UKUM 25 - BALA LUK DO'

Lak Luk Ketudu'

¹ Kebala Tuhan ni Musa luun Pegkung Sinai,

² “Mada' kuan amung lun Israil kudeng ini: Kareb muyuh semuet bang bawang luk pian barénKu nemuyuh, idi do' bawang ineh inan aceh kareb luk inan ucu' kuan Tuhan.

³ Anem lak kinioneh do' muyuh nibu lati' muyuh, idi anem lak kinioneh do' muyuh nutu' angat anggur muyuh, idi ngamung uli' tana' ineh.

⁴ Iamo' lak luk ketudu' aceh kareb luk inan ucu' luk meligan kuan bawang ineh. Ieh ineh aceh kareb luk inan mudeng kuan Tuhan. Idi aleg muyuh nibu lati' muyuh idi nutu' angat anggur muyuh.

⁵ Idi atab luk mulun ratnan luk piranih muyuh aleg ngeranih. Idi bua' anggur muyuh luk na tinutu' aleg muyuh ngalap. Idi do' lak ineh mangun ku kareb luk inan ucu' luk meligan kuan bawang ineh.

⁶ Idi uli' tana' muyuh kareb ineh mangun ku akan kuan muyuh, demulun muyuh luk deléi idi decur, lun tebarin muyuh, idi lun sakai, ieh ineh amung-amung luk tudo bang ruma' muyuh,

⁷ idi teh pung muyuh luk melayo, idi amung pung luk meliput luk luun tana' muyuh. Amung uli' tana' ineh mangun ku akandeh.

Lak Luk Kelimeh Ngepulu'

⁸ “Idi teh do' muyuh ngiap tudu' kua' tudu' lak. Kinula'neh apat ngepulu' iwa' lak.

⁹ Idi bulan luk ketudu', pulu' aco bulan ineh, ieh ineh aco luk nguit pedo', do' muyuh ngiup serupit libut-libut bawang muyuh.

¹⁰ Idi lak luk kelimeh ngepulu' ineh do' muyuh ngeligan, idi mada' puit bang bawang muyuh kuan amung lun Israil. Ieh ineh mangun ku aceh Lak luk Kelimeh Ngepulu' kuan muyuh. Na miak na anid-anid burur lun Israil lemubed amé' inan babpatneh sebuleng idi amé' inan inul pupuneh.

¹¹ Ngaceku ineh aleg muyuh nganau' lati'. Idi aleg muyuh ngeranih padé luk ketecan. Idi aleg muyuh ngalap bua' anggur ratnan lawa luk na tinutu'.

¹² Idi do' muyuh ngeligan lak ineh. Idi anun uli' ratnan atab lati' muyuh ineh do' muyuh kuman.

¹³ “Idi Lak luk Kelimeh Ngepulu' ineh, do' anid-anid muyuh muli' amé' inan babpat tana'neh, sagan pana' pangeh pinasui.

¹⁴ Idi ngaceku ineh kudeng muyuh masui tana' kuan lun dengan muyuh, kian muyuh melih rat nelun dengan muyuh, aleg muyuh muyok seburur dengan seburur.

¹⁵ Do' ngeletep raga tana' maya' iap lak luk muci ratnan Lak luk Kelimeh Ngepulu' ineh, dengan ngerawé uli' tana' ineh.

¹⁶ Maya' kinula' lakneh do' muyuh ngula' belihneh, maya' kiasi' lakneh do' muyuh ngetanga' belihneh, ngaceku maya' iap uli'neh luk pisuenneh nemuyuh.

¹⁷ Aleg muyuh muyok seburur dengan seburur. Iamo' do' muyuh matot nan Allah muyuh. Ngaceku Ui ini Tuhan Allah muyuh.

Ratnan Akan Kuan Lak Luk Ketudu'

¹⁸ “Do' muyuh maya' amung ukumKu idi nginita amung balaKu idi nganau' luk petulu, pad muyuh lutep tudo bang bawang ineh.

¹⁹ Idi tana' ineh pana' maré uli'neh, idi muyuh kuman uli' ineh pad mebor. Idi muyuh do' udeng.

²⁰ “Idi kudeng inan lun ngitun, ‘Anunké luk kenen kai lak luk ketudu' ineh, ngaceku kai na nganau' lati'?’

²¹ kali' rungen Ui maré peruan kuan muyuh bang lak luk keanem ineh, pad ieh ngeruat uli' luk mula' kuan muyuh, luk petap kuan teluh lak.

²² Idi lak luk kewaluh inan teh akan kuan muyuh ratnan uli' luk atun ineh macing lak luk keiwa'. Idi muyuh kuman luk mon ineh pad uli' luk mebaruh ineh perinien.

Ratnan Masui Tana' Idi Ruma'

²³ “Idi ngaceku ineh aleg masui tana' ineh ruked-ruked, ngaceku tana' ineh Ui kuan. Idi muyuh lun sakai idi lun luk tudo denganKu.

²⁴ Idi aput bawang muyuh, do' nima' tana' ineh uen nguli'.

²⁵ “Idi kudeng kinanakmu masi', pad ieh masui anun-anun ratnan babpatneh, do' pupuneh luk muneng amé' nguli' luk pangeh pinasui kinanakneh ineh.

²⁶ Idi kudeng ayuneh selemulun na luk ku nguli', iamo' muci inan luk apenneh luk petap ku nguli' babpatneh,

²⁷ idi do' ieh ngiap amung lak rat tana' ineh pangeh pinasui, pad ieh ngelubed elaneh kuan lun ineh luk pangeh nemelih ineh rat neneh. Pangeh ineh miak tana' ineh lemubed kuanneh.

