UKUM 17 - BALA LUK DO'

Ratnan Ligan Ku Dara'

¹ Kebala Tuhan ni Musa,

² “Mada' kuan Arun idi anak-anakneh, idi kuan amung lun Israil pana' kudeng ini. Ini bala luk bida' Tuhan:

³ Idé-idé rat arang lun Israil luk ngeret aceh sapi', dumba, kian amék lek, do' su inan lun