UKUM 4 - BALA LUK DO'

Baré Ngaceku Sala' Luk Na Inau' Rungen

¹ Kebala Tuhan ni Musa,

² “Kudeng idé rat arang lun Israil mesala' ngaceku ieh nganau' luk bibpeng Tuhan na miak ruen, iamo' na sala' ineh inau' rungen, do' ieh maya' lawé ini.

³ “Kudeng Imam Rayeh pangeh mesala' pad ieh ngacing sala' kuan lun mula', do' ieh maré aceh sapi' deléi luk pegawa' luk do', mangun ku baré kuan Tuhan ngaceku sala'neh.

⁴ Idi do' ieh nguit sapi' deléi ine amé' pa atun tanga' Lepo su luk inan papu' Tuhan. Idi do' ieh ngerareng ticu'neh luun uluh sapi' ineh, idi ngeret neneh pa kiung Tuhan.

⁵ Idi do' Imam Rayeh ineh ngalap sebuang dara' sapi' ineh idi nguit ineh amé' bang Lepo ineh.

⁶ Idi do' ieh ngerereb bua' ticu'neh bang dara' ineh tudu' kua' idi ngisak ineh, pa atun dicing Su luk Meligan ineh.

⁷ Idi do' ieh nganau' sebuang dara' ineh nan unga méja luk inan ngeseb umau luk do' buen luk bang Lepo su luk inan papu' Tuhan. Idi do' ieh ngutang dara' luk ketecan ineh luun kukud bubpun su luk inan maré luk sabpen, luk pa atun tanga' Lepo ineh.

⁸ Idi do' ieh ngalap amung lemak luk luun sapi' ineh, ieh ineh linuapneh idi amung lemak luk luun tinéi'neh,

⁹ idi dueh beterneh idi amung lemak luk luunneh, idi babpat luk meluun do' ratnan aténeh.

¹⁰ Idi amung lemak ineh sabpen imam luun bubpun su luk inan maré luk sabpen ineh, mepad kudeng lawéneh ngeseb lemak pung luk kirat ku baré luk nguit pedo'.

¹¹ Iamo' kubil sapi' deléi ineh, idi amung uangneh perapu dengan uluhneh, kukudneh, tinéi'neh, idi téi'neh,

¹² amung ineh itenneh remuat rat su luk inandeh nelupo, amé' su luk meligan, idi su luk inan lun nala' abuh. Idi do' amung ineh sabpen su ineh.

¹³ “Idi kudeng amung lun Israil mesala' ngaceku ideh nganau' luk bibpeng Tuhan na miak ruen, iamo' na sala' ineh inau' rungen;

¹⁴ kareb sala' ineh megala' kuandeh, idi do' lun mula' ineh maré aceh sapi' deléi luk pegawa' mangun ku baré ngaceku sala', idi do' ideh nguit neneh pa atun Lepo su luk inan papu' Tuhan.

¹⁵ Idi do' amung lun rayeh-rayeh lun Israil ineh ngerareng ticu'deh luun uluh sapi' ineh idi ngeret neneh su ineh.

¹⁶ Idi do' Imam Rayeh nguit sebuang dara' sapi' ineh amé' bang Lepo su luk inan papu' Tuhan.

¹⁷ Idi do' ieh ngerereb bua' ticu'neh bang dara' ineh tudu' kua', idi ngisak ineh pa atun dicing ineh.

¹⁸ Idi do' ieh nganau' sebuang dara' ineh nan unga méja luk inan ngeseb umau luk do' buen luk bang Lepo su luk inan papu' Tuhan. Idi do' ieh ngutang dara' luk ketecan ineh luun kukud bubpun su luk inan maré luk sabpen, luk pa atun tanga' Lepo ineh.

¹⁹ Idi do' ieh ngalap amung lemakneh idi ngeseb ineh luun bubpun.

²⁰ Idi lawéneh dengan sapi' ini mepad kudeng luk pangeh inau' nan sapi' luk biré ngaceku sala' ineh. Kudeng ineh lawéneh imam nganau' luk nguit pedo' kuan lun mula', pad ideh miak ngalap do' ratnan sala'.

²¹ Pangeh ineh do' ieh nguit sapi' ineh remuat rat su luk inandeh nelupo, idi ngeseb neneh mepad kudeng sapi' luk iseb ngaceku sala'neh sebuleng. Idi ini mangun ku aceh baré ngaceku sala' lun mula'.

²² “Idi kudeng seburur lun rayeh mesala' ngaceku ieh nganau' luk bibpeng Tuhan na miak ruen, iamo' na sala' ineh inau' rungen;

²³ kareb sala' ineh megala' kuanneh, idi do' ieh nguit aceh amék deléi luk do' mangun ku baréneh.

²⁴ Idi do' ieh ngerareng ticu'neh luun uluhneh idi ngeret neneh iring bubpun su luk inan ngeret baré luk sabpen pa kiung Tuhan. Ieh ineh baré ngaceku sala'.

²⁵ Idi do' imam ngerereb bua' ticu'neh bang dara' amék, idi do' ieh ngisit ineh luun amung unga bubpun. Idi do' ieh ngutang dara' luk ketecan ineh luun kukud bubpun.

²⁶ Idi do' ieh ngeseb amung lemakneh luun bubpun, mepad kudeng lemak ratnan baré luk nguit pedo' ineh. Kudeng ineh lawéneh imam nganau' luk nguit pedo' kuan lun rayeh ineh, pad ieh ngalap do' ratnan sala'.

²⁷ “Idi kudeng seburur lemun rat arang lun mula' mesala' ngaceku ieh nganau' luk bibpeng Tuhan na miak ruen, iamo' na sala' ineh inau' rungen;

²⁸ kareb sala' ineh megala' kuanneh, idi do' ieh nguit aceh amék tineh luk do' mangun ku baréneh.

²⁹ Idi do' ieh ngerareng ticu'neh luun uluhneh, idi ngeret neneh iring bubpun su luk inan ngeret baré luk sabpen.

³⁰ Idi do' imam ngerereb bua' ticu'neh bang dara' amék ineh, idi do' ieh ngisit ineh luun amung unga méja luk inan ngeseb umau luk do' buen. Idi do' ieh ngutang dara' luk ketecan luun kukud bubpun ineh.

³¹ Idi do' ieh ngalap amung lemakneh, mepad kudeng imam nengalap lemak ratnan baré luk nguit pedo'. Idi do' lemak ineh sabpen imam luun bubpun, idi mangun ku luk do' buen kuan Tuhan. Kudeng ineh lawéneh imam nganau' luk nguit pedo' ngaceku sala' lemulun ineh, idi ieh miak ngalap do' ratnan sala'.

³² “Idi kudeng aceh dumba barénneh ngaceku sala'neh, do' ieh maré aceh tineh luk do'.

³³ Idi do' ieh ngerareng ticu'neh luun uluhneh, idi ngeret neneh iring bubpun su luk inan maré luk sabpen ineh.

³⁴ Idi do' imam ngerereb bua' ticu'neh bang dara' dumba ineh, idi do' ieh ngisit ineh luun amung unga bubpun. Idi do' ieh ngutang amung dara' luk ketacan luun kukud bubpun ineh.

³⁵ Idi do' ieh ngalap amung lemakneh, mepad kudeng imam nengalap lemak dumba ratnan baré luk nguit pedo'. Idi do' lemak ineh sabpen imam luun bubpun, ieh ineh dengan amung-amung baré luk sabpen kuan Tuhan. Kudeng ineh lawéneh imam nganau' luk nguit pedo' ngaceku sala' lemulun ineh, idi ieh miak ngalap do' ratnan sala'.