²⁸ Iamo' kudeng ieh na inan petap luk ku nguli' ineh kuanneh, idi tana' luk pinasuineh ineh, do' ieh itin lun luk nemelih ineh macing Lak luk Kelimeh Ngepulu' ineh. Iamo' bang lak ineh tana' ineh libacen kuanneh.

²⁹ “Kudeng selemulun masui ruma' bang bawang luk inar meraben, idi miak ieh uen nguli' bang lak ineh teh.

³⁰ Iamo' kudeng ruma' ineh na uen nguli' bang lak ineh, idi ruma' luk bang ar luk meraben ineh mangun ku babpat lemulun luk nemelih ineh macing ruked-ruked. Idi na ieh miak libacen bang Lak luk Kelimeh Ngepulu' ineh.

³¹ Iamo' ruma'-ruma' luk na inar meraben ineh, mepad kudeng tana' luk ku lati' teh. Miak ieh uen nguli' sen. Iamo' kareb Lak luk Kelimeh Ngepulu' na miak na ruma' ineh libacen.

³² Iamo' amung bawang lun Liwi ineh, idi amung ruma' luk bang bawangdeh, idan-idan pana' miak teh uen nguli'.

³³ Kudeng seburur lun Liwi na nguli' ruma'neh, kali rungen ruma' luk pinasui bang bawangdeh ineh libacen teh bang Lak luk Kelimeh Ngepulu'. Ngaceku amung ruma' bang bawang-bawang lun Liwi ineh ku babpatdeh macing ku anak inul déi' bawang Israil.

³⁴ Iamo' tana' luk libut-libut bawang luk inandeh mudeng na miak uen masui, ngaceku ineh babpatdeh macing ruked-ruked.

Ratnan Usin Luk Kebiten Lun Masi'

³⁵ “Kudeng kinanakmu masi', idi na ieh miak tebawang denganmu, do' iko ngedengan neneh, mepad kudeng lun sakai luk mudeng arang muyuh, pad ieh miak mulun denganmu.

³⁶ Idi aleg iko ngalap rat neneh bunga' usin idi elaneh teh, iamo' do' iko matot inan Allahmu pad kinanakmu pana' lutep denganmu.

³⁷ Aleg iko maré usinmu neneh idi ngalap bunga'neh, idi luk kenenmu pana' aleg iko maré neneh dengan ngalap mula' ua'neh.

³⁸ Ini ukum Tuhan Allah muyuh, luk pangeh nenated nemuyuh remuat rat bang bawang Masir, pad Ui maré bawang Kanaan kuan muyuh, idi Ui mangun ku Allah muyuh.

Puit Demulun

³⁹ “Idi kudeng kinanakmu luk denganmu ineh masi', idi ieh masui bururneh kuanmu, aleg iko ngecuk neneh ngakem mepad kudeng demulunmu.

⁴⁰ Iamo' do' ieh mudeng denganmu mepad kudeng lun tebarin, idi ngakem kuanmu pad macing Lak luk Kelimeh Ngepulu' ineh.

⁴¹ Idi do' ieh patad rat namu, dengan anak-anakneh pana', idi ieh miak lemubed amé' inan pupuneh idi babpat tamanneh.

⁴² Ngaceku ideh ineh demulunKu, luk inuitKu remuat rat bang bawang Masir. Ngaceku ineh aleg masui nedeh.

⁴³ Idi aleg iko ngimet nedeh dengan megateh niat. Iamo' do' iko matot inan Allahmu.

⁴⁴ Iamo' muyuh miak melih demulun luk deléi idi decur ratnan pupu baken luk tudo libut-libut bawang muyuh.

⁴⁵ Kudeng ineh teh muyuh miak melih anak-anak lun sakai luk tudo arang muyuh, idi anak-anak ineh luk tinganak bang bawang muyuh miak mangun ku babpat muyuh.

⁴⁶ Idi miak muyuh ngiap nedeh mangun ku lun duken anak-anak muyuh ruked ulundeh. Iamo' aleg muyuh ngedereh pupu muyuh lun Israil ineh.

⁴⁷ “Idi kudeng seburur lun sakai kian lun tebarinmu pangeh nengalap mula' binaweh, idi kinanakmu ineh masi' pad ieh masui bururneh kuan lun sakai kian lun tebarinmu ineh lek,

⁴⁸ pangeh ieh masui bururneh miak ieh uen nguli'. Kinanakneh,

⁴⁹ taman pinakenneh, anak deléi taman pinakenneh, idi pupuneh luk muneng miak nguli' neneh. Kudeng ieh sebuleng inan petap binaweh, do' ieh nguli' bururneh sebuleng.

⁵⁰ Idi do' ieh ngiap dengan lun luk pangeh nemelih neneh rat lak luk inanneh nemasui bururneh macing Lak luk Kelimeh Ngepulu' ineh. Idi usin luk ku nguli' ineh maya' kinula' lak ineh, idi aco luk inanneh tudo dengan lun luk nemelih neneh ruen ngiap mepad kudeng kekamen lun tebarin.

^51-52 Idi kudeng inan tuda'-tuda' lak ketecan macing Lak luk Kelimeh Ngepulu' ineh, do' ieh ngelubed usin maya' kinula' luk nekumelih neneh mangun ku uli'neh, idi petulu dengan lak ineh.

⁵³ Do' ieh tudo denganneh mepad kudeng lun tebarinneh anid-anid lak. Idi aleg ngedereh neneh.

⁵⁴ Kudeng ieh na inuli' dengan dalan luk kudeng ineh, idi kareb Lak luk Kelimeh Ngepulu' ieh miak puatin dengan anak-anakneh pana'.

⁵⁵ Lun Israil ineh demulunKu, ieh ineh demulun luk inuitKu remuat rat bang bawang Masir. Ui ini Tuhan Allahdeh.