UKUM 18 - BALA LUK DO'

Ukum-Ukum Ratnan Aweh Luk Meligan Idi Ratnan Luk Ngegani' Burur Lemulun

¹ Kebala Tuhan ni Musa,

² “Mada' iko kuan amung lun Israil kudeng ini: Ui ini Tuhan Allah muyuh.

³ Aleg muyuh maya' kekamen lun Masir, su luk inan muyuh tudo atun. Idi aleg muyuh maya', kekamen lun bawang Kanaan, su luk inanKu nguit nemuyuh.

⁴ Iamo' do' muyuh maya' amung ukumKu idi matar amung bada'Ku. Ui ini Tuhan Allah muyuh.

⁵ Idi do' muyuh matar amung bada'Ku idi amung ukumKu. Idé-idé luk nganau' luk kudeng ineh, ieh ineh mulun ngaceku ineh. Ui ini Tuhan.

⁶ “Seburur pana' aleg pelengit inan pupuneh luk muneng pian pasét neneh. Ui ini Tuhan.

⁷ Aleg iko pasét inan tinanmu idi ngigu' tamanmu, ngaceku ieh luk tinanmu. Aleg iko ngigu' neneh.

⁸ Aleg iko pasét inan awan tamanmu, ngaceku ieh pamung rudap dengan tamanmu.

⁹ Aleg iko pasét inan kinanak decurmu, ieh ineh anak tamanmu idi anak tinanmu, do' kieh tinganak bang rumamu, kian tinganak mado lek. Aleg iko ngigu' nedeh.

¹⁰ Aleg iko pasét inan mupunmu luk decur. Ngaceku ini luk ngigu' namu.

¹¹ Aleg iko pasét inan anak decur awan tamanmu luk tinganak kuan tamanmu, ngaceku ieh kinanakmu luk decur. Aleg iko ngigu' neneh.

¹² Aleg iko pasét inan kinanak decur tamanmu ngaceku ieh sebuleng dara' dengan tamanmu.

¹³ Aleg iko pasét inan kinanak decur tinanmu. Ngaceku ieh sebuleng dara' dengan tinanmu.

¹⁴ Aleg iko ngigu' kinanak deléi tamanmu ngaceku pasét inan awanneh. Ngaceku ieh tinan pinakenmu.

¹⁵ Aleg iko pasét inan ibanmu luk decur. Ngaceku ieh awan anakmu. Aleg iko ngigu' neneh.

¹⁶ Aleg iko pasét inan awam kinanakmu. Ngaceku ieh pamung rudap dengan kinanakmu.

¹⁷ Aleg iko ngalap aceh decur perapu ku anakneh. Aleg iko ngalap mupunneh, ngaceku ideh sebuleng dara' denganmu. Ineh mangun ku aceh gani' luk pelaba dat.

¹⁸ Idi aleg iko ngalap aceh decur kinanak awanmu ku awanmu, pad ieh temaruh, idi pamung neneh kareb awanmu mulun.

¹⁹ “Aleg iko pamung inan aceh decur kareb ieh macing bulan,

²⁰ idi aleg iko pesipu dengan awan lun denganmu, pad iko mangun melutak ku ieh.

²¹ Idi aleg iko maré aceh anakmu kuan akang Molek, idi ngedat ngadan Allahmu. Ngaceku Ui ini Tuhan.

²² Aleg iko pamung dengan aceh deléi maya' ayu decur. Ngaceku ieh ineh aceh dalan luk pelaba dat.

²³ Idi teh aleg iko ngegani' bururmu ngaceku pamung dengan pung. Idi seburur decur pana', aleg pamung dengan pung. Ngaceku ieh ineh aceh dalan luk pelaba dat.

²⁴ “Aleg muyuh ngegani' burur muyuh ratnan dalan luk kudeng ini. Ngaceku kekamen luk kudeng ineh ngegani' burur amung pupu baken luk dukenKu buro pa kiung muyuh.

²⁵ Kudeng ineh bawang linutakdeh, pad na miak na Ui ngua' amung datdeh ineh, pad bawang ineh nenguta' amung lun bang ineh.

²⁶ Iamo' do' muyuh matar amung bada'Ku idi amung ukumKu ini. Sesuut pana' ratnan dalan ini luk dat aleg muyuh nganau', do' lun kuan bawang idi lemulun luk tudo arang muyuh,

²⁷ (ngaceku amung dalan luk dat ini pangeh inau' lun bang bawang luk pa kiung muyuh ineh, idi bawang ineh pangeh linutakdeh),

²⁸ pad bawang ineh na nguta' nemuyuh ngaceku muyuh ngegani' neneh, mepad kudeng ieh pangeh nenguta' pupu luk atun ineh.

²⁹ Ngaceku kudeng idé luk nganau' aceh dalan luk kudeng ineh dat, ieh ineh duken buro rat arang pupuneh.

³⁰ “Ngaceku ineh do' muyuh matar balaKu. Aleg nganau' sebuleng pana' luk dat idi megani' luk pangeh inau' pupu luk atun rat nemuyuh. Idi aleg muyuh ngegani' burur muyuh ku ineh. Ui ini Tuhan Allah muyuh.”