UKUM 22 - BALA LUK DO'

Ratnan Baré Luk Meligan

¹ Kebala Tuhan ni Musa,

² “Mada' kuan Arun idi anak-anakneh, pad ideh matar do'-do' idi ngerayeh amung luk meligan ineh luk biré lun Israil kuanKu, pad ideh na ngedat ngadanKu luk meligan. Ui ini Tuhan.

³ Idé-idé ratnan inul muyuh luk amé' muneng iring repapeh luk meligan luk linigan lun Israil kuan Tuhan, kudeng ieh amé' kareb ieh melutak, idi lun ineh duken buro rat pa kiungKu. Ngaceku Ui ini Tuhan.

⁴ “Idi ratnan inul Arun amung lun luk mesusud kian mekebabpa', na miak kuman luk meligan, kareb nateh ieh nedo'. Kudeng ineh teh lemulun luk ngakem aceh luk ku gani', idi lemulun luk ngeruat luk ku nginul,

⁵ idi lemulun luk ngakem aceh pung luk tekamang luk ngelutak neneh, kian lemulun luk ngelutak neneh, maya' amung luk miak ku gani'.

⁶ Idi idé luk ngakem luk kudeng ineh, ieh mangun ku gani' macing aco macep. Aleg ieh kuman luk meligan kudeng nateh ieh nediu'.

⁷ Kareb aco pangeh macep, idi teh bururneh meligan. Pangeh ineh miak ieh kuman luk meligan ineh. Ngaceku ineh luk kenenneh.

⁸ Idi pung luk maté idi luk dirak pung baken ineh aleg ieh kuman, pad ieh na mangun melutak. Ngaceku Ui ini Tuhan.

⁹ “Kudeng ineh teh do' imam maya' ukumKu, pad ideh na mabeh sala' idi mate' ngaceku ngedat ngadanKu ineh. Ngaceku Ui ini Tuhan luk ngeligan nedeh.

Ratnan Luk Bibpeng Na Miak Kenen Lun Mula'

¹⁰ “Idi lun mula' na miak kuman luk meligan ineh, do' lun sakai idi lun tebarin imam pana'.

¹¹ Iamo' demulun imam luk bilihneh ku usinneh sebuleng miak kuman ineh. Kudeng ineh teh demulun luk tinganak bang ruma'neh.

¹² Iamo' anak decur imam, kudeng ieh inaweh lun baken, na ieh miak kuman luk barén ratnan luk meligan ineh.

¹³ Iamo' anak decur imam, kudeng ieh tinula', kian ligkan deléi idi na anak, pad ieh nuli' amé' ruma' tamanneh, mepad kudeng kareb ieh isuut, miak ieh kuman ratnan akan tamanneh. Iamo' lun baken na miak kuman ineh.

¹⁴ “Kudeng selemulun kuman ratnan luk meligan ineh dengan na kali', idi do' ieh maré libalneh sebabpat limeh mela ratnan luk kinanneh kuan imam.

¹⁵ Idi aleg imam-imam ngedat baré luk meligan ineh luk biré lun Israil kuan Tuhan,

¹⁶ pad ideh nima' nelun baken kuman barédeh luk meligan, pelé ideh mesala'. Ui ini Tuhan luk ngeligan nedeh.”

Ratnan Aya' Luk Barén Kuan Tuhan

¹⁷ Kebala Tuhan ni Musa,

¹⁸ “Mada' kuan Arun idi anak-anakneh, idi kuan amung lun Israil kudeng ini: Idé-idé rat bawang Israil, idi lun sakai luk tudo arang lun Israil, kudeng ideh maré aceh baré maya' kudeng luk pijani'neh, kian baré ratnan awing niat luk biréneh kuan Tuhan ku baré luk sabpen,

¹⁹ pad baré muyuh petulu kuan Tuhan, do' muyuh maré deléi luk na mebaké, ieh ineh sapi', dumba, kian amék lek.

²⁰ Aleg muyuh maré anun-anun luk dat, ngaceku ieh ineh na miak lapen Tuhan.

²¹ Idi kudeng selemulun maré kuan Tuhan aceh baré luk nguit pedo' pad ngacing pejani'neh kuan Tuhan, kian baré maya' awang niat, ratnan sapi', amék, kian dumba lek, idi do' ieh maré luk do', pad baréneh ineh lapen Tuhan.

²² Idi pung luk mebuser kian nebalang idi mekio', kian mét idi melusung, idi mepuruh, ineh na miak barén muyuh kuan Tuhan ku baré luk sabpen luun bubpun.

²³ Iamo' sapi' idi dumba luk pelaba rayeh idi pelaba isuut miak barén muyuh maya' awang niat muyuh. Iamo' na ieh petulu ku baré muyuh maya' jani'.

²⁴ Idi pung luk dat ngaceku ilung terurneh pirek, kian dicat, kian nebarut, kian kirat lek, aleg muyuh maré kuan Tuhan. Ngaceku ini pangeh bibpeng bang bawang muyuh.

²⁵ “Idi aleg maré pung luk pinasui lun sakai mangun ku baré akan Allah muyuh. Ngaceku pung ineh dat. Idi Tuhan na pian kudeng muyuh maré luk kudeng ineh.

^26-27 “Kudeng sapi' kian dumba idi amék pangeh tinganak, do' ieh mudeng dengan tinehneh tudu' aco kinioneh. Iamo' aco luk kewaluh miak ieh petulu ku baré luk sabpen kuan Tuhan.

²⁸ Iamo' aleg muyuh ngeret sapi' kian dumba perapu anakneh peranga' bang seaco.

²⁹ Idi kudeng muyuh maré inan Tuhan aceh baré ubur, do' muyuh maré ineh, pad ineh miak lapen Tuhan.

³⁰ Idi aco sineh do' ieh kenen. Aleg muyuh necan elaneh macing pekak kenebpa. Ui ini Tuhan.

³¹ “Idi do' muyuh maya' ukumKu. Ui ini Tuhan.

³² Idi aleg muyuh ngedat ngadanKu luk meligan ineh, idi Ui uen ngerayeh arang lun Israil. Ui ini Tuhan luk ngeligan nemuyuh,

³³ idi luk pangeh nenguit nemuyuh remuat rat bang bawang Masir, pad Ui mangun ku Allah muyuh. Ui ini Tuhan.”