UKUM 19 - BALA LUK DO'

Ratnan Ulun Luk Meligan Idi Dalan Luk Mesiri

¹ Kebala Tuhan ni Musa,

² “Do' iko mada' kuan amung lun Israil kudeng ini: Do' muyuh meligan, ngaceku Ui ini Tuhan Allah muyuh luk meligan.

³ Idi do' anid-anid lemulun ngedita' taman-tinanneh, idi matar aco luk inanKu mudeng. Ui ini Tuhan Allah muyuh.

⁴ Aleg muyuh lumi ku akang-akang. Idi aleg muyuh nganau' akang pudut luk inurai. Ui ini Tuhan Allah muyuh.

⁵ “Idi kareb muyuh maré kuan Tuhan baré luk nguit pedo', do' muyuh maré ineh maya' bala Tuhan pad Ieh mawang niat nemuyuh.

⁶ Idi kareb aco luk inan muyuh maré ineh, kian kenebpa lek, do' ieh kenen. Iamo' luk ketecan macing kesoriak ineh, do' ieh sabpen amung.

⁷ Idi kudeng kesoriak muyuh kuman ineh, ieh ineh aceh dalan luk dat idi na petulu pa kiungKu.

⁸ Idi idé-idé luk kuman ineh, ieh ineh mabeh sala'neh, ngaceku ieh pangeh nengedat ligan Tuhan. Lemulun ineh miak duken buro rat arang pupuneh.

⁹ “Idi kareb muyuh ngeranih, aleg muyuh ngeranih macing iring lati' muyuh. Idi aleg muyuh ngamung luk neketecan ratnan perinien muyuh ineh.

¹⁰ Aleg muyuh mureg bua' anggur muyuh macing dueh kua', idi bua' luk neremurug ineh aleg muyuh ngamung. Iamo' do' muyuh nima' ineh ku babpat lun masi' idi lun sakai. Ui ini Tuhan Allah muyuh.

¹¹ “Aleg muyuh mano, idi aleg muyuh mebalih. Idi aleg muyuh naluk seburur dengan seburur.

¹² Aleg muyuh pebulung ku ngadanKu pad naluk seburur lemulun. Ngaceku kudeng ineh muyuh ngedat ngadan Allah muyuh. Ui ini Tuhan.

¹³ “Aleg iko ngedereh nelun denganmu idi ngaro binawehneh. Aleg maleh tabpar lun tebarinmu macing pekak nebpa.

¹⁴ Aleg iko mulung lun luk mebengel, idi aleg ngerareng luk inan metebaceng pa atun lun mebuser. Iamo' do' iko matot inan Allahmu. Ui ini Tuhan.

¹⁵ “Aleg mutut besara' dengan na mesiri, idi aleg ngerurum nelun dat idi lun do' kareb iko mutut besara'deh. Iamo' do' iko mutut besara' lun denganmu dengan mepad.

¹⁶ Aleg iko nalan amé' ngeruma' arang pupumu mepad kudeng lun luk ngatum bala. Idi aleg iko ngalap peruan ku até lun denganmu. Ui ini Tuhan.

¹⁷ “Idi aleg megateh niat inan kinanakmu. Iamo' do' iko mada' nelun denganmu dengan gala'-gala', pad iko na mabeh sala' ngaceku ieh.

¹⁸ Aleg iko ngua' luk dat idi tekedamut inan pupumu. Iamo' do' iko méi' nelun denganmu mepad kudeng bururmu sebuleng. Ui ini Tuhan.

¹⁹ “Do' muyuh maya' ukumKu. Aleg muyuh nima' aya' muyuh ngebaneh pung luk baken. Idi aleg muyuh ngisak lati' muyuh ku dueh ayu ilung. Aleg muyuh ngayung ku ayung tebaruh luk dueh ayu nuper.

²⁰ “Idi kudeng selemulun pesipu dengan aceh decur luk demulun idi luk pangeh tinuduk kuan lun baken, iamo' na ieh inuli' idi pinuit, idi do' didueh inan pegayam idi besara'. Iamo' aleg ngaté nedidueh, ngaceku na ieh pinuit.

²¹ Idi do' deléi ineh maré aceh dumba deléi kuan Tuhan ku baré luk pingetap pa atun tanga' Lepo su luk inan papu' Tuhan.

²² Idi do' imam nganau' luk nguit pedo' kuanneh. Dumba deléi ineh barén ku baré luk pingetap pa kiung Tuhan, ngaceku sala'neh ineh. Idi Tuhan miak maré do' neneh.

²³ “Kareb muyuh semuet bang bawang Kanaan, idi muyuh nibu puar-puar bua', idi do' bua' ineh mangun ku ali' teluh lak kinioneh, idi na miak kenen.

²⁴ Idi kareb lak luk keapat amung bua'neh meligan, idi mangun ku baré ubur kuan Tuhan.

²⁵ Iamo' bang lak luk kelimeh miak muyuh kuman bua'neh, pad uli'neh amé' mula' kuan muyuh. Ui ini Tuhan Allah muyuh.

²⁶ “Aleg muyuh kuman uang luk inan dara'. Aleg muyuh mangun idi ngelimu'.

²⁷ Aleg muyuh ngiki abpuk muyuh pekelibut pad necan buduk uluh. Aleg muyuh nangal paped buluh ada muyuh.

²⁸ Aleg muyuh ngurat burur muyuh kareb lemulun maté. Idi aleg muyuh matik burur muyuh ku aceh arit. Ui ini Tuhan.

²⁹ “Aleg nima' anak muyuh luk decur mangun ku decur luk mesawa', pad bawang ineh na mepanu' ku sawa' idi kekamen luk meluun dat.

³⁰ Do' muyuh nginita aco luk inanKu mudeng idi ngedita' Su inanKu luk Meligan. Ui ini Tuhan.

³¹ “Idi aleg muyuh lumi inan lemulun luk mangun idi lemulun luk nawar ada'. Aleg muyuh nakap nedeh ineh, idi ngelutak burur muyuh ku ineh. Ui ini Tuhan Allah muyuh.

³² “Do' muyuh ngerayeh idi ngedita' lun luk mengered. Idi do' muyuh matot inan Allah muyuh. Ui ini Tuhan.

³³ “Kudeng aceh sakai tudo arang muyuh idi bang bawang muyuh, aleg muyuh mekuel nedeh.

³⁴ Nima' lun sakai luk tudo arang muyuh ineh siren muyuh mepad kudeng lun kuan bawang teh, idi méi' nedeh mepad kudeng muyuh méi kuan burur muyuh sebuleng. Ngaceku atun pana' muyuh lun sakai déi' bawang Masir. Ui ini Tuhan Allah muyuh.

³⁵ “Aleg muyuh ngisu' tari, uad, idi timang.

³⁶ Idi do' muyuh nganau' timang, betuh, idi uad luk matu. Ui ini Tuhan Allah muyuh, luk nenguit nemuyuh remuat rat bang bawang Masir.

³⁷ Ngaceku ineh do' muyuh maya' amung ukum idi balaKu. Ui ini Tuhan.”