UKUM 24 - BALA LUK DO'

Ratnan Ngasa' Lapung

¹ Kebala Tuhan ni Musa,

² “Ngecuk nelun Israil ineh nguit amé' namu umau saitun luk tipeh idi metaro ruen bang amung-amung lapung, pad amung lapung ineh miak mulun kidi-kidi.

³ Idi do' Arun temina' ku amung lapung ineh bal dicing luk pa atun Pati' Pejani' ineh luk bang Su luk Meluun Ligan, rat malem macing pekak pa kiung Tuhan. Idi ini aceh ukum luk meruked.

⁴ Idi do' Arun temina' ku amung lapung ineh luk luun kukudneh luk ratnan amas luk tinuno, pa kiung Tuhan kidi-kidi.

Ruti Luk Barén Kuan Allah

⁵ “Idi do' iko ngalap anem gatang banak idi nganau' ineh ku ruti pulu' dueh balad.

⁶ Idi do' iko ngerareng ruti ineh pa kiung Tuhan luun méja amas luk tinuno, dengan dueh atur, ieh ineh anem balad ruti seatur.

⁷ Idi pa luun dueh atur ineh do' ngerareng umau luk do' buen luk meligan mangun ku aceh terawé ratnan ruti ineh, ieh ineh aceh baré akan kuan Tuhan.

⁸ Idi anid-anid Aco luk inan Mudeng, do' Arun temina' ku ineh pa kiung Tuhan kidi-kidi. Idi ineh mangun kuan lun Israil ku aceh pejani' luk ruked-ruked.

⁹ Idi ruti ineh mangun ku babpat Arun idi anak-anakneh, idi miak kenendeh bang aceh su luk meligan. Ngaceku ineh luk meluun ligan kuanneh ratnan amung baré luk sabpen kuan Tuhan. Idi ini aceh ukum luk meruked.”

Ukum Kuan Lemulun Luk Nguyo Ngadan Tuhan

¹⁰ Idi inan aceh deléi, tinanneh lun Israil, tamanneh lun Masir, idi ieh nacing arang lun Israil. Idi ieh nepekedaluh inan aceh lun Israil su luk inandeh nelupo.

¹¹ Idi ieh nenguyo ngadan Tuhan ineh dengan kediman teh. Idi ideh nenguit neneh iné' papu' ni Musa. Idi ngadan tinanneh Selomit Dibri ratnan inul Dan.

¹² Idi ideh nenipa neneh bang tutup pad ideh kali' pian Tuhan.

¹³ Kebala Tuhan ni Musa,

¹⁴ “Nguit lemulun luk nguyo ineh remuat rat su luk inandeh nelupo. Do' amung lun luk pangeh neninger neneh ineh ngerareng ticu'deh luun uluhneh, idi do' lun mula' mitung neneh ku batu.

¹⁵ Idi teh mada' kuan lun Israil: Idé-idé luk nguyo Allahneh, ieh miak mabeh sala'neh,

¹⁶ idi miak pitayen. Do' lun sakai idi lun kuan bawang, bitungin ku batu kudeng ieh nguyo ngadan Tuhan.

¹⁷ “Idé-idé luk ngaté aceh lemulun miak pitayen.

¹⁸ Idi idé-idé luk ngaté pung lun baken, ieh miak maré libalneh, pung libal pung.

¹⁹ “Idé-idé luk ngurat burur lun denganneh, idi maya' kudeng luk inau'neh, kudeng ineh teh luk miak ruen kuanneh,

²⁰ putul libal putul, mateh libal mateh, lipen libal lipen. Anun dat luk icingneh kuan burur lun baken, kudeng ineh teh luk ruen luun bururneh.

²¹ Idé-idé luk ngaté pung, ieh miak maré libalneh. Iamo' idé luk ngaté lemulun, ieh miak pitayen teh.

²² Idi ukum ini kuan amung muyuh, do' kuan lun sakai, idi lun kuan bawang, ngaceku Ui ini Tuhan Allah muyuh.”

²³ Idi Musa nengecuk nelun Israil, idi ideh nenguit lun luk nguyo ineh remuat rat su luk inandeh nelupo, idi nemitung neneh ku batu macing maté. Idi lun Israil nenganau' kudeng ineh maya' kudeng luk bida' Tuhan ni Musa.