UKUM 27 - BALA LUK DO'

Ukum-Ukum Ratnan Baré Kuan Tuhan

¹ Kebala Tuhan ni Musa,

² “Do' mada' kuan amung lun Israil kudeng ini: Kudeng selemulun pejani' maré raga seburur lemulun kuan Tuhan, do' maya' raga luk litep ini:

³ Idi raga seburur deléi luk dueh ngepulu' lak ulunneh, ieh ineh limeh ngepulu' balad pirak.

⁴ Idi kudeng seburur decur, raganeh teluh ngepulu' balad pirak,

⁵ idi kudeng lun ineh limeh lak macing dueh ngepulu' lak ulunneh, raga seburur deléi dueh ngepulu' balad pirak, idi seburur decur pulu' balad pirak.

⁶ Idi kudeng anak deléi ulunneh sebulan macing limeh lak, raganeh limeh balad pirak, idi decur teluh balad pirak.

⁷ Idi kudeng deléi mela anem ngepulu' lak, raganeh pulu' limeh balad pirak, idi decur pulu' balad pirak.

⁸ Iamo' kudeng lemulun ineh masi' idi na miak mayar raga luk pangeh litep, do' ieh amé' matun imam dengan lemulun luk pijani'neh ineh, idi imam miak nganau' raganeh maya' asi' lun luk nepejani' ineh.

⁹ “Idi kudeng aya' luk biré lun inan Tuhan ku baré, anun-anun luk biré inan Tuhan kudeng ineh, ieh ineh meligan.

¹⁰ Na ieh miak libalenneh, luk do' ku luk dat, idi luk dat ku luk do'. Iamo' kudeng luk pangeh pijani'neh pangeh linibalneh, idi didueh barén kuan Tuhan.

¹¹ Idi kudeng aceh aya' luk ku gani' luk na miak barén lun kuan Tuhan, idi do' nated aya' ineh pa kiung imam.

¹² Idi imam miak nganau' raganeh maya' dat idi do'neh, idi raga luk inau' imam, ieh ineh luk lutep.

¹³ Idi kudeng lemulun ineh nguli' neneh, kali' rungen ieh naduk neneh sebabpat limeh mela ratnan raganeh.

¹⁴ “Idi kudeng selemulun maré ruma'neh ku aceh ruma' luk meligan kuan Tuhan, do' imam nganau' raganeh maya' do' idi datneh, idi raga luk inau' imam, ieh ineh luk lutep.

¹⁵ Idi kudeng lemulun ineh sikal nguli' ruma'neh, do' ieh naduk ineh sebabpat limeh mela ratnan raganeh. Idi ruma' ineh mangun ku babpatneh péh.

¹⁶ “Idi kudeng aceh lemulun maré inan Tuhan aceh babpat ratnan tana'neh, idi do' raganeh maya' kinula' pimaraneh, ieh ineh limeh ngepulu' gatang pimara, limeh ngepulu' balad pirak.

¹⁷ Kudeng ieh maré tana'neh ngimun rat Lak luk Kelimeh Ngepulu', raganeh maya' luk litep.

¹⁸ Idi kudeng ieh maré tana' ineh muci ratnan Lak luk Kelimeh Ngepulu', idi do' imam nganau' raganeh maya' kinula' lakneh macing Lak luk Kelimeh Ngepulu' ineh, idi raganeh miak uen ngurang.

¹⁹ Idi kudeng lun luk pangeh nemaré tana' ineh pian nguli' ineh, do' ieh naduk usin raganeh dengan sebabpat limeh.

²⁰ Idi kudeng ieh na nguli' tana'neh ineh, kian kudeng ieh pangeh nemasui tana' ineh nelun baken, idi na ieh miak uen nguli' peh,

²¹ idi kareb Lak luk Kelimeh Ngepulu', tana' ineh kuan Tuhan. Idi ineh mangun ku babpat imam.

²² Idi kudeng ieh maré kuan Tuhan aceh tana' luk pangeh bilihneh,

²³ idi do' imam nganau' raganeh maya' kinula' lakneh macing Lak luk Kelimeh Ngepulu'. Idi do' ieh maré raga luk litep aco sineh. Idi usin ineh kuan Tuhan.

²⁴ Idi kareb Lak luk Kelimeh Ngepulu' miak tana' ineh uen ngelubed kuan lemulun luk nemasui ineh, ieh ineh kuan lemulun luk kuan babpat tana' ineh.

²⁵ Idi amung raga luk litepmu ineh do' ieh maya' balad pirak Su luk Meligan.

²⁶ “Iamo' amung anak aya' muyuh luk tinganak pun-pun kuan Tuhan aleg seburur pana' maré ineh ku baré, do' sapi', amék, idi dumba, ngaceku Tuhan mo' luk kuan nedeh.

²⁷ Iamo' kudeng ieh aya' luk ku gani', idi miak ieh uen nguli' maya' raga luk litep. Idi do' ieh naduk neneh dengan sebabpat limeh. Idi kudeng ieh na inuli' miak ieh pisuen maya' raganeh.

Amung Luk Litep Uen Ngatad

²⁸ “Iamo' amung luk pangeh litep uen ngatad kuan Tuhan ratnan amung babpatneh, do' lemulun, aya', idi tana' pana', ieh ineh na miak pisuen idi uen nguli'. Amung ineh litep kuan Tuhan.

²⁹ Amung luk litep uen ngatad ratnan lemulun, ieh ineh na miak uen nguli'. Na miak na ieh ineh pitayen peh.

³⁰ “Idi amung babpat pulu' uli' tana', do' padé idi bua' pana' Tuhan kuan.

³¹ Iamo' kudeng selemulun pian nguli' aceh babpat pulu'neh, do' ieh naduk raganeh dengan sebabpat limeh.

³² Idi amung babpat pulu' ratnan sapi', amék idi dumba, amung luk iapin lun matar aya' ineh, babpat pulu' ineh Tuhan kuan.

³³ Aleg ieh mili' ratnan luk do' idi luk dat. Idi teh aleg ieh ngelibal neneh. Iamo' kudeng ieh ngelibal ineh do' ieh ngatad nedidueh kuan Tuhan, do' nekungelibal idi luk linibal teh. Aleg ieh ineh uen nguli'.’ ”

³⁴ Idi amung ini bada' Tuhan luk biréNeh kuan Musa déi luun Pegkung Sinai luk uen ngacing kuan amung lun Israil.