UKUM 20 - BALA LUK DO'

Ukum Ngaceku Ngelaba Bala

¹ Kebala Tuhan ni Musa,

² “Mada' kuan amung lun Israil: Idé-idé rat arang lun Israil, idi lun sakai luk tudo arang lun Israil, luk maré anakdeh kuan Molek, lun ineh bitungin lun bang bawang ineh ku batu, pad ieh maté.

³ Ui museh tutu neneh, idi ieh dukenKu buro rat arang pupuneh. Ngaceku ieh nemaré anakneh luk atun kuan Molek, pian ngelutak Su inanKu luk Meligan, idi ngedat ngadanKu luk meligan.

⁴ Kudeng ayu lun bawang ineh sinakali' kareb lun ineh maré anakneh luk atun kuan Molek, pad ideh na ngaté neneh,

⁵ idi Ui museh tu-tu nelun ineh idi pupuneh. Idi Ui ngecuk neneh buro rat arang pupuneh, perapu dengan lemulun luk metebaya' ku kekamen Molek ineh, idi luk necan Tuhan.

⁶ “Kudeng selemulun amé' ngitun nelun luk mangun idi lun luk nawar ada', Ui museh tu-tu neneh, idi ieh dukenKu buro rat arang pupuneh.

⁷ Ngaceku ineh do' muyuh ngeligan burur muyuh, ngaceku Ui ni Tuhan Allah muyuh.

⁸ Idi do' muyuh maya' amung ukumKu. Ngaceku Ui ini Tuhan luk ngeligan nemuyuh.

⁹ “Idé-idé luk mulung idi ngediman tamanneh kian tinanneh lek, miak pitayen. Idi ieh mabeh dara'neh sebuleng.

¹⁰ “Idi kudeng seburur deléi pasét inan awan lun denganneh, na miak na didueh pitayen.

¹¹ Kudeng selemulun pamung rudap dengan awan tamanneh idi ngigu' tamanneh, na miak na didueh pitayen. Idi dara' ineh baben didueh sebuleng.

¹² Kudeng selemulun pasét inan awan anakneh na miak na didueh pitayen, ngaceku pasét nelun bang tetek ruma'neh. Idi dara' ineh baben didueh sebuleng.

¹³ Kudeng sedeléi pamung inan deléi, ieh ineh kudeng ayu decur, idi didueh nganau' aceh kekamen luk pelaba dat. Na miak na didueh pitayen. Idi dara' ineh baben didueh sebuleng.

¹⁴ Idi kudeng selemulun ngalap aceh decur perapu dengan tinanneh ku awanneh, ieh ineh kekamen luk dat. Na miak na ideh sabpen, pad na inan kekamen luk dat arang muyuh.

¹⁵ Kudeng aceh deléi pasét inan pung, na miak na ieh pitayen. Idi pung ineh pana' pitayen teh.

¹⁶ Kudeng sedecur pian pasét inan pung idi do' decur ineh idi pung ineh pana' pitayen. Idi dara' ineh baben didueh sebuleng.

¹⁷ “Kudeng selemulun ngalap kinanakneh luk decur, ieh ineh anak tamanneh kian anak tinanneh, idi do' didueh uen ngigu' pa kiung lun mula' idi duken buro. Ngaceku ieh nepasét nan kinanakneh luk decur idi sala' ineh babenneh sebuleng.

¹⁸ Idi kudeng selemulun pamung dengan decur kareb ieh macing bulan, idi do' didueh ineh duken buro rat arang pupu didueh, ngaceku didueh nengelaba bala ratnan ngeligan burur.

¹⁹ Idi teh aleg iko pasét inan tinan pinakenmu, ngaceku ieh ineh pasét nelun bang tetek ruma'mu sebuleng. Didueh sebuleng mabeh sala' didueh.

²⁰ Idi kudeng selemulun pasét inan awan taman pinakenneh, idi ieh ngigu' taman pinakenneh, idi didueh sebuleng miak mabeh sala' ineh idi miak maté dengan na inul.

²¹ Idi kudeng selemulun ngalap awan kinanakneh luk deléi, ieh ineh kekamen luk pelaba dat, idi ieh ngigu' kinanakneh. Idi didueh ineh na inul.”

²² Kebala Tuhan, “Do' muyuh maya' amung ukum bada'Ku, pad bawang su luk inanKu nated nemuyuh na nala' nemuyuh, pad muyuh tudo bang ineh.

²³ Idi aleg muyuh maya' lawé pupu luk uenKu ngusu rat pa kiung muyuh. Ngaceku ideh pangeh nenganau' amung ineh pad Ui mesukol ku ideh.

²⁴ Iamo' jani'Ku nemuyuh, ‘Muyuh miak ngalap bawang ini luk mebaleng luk barénKu nemuyuh. Ui ini Tuhan Allah muyuh luk pangeh ngatad nemuyuh ratnan amung pupu luk baken.

²⁵ Ngaceku ineh do' muyuh mili' arang pung luk do' dengan luk ku gani', idi rat arang suit luk do' dengan luk ku gani'. Idi aleg muyuh ngelutak burur muyuh ku pung kian suit, idi pung luk tekamang luun tana' luk pangeh itadKu ku gani' kuan muyuh.

²⁶ Idi do' muyuh mangun meligan kuanKu. Ngaceku Ui ini Tuhan luk Meluun Ligan. Idi Ui pangeh nengatad nemuyuh rat arang amung pupu luk baken ineh, pad muyuh mangun ku pupuKu.

²⁷ “Idi idé-idé rat arang muyuh, do' deléi idi decur, luk mileh mangun idi nawar ada' na miak na ieh pitayen. Do' ideh bitungin ku batu. Idi dara' ineh babendeh sebuleng.”