UKUM 7 - BALA LUK DO'

Baré Luk Pingetap

¹ “Idi ini dalan baré luk pingetap. Ieh ineh baré luk meluun ligan.

² Do' baré ineh kereten iring bubpun su luk inan ngeret baré luk sabpen ineh teh. Idi dara'neh uen ngisak libut-libut bubpun.

³ Idi ratnan ineh do' ieh maré amung lemakneh idi iurneh luk melamu, idi linuapneh,

⁴ idi dueh beterneh, idi amung lemak luk luunneh, idi luk nan iungneh, idi sebabpat luk meluun do' ratnan aténeh.

⁵ Idi amung ineh sabpen imam luun bubpun ku aceh baré akan kuan Tuhan. Ieh ineh baré luk pingetap.

⁶ Idi amung deléi rat arang imam miak kuman ineh. Idi do' ideh kuman ineh déi' su luk meligan, ngaceku baré ineh meluun ligan.

⁷ “Do' baré luk pingetap ineh mepad kudeng baré ngaceku sala'. Idi uangneh mangun ku babpat imam, luk pangeh nemaré baré ineh luk nguit pedo'.

⁸ Idi imam luk maré baré luk sabpen ineh miak ngalap kubil rat luun baré luk pangeh biréneh ineh.

⁹ Idi amung baré akan luk didang luun tetel, kian bang periuk idi luun belawan lek, ieh ineh mangun ku babpat imam luk maré ineh.

¹⁰ Amung baré akan luk rinabur ku umau, idi luk tekering teh, luk mata' mangun ku aceh baré luk uen mabpat kuan anak Arun.

Baré Luk Nguit Pedo'

¹¹ “Idi ini dalan baré luk nguit pedo' luk miak barén kuan Tuhan.

¹² Idi kudeng lun maré ineh ku baré ubur, idi do' perapu dengan baré ubur ineh maré tuda'-tuda' pinaram luk na linamud luk rinabur ku umau, idi tinapé luk na linamud luk inisit ku umau, idi pinaram ratnan banak luk rinabur ku umau.

¹³ Idi teh, do' ieh maré pinaram luk na linamud.

¹⁴ Do' maré aceh babpat ratnan amung-amung baré kuan Tuhan. Idi ieh ineh mangun ku babpat imam luk pangeh nengisak dara' luk nguit pedo' ineh.

¹⁵ Idi do' uang baré luk nguit pedo' ineh kenen bang aco luk inanneh biré. Idi sesuut pana' elaneh na miak ketecan macing kenebpa.

¹⁶ “Iamo' kudeng seburur lemulun maré aceh baré maya' jani'neh, kian aceh baré maya' awang niatneh, idi miak ieh kenen kareb aco luk inanneh biré. Idi elaneh miak kenen pekak kenebpa.

¹⁷ Iamo' kudeng inan ela uang baré ineh kareb aco luk keteluh na miak na ieh sabpen.

¹⁸ “Idi kudeng uang luk biré inan pedo' ineh kenen kareb aco luk keteluh, idi baré lemulun luk nemaré ineh na petulu idi na ieh petulu kuan Tuhan teh. Ieh ineh mangun ku akan luk dat. Idi lemulun luk kuman ineh ieh sebuleng mabeh sala'neh.

¹⁹ “Idi teh uang luk petulu ku aceh luk inan megani', ineh pana' na miak kenen. Iamo' do' ieh sabpen. Iamo' uang luk baken ineh, idé-idé luk meligan miak kuman ineh.

²⁰ Iamo' idé luk kuman ratnan baré luk nguit pedo' luk Tuhan kuan kareb ieh nateh linigan, idi lun ineh miak uen ngusu rat arang pupuneh.”

²¹ Kudeng ineh teh, idé luk ngakem aceh luk inan megani', ieh ineh ratnan lemulun, kian pung lek, idi ieh kuman uang baré luk nguit pedo' luk Tuhan kuan, idi lun ineh miak uen ngusu rat arang pupuneh.”

²² Kebala Tuhan ni Musa,

²³ “Mada' kuan lun Israil: Aleg muyuh kuman lemak sapi', dumba, idi amék.

²⁴ Idi lemak butung pung idi lemak pung luk giramit ineh miak ieh uen makai ku luk baken, iamo' na ieh miak kenen.

²⁵ Ngaceku idé luk kuman lemak pung ratnan baré luk sabpen kuan Tuhan, idi lemulun ineh uen ngusu rat arang pupuneh.

²⁶ “Idi teh aleg muyuh kuman dara' bang su luk inan muyuh mudeng, do' dara' suit idi dara' pung pana'.

²⁷ Kudeng idé luk kuman dara', ieh ineh uen ngusu rat arang pupu Allah.”

²⁸ Kebala Tuhan ni Musa teh,

²⁹ “Mada' kuan lun Israil kudeng ini: Idé luk maré aceh baré pedo', do' ieh sebuleng maré sebabpat baré ineh kuan Tuhan.

³⁰ Dengan ticu'neh sebuleng, do' ieh nguit amung-amung luk barén sabpen kuan Tuhan, idi do' ieh nguit lemakneh perapu dengan ruukneh pad ineh tidulen ku aceh baré pa kiung Tuhan.

³¹ Idi imam ineh ngeseb lemakneh luun bubpun, iamo' ruukneh mangun ku babpat imam-imam.

³² Do' muyuh maré tipan luk pa tinueh kuan imam ku aceh baré ratnan amung baré muyuh luk nguit pedo',

³³ ieh ineh kuan imam luk maré dara' idi lemak luk nguit pedo' ineh.

³⁴ Ngaceku ruuk baré luk tidulen idi tipan baré luk iten ineh pangeh Ui nengalap kuanKu sebuleng ratnan amung baré lun Israil luk nguit pedo', idi do' ineh barén lun Israil nelun imam macing ruked-ruked.

³⁵ Idi ieh ineh babpat kuan Arun idi anak-anakneh ratnan amung luk barén sabpen kuan Tuhan, kareb aco luk inandeh inumau mangun ku imam.

³⁶ Idi bang aco sineh, Tuhan nengecuk nelun Israil maré babpat ineh kuandeh. Idi ini aceh dalan luk miak bén lun Israil macing ruked-ruked.

³⁷ “Idi ini dalan baré luk sabpen, baré akan, baré ngaceku sala', baré luk pingetap, baré pingumau, idi baré luk nguit pedo',

³⁸ luk biré Tuhan ni Musa luun Pegkung Sinai déi' su luk ali-ali kareb aco luk inan Tuhan nengecuk nelun Israil maré baré kuanNeh.”