lak luk keteluh ngepulu', ui tudo dengan lun Yahudi luk tiban déi' tangeb Abpa' Kibar luk déi' bawang Babil.

² (Ieh ineh bang limeh aco bulan bang lak luk kelimeh muci ratnan Raca' Yoyakin pangeh tiban.)

³ Ui ini Yehiskiel Busi luk imam, neninger Tuhan pebala negku idi nekali' laludNeh, déi' tangeb Abpa' Kibar luk déi' Babil.

⁴ Ui netengook idi nenier libuleh luk macing rat pa tinueh busat aco. Kilep merasat ratnan laput luk rayeh, idi libut-libutneh langit pana' macang. Idi su luk merasat ku kilep ineh, inan luk mesilo mepad kudeng tekaling.

⁵ Idi uned libuleh ineh ui nenier luk mepad kudeng ayu apat pung. Idi bururdeh kudeng lemulun.

⁶ Iamo' anid-aniddeh inan apat kiung idi apat ilad.

⁷ Kukuddeh mesiri, iamo' lisundeh mepad kudeng lisun sapi' deléi. Idi pung ineh mesilo mepad kudeng tekaling luk isa.

⁸ Idi teh ideh inan apat ticu' lemulun liang anid iladdeh.

⁹ Anid pung ineh malad dueh iladneh pad mangun ku aceh libung luk melebping, idi iladdeh petutup-petutup. Kareb ideh nalan ideh nalan pad-pad dengan na lumi.

¹⁰ Idi anid-anid apat kiung pung ineh baken ayu: pa atun inan kiung lemulun, pa tinueh inan kiung balang, pa kabing inan kiung sapi' deléi, idi pa keted inan kiung kanui.

¹¹ Dueh ilad anid-anid pung ineh tebalad, pad ideh petutup nan ilad pung luk iringdeh, idi dueh iladdeh luk baken tegeripu.

¹² Anid-anid pung ineh nier su tuludeh. Ngaceku ineh ideh na lumi kareb ideh nalan amé' su apeh luk piandeh.

¹³ Arang pung ineh inan luk kudeng ayu sesakan luk mebudung, luk megéi' nalan. Apui ineh megéi' mebudung idi ngeruat kilep.

¹⁴ Pung ineh pana' nalan lemubed mepad kudeng kilep.

¹⁵ Kareb ui nenier apat pung ineh, ui nekali' apat roda luk macing luun tana', sebuleng iring anid-aniddeh.

¹⁶ Idi anid-anid roda ineh mesilo kudeng batu luk meraga idi mepad ayu. Idi anid roda inan roda luk tepalang unedneh,

¹⁷ pad amung roda miak nalan matun anid-anid lidung.

¹⁸ Idi iring roda ineh maput ku mateh.

¹⁹ Kareb pung ineh nalan, roda pana' nalan maya' nedeh, idi kudeng pung ineh kemikit, kudeng ineh teh roda kemikit.

²⁰ Pung ineh nalan su apeh luk pian ulekdeh, idi roda pana' maya' mepad kudeng luk ruen pung ineh teh, ngaceku pung luk nguyut nedeh.

²¹ Anid kua' pung ineh nalan, ucu' idi kemikit, roda pana' nganau' luk kudeng ineh teh, ngaceku pung luk nguyut nedeh.

²² Pa luun pung ineh inan luk melibuh luk inau' ratnan sayun luk mesilo.

²³ Pa liang luk melibuh ineh anid pung nemalad dueh iladneh petutup ku ilad pung luk iringneh, idi nemapen bururneh ku dueh iladneh luk baken.

²⁴ Ui neninger uni iladdeh kareb ideh temulud. Ieh ineh mepad kudeng beri abpa' rayeh, idi teh mepad kudeng uni aceh baweh luk rayeh, idi mepad kudeng uni tang Allah luk Melalud. Kareb ideh ucu' temulud, iladdeh tegeripu,

²⁵ idi inan teh uni rat pa luun luk melibuh ineh luk pa luundeh.

²⁶ Pa luun luk melibuh ineh inan luk mepad kudeng ayu kerusi luk inau' ratnan batu luk bata' langit, idi aceh ayu lemulun luk tudo luunneh.

²⁷ Idi ayu lemulun ineh mesilo mepad kudeng tekaling luk luun apui. Ieh merasat mepad kudeng budung apui.

²⁸ Idi acangneh mepad kudeng tegkang luk luun laput. Kudeng ineh teh ayu rayeh Tuhan. Kareb ui nenier amung ineh, ui netekeradung luun tana'. Idi ui neninger aceh tang pebala,