UKUM 9 - BALA LUK DO'

Arun Maré Baré

¹ Idi kareb aco luk kewaluh idi Musa nenawar Arun idi anak-anakneh dengan amung lun rayeh Israil.

² Idi kebalaneh ni Arun, “Ngalap aceh sapi' deléi luk pegawa' luk do', barén ngaceku sala', idi aceh dumba deléi luk do' mangun ku baré luk sabpen, pa kiung Tuhan.

³ Idi ngecuk nelun Israil ngalap aceh amék deléi luk barén ngaceku sala', idi sebuleng anak sapi' idi sebuleng anak dumba luk ulundeh selak, ieh ineh luk do' mangun ku baré luk sabpen,

⁴ idi teh sebuleng sapi' deléi idi sebuleng dumba deléi ku baré luk nguit pedo' idi luk miak sabpen pa kiung Tuhan, idi baré akan luk tinina' dengan umau. Ngaceku aco sini Tuhan miak silagan nemuyuh.”

⁵ Idi ideh nenguit luk icuk Musa macing pa atun Lepo su luk inan papu' Tuhan. Idi lun mula' ineh nepamung pad sembayang na Tuhan.

⁶ Idi kebala Musa, “Kudeng ini ecuk Tuhan nemuyuh, pad ubur Tuhan miak silagan nemuyuh.”

⁷ Idi kebala Musa ni Arun, “Amé' iring bubpun, idi temina' ku baré luk barénmu ngaceku sala' idi baré luk sabpen teh, idi nganau' luk nguit pedo' ngaceku bururmu sebuleng idi ngaceku pupumu ini; idi temina' ku baré lun mula' ineh idi nganau' luk nguit pedo' kuandeh, maya' kudeng luk icuk Tuhan.”

⁸ Idi Arun iné' iring bubpun. Idi ieh nengeret sapi' luk pegawa' ineh barén ngaceku sala'neh sebuleng.

⁹ Idi anak-anak Arun nenguit dara' ineh kuanneh. Idi ieh nengerereb bua' ticu'neh bang dara' ineh, idi nengisit ineh luun unga bubpun. Idi dara' luk ketecan ineh inutangneh luun kukud bubpun ineh.

¹⁰ Iamo' amung lemakneh, idi beterneh luk dueh, idi sebabpat luk meluun do' ratnan aténeh luk barén ngaceku sala' ineh, isebneh luun bubpun, maya' kudeng luk icuk Tuhan ni Musa.

¹¹ Iamo' uangneh idi kubilneh pana' isebneh mado rat su luk inandeh nelupo.

¹² Pangeh ineh ieh nengeret baré luk sabpen ineh. Idi dara'neh inuit anak-anak Arun kuanneh, idi ieh nengisak ineh libut-libut bubpun ineh.

¹³ Idi ideh nenguit kuanneh baré luk sabpen luk titek, perapu dengan uluhneh, idi amung ineh isebneh luun bubpun.

¹⁴ Idi ieh nemaru' tinéi'neh idi tipanneh, idi ieh nengeseb ineh dengan baré luk sabpen luun bubpun ineh.

¹⁵ Pangeh ineh idi Arun nemaré baré lun mula'. Idi ieh nengalap amék deléi luk barén ngaceku sala' lun mula', idi nengeret neneh idi nemaré ineh ngaceku sala' mepad kudeng baré luk pun-pun ineh.

¹⁶ Idi ieh nenguit pung luk sabpen ineh idi nemaré ineh, maya' kudeng luk icuk Tuhan.

¹⁷ Idi ieh nenguit baré akan. Idi ieh nengalap sengeragam idi nengeseb ineh luun bubpun, baken ratnan baré luk iseb kareb pekak.

¹⁸ Pangeh ineh, idi ieh nengeret sapi' deléi idi dumba deléi mangun ku baré luk nguit pedo' ngaceku lun mula'. Idi anak-anak Arun pana' nenguit dara' ineh kuanneh, idi Arun nengisak ineh libut-libut bubpun ineh.

¹⁹ Iamo' lemak sapi' deléi idi dumba deléi ineh, idi iur luk melamu ineh, idi lemak luk luun tinéi' idi beterdeh, idi sebabpat luk meluun do' ratnan atédeh,

²⁰ idi amung lemak ineh rirengdeh luun ruuk baré ineh, idi Arun nengeseb amung lemak ineh luun bubpun.

²¹ Iamo' ruuk idi tipan luk pa tinueh ineh tinicul-tinicul Arun pa kiung Tuhan, maya' kudeng luk icuk Musa.

²² Idi Arun nengiding ticu'neh pa luun lun mula' ineh idi ieh nemutuh peruan kuandeh. Kareb ieh pangeh nemaré amung baré ineh, idi ieh netemurun.

²³ Musa idi Arun nesemuet bang Lepo su luk inan papu' Tuhan. Kareb didueh neremuat, idi didueh nemutuh peruan kuan lun mula' ineh idi rasat Tuhan pana' melagan siren lun mula' ineh.

²⁴ Denak-denak Tuhan nemaré apui luk nengeseb amung baré luk sabpen idi lemak luk luun bubpun ineh. Kareb lun mula' nenier ineh, idi ideh nengitang idi ideh netekunal.