UKUM 6 - BALA LUK DO'

¹ Kebala Tuhan ni Musa,

² “Kudeng seburur lemulun nganau' sala' pa kiung Tuhan, ngaceku ieh naluk lun denganneh ku binaweh duduk, kian binaweh luk biré nan ticu'neh, kian binaweh luk pino, kian binaweh luk inaroneh rat nelun denganneh,

³ kian binaweh luk netutu' luk nekali'neh, idi ieh mebalih ratnan ineh, idi pebulung dengan mebalih ratnan anun-anun pana' luk inau'neh, pad ieh mesala',

⁴ idi kudeng ieh pangeh nenganau' sala', idi kali' sala'neh, na miak na ieh ngelubed binaweh luk pinoneh, kian binaweh luk pangeh inaroneh, kian luk pangeh biré ku duduk neneh, kian binaweh luk netutu' luk ieh nekali',

⁵ kian anun-anun pana' luk inanneh nepebulung dengan mebalih. Idi do' ieh maré raganeh dengan petap ku libalneh, perapu dengan sebabpat limeh. Idi do' ieh ngelubed ineh inan lemulun luk kuan binaweh ineh, ieh ineh bang aco luk inanneh nemaré baré kuan Tuhan ngaceku sala'neh.

⁶ Idi do' ieh maré inan Tuhan aceh dumba deléi kian amék lek luk do' mangun ku bar'e luk pingetap pa kiung Tuhan. Idi do' ngeletep raga luk petulu.

⁷ Idi imam nganau' luk inan pedo' kuanneh pa kiung Tuhan, pad ieh ngalap do' ratnan sala'neh.”

Baré Luk Sabpen

⁸ Kebala Tuhan ni Musa,

⁹ “Mada' Arun idi anak-anakneh ratnan dalan maré baré luk sabpen ineh: “Do' baré ineh ketecan luun bubpun idi sabpen kedangan-kedangan macing pekak kenebpa. Idi apui luk luun bubpun ineh do' ieh pitarin.

¹⁰ Idi do' imam ineh ngayung ku kuyu' idi siduar kibung pu, idi ngalap abuh baré luk iseb rat luun bubpun ineh idi do' ngerareng ineh iring bubpun ineh teh.

¹¹ Pangeh ineh do' ieh ngelibal ayungneh. Idi abuh ineh itenneh remuat rat su luk inandeh nelupo amé' inan su luk meligan.

¹² Idi kudeng ineh teh apui luk luun bubpun ineh uendeh ngasa' kidi-kidi, pad ieh na milep. Idi anid pekak do' imam nganau' apui pa luunneh, idi ngerareng luk sabpen luun ineh teh, idi ngeseb amung lemak ratnan baré luk nguit pedo'.

¹³ Idi do' ideh ngasa' apui luk luun bubpun ineh kidi-kidi, pad ieh na maté.

Baré Akan

¹⁴ “Idi ini dalan maré baré akan. Ieh ineh baré anak-anak Arun kuan Tuhan, pa atun bubpun.

¹⁵ Idi imam ngalap sengeragam banak ratnan baré akan dengan amung umau luk do' buen teh. Idi amung ineh sabpenneh luun bubpun mangun ku aceh babpat baré idi luk do' buen kuan Tuhan.

¹⁶ Idi elaneh kenen imam ineh, ieh ineh akan luk na linamud idi kenen su luk meligan i natad Lepo su luk inan papu' Tuhan.

¹⁷ Idi ieh ineh na miak uen nadang dengan lamud. Idi ieh ineh babpat luk biréKu nedeh ratnan amung luk barén sabpen kuanKu. Ieh ineh luk meluun ligan, mepad kudeng baré ngaceku sala', idi baré luk pingetap.

¹⁸ Idi amung inul Arun luk deléi ineh miak kuman babpat ineh macing ruked-ruked. Idi idé-idé luk ngakem baré ineh kali' rungen ieh meligan.”

¹⁹ Idi kebala Tuhan ni Musa,

²⁰ “Idi ini baré Arun idi anak-anakneh luk miak baréndeh kuan Tuhan kareb aconeh inumau, ieh ineh tudu' lio banak mepad kudeng baré akan luk pekalai, sebuang barén pekak, idi sebuang barén malem.

²¹ Idi ieh ineh uen ngerabur ku umau, idi uen nadang luun belawan. Idi baré ineh uen ngareg, mepad kudeng baré luk kenen, mangun ku aceh buen luk do' kuan Tuhan.

²² Ieh ineh barén inul Arun luk inumau mangun ku Imam Rayeh macing ruked-ruked. Amung ineh sabpen kuan Tuhan.

²³ Do' amung baré akan imam ineh sabpen. Baré akan imam ineh na miak kenen.”

Baré Ngaceku Sala'

²⁴ Idi kebala Tuhan ni Musa,

²⁵ “Mada' Arun idi anak-anakneh ratnan dalan baré ngaceku sala' ineh: “Baré ngaceku sala' kereten pa kiung Tuhan, iring bubpun su luk inan ngeret baré luk sabpen. Ieh ineh baré luk meluun ligan.

²⁶ Idi imam luk maré luk barén ngaceku sala' ineh miak kuman ineh, déi' su luk meligan i natad Lepo su luk inan papu' Tuhan.

²⁷ Idi idé luk ngakem uangneh ineh kali' rungen ieh meligan. Idi ayung luk nepisit ku dara'neh, do' ieh baruin bang aceh su luk meligan.

²⁸ Idi kuden luk inan nenanek ineh do' ieh ruen mila'. Iamo' kudeng ieh tinanek bang kuden tekaling, do' ieh uen ngasa idi uen ngapu' bang abpa'.

²⁹ Idi amung deléi' rat arang imam ineh miak kuman luk biré ineh. Ieh ineh luk meluun ligan.

³⁰ Iamo' kudeng sebuang dara' inuit semuet bang Lepo su luk inan papu' Tuhan mangun ku luk nguit pedo' déi' Su luk Meligan, amung baré ngaceku sala' ineh na miak kenen. Do' amung ineh sabpen.