UKUM 5 - BALA LUK DO'

Ratnan Tuda'-Tuda' Baré Ngaceku Sala'

¹ “Idi kudeng seburur lemulun pangeh tinawar mangun ku lun nekali' ratnan luk sinierneh idi luk nekali'neh, idi na ieh maré kali', ieh mesala' peh.

² “Kudeng seburur lemulun pangeh nepetulu ku luk megani', ieh ineh butung pung luk meliput idi melayo, idi butung pung luk baken pana', idi na ieh kali' bururneh megani', idi kareb ieh kali', ineh mangun ku sala' kuanneh.

³ “Idi kudeng seburur lemulun megani' ku anun-anun pana' luk ratnan lemulun, idi ieh ineh na nekali'neh, iamo' muci ineh megala' kuanneh, ieh mesala' peh.

⁴ “Idi kudeng seburur lemulun pebulung ratnan anun-anun dengan na ngerawe' do'-do' atun, idi kareb ineh megala' kuanneh, ieh mesala' peh.

⁵ “Idi kudeng seburur lemulun mesala' dengan dalan luk kudeng ineh, do' ieh ngamo sala' ineh.

⁶ Idi do' ieh maré inan Tuhan sebuleng pung tineh, dumba kian amék lek, barén ngaceku sala' luk inau'neh. Idi do' imam nganau' luk nguit pedo' ngaceku sala'neh.

Baré Ngaceku Sala' Lun Masi'

⁷ “Iamo' kudeng seburur lemulun masi' pad ieh na miak maré dumba idi amék, do' ieh maré inan Tuhan dueh suit sukur, kian dueh suit limun lek barén ngaceku sala'neh, ieh ineh sebuleng baré ngaceku sala' idi sebuleng baré luk sabpen.

⁸ Idi do' ieh nguit ineh amé' inan imam. Luk pun-pun barénneh, ieh ineh suit luk barén ngaceku sala'. Idi do' imam ngekaka dierneh, iamo' aleg mutut neneh.

⁹ Idi do' sebuang dara' ratnan baré ngaceku sala' ini uen ngisak iring bubpun. Idi do' dara' luk ketecan ineh uen ngutang luun kukud bubpun. Ieh ineh baré ngaceku sala'.

¹⁰ Idi do' ieh maré suit luk kedueh ineh mangun ku aceh baré luk sabpen maya' dalan luk petulu. Idi kudeng ineh luk ruen imam ku aceh dalan pedo' kuanneh, ngaceku sala'neh, pad ieh ngalap do' ratnan sala'.

¹¹ “Iamo' kudeng ieh na miak maré dueh suit sukur kian dueh suit limun lek, idi do' ieh nguit baré ngaceku sala'neh, tudu' lio banak, idi aleg ineh uen ngerabur ku umau idi umau luk do' buen, ngaceku ieh ineh baré ngaceku sala'neh.

¹² Idi do' ieh nguit ineh amé' nan imam, idi imam ngalap sengeragam ku babpat luk barén idi sabpenneh luun bubpun, dengan baré luk sabpen kuan Tuhan. Ieh ineh baré ngaceku sala'.

¹³ Idi kudeng ineh imam nganau' luk inan pedo' kuan lemulun ineh ngaceku sala'neh, pad ieh ngalap do' ratnan sala'. Idi luk teceh ineh babpat imam mepad kudeng baré akan teh.”

Baré Luk Pingetap

¹⁴ Kebala Tuhan ni Musa,

¹⁵ “Kudeng seburur lemulun na maré baré luk petulu kuan Tuhan, pad ieh mesala', iamo' na sala' ineh inau' rungen, idi do' ieh maré nan Tuhan aceh dumba deléi, kian amék lek, luk do', ku ngetap baré luk na biré atun. Idi do' ngeletep raga dumba ineh maya' balad pirak Su luk Meligan ineh.

¹⁶ Idi do' ieh mayar raga baré luk na biréneh atun ineh, perapu dengan sebabpat limeh, idi do' ieh maré ineh nan imam. Idi imam ineh nganau' luk inan pedo' kuanneh, idi maré dumba ineh ngaceku sala'neh, pad ieh ngalap do' ratnan sala'.

¹⁷ “Idi kudeng seburur lemulun mesala' ngaceku ieh nganau' luk bibpeng Tuhan na miak ruen, iamo' na sala' ineh inau' rungen, ieh mesala' peh, idi ieh teh mabeh ineh.

¹⁸ Idi do' ieh nguit amé' nan imam aceh dumba deléi, kian amék lek luk do', mangun ku baré luk pingetap. Idi do' ngeletep raga dumba ineh maya' balad pirak Su luk Meligan. Idi imam ineh nganau' luk inan pedo' kuanneh, idi maré dumba ineh ngaceku sala'neh, pad ieh ngalap do' ratnan sala'.

¹⁹ Ieh ineh baré luk pingetap ngaceku sala' luk inau'neh pa kiung Tuhan.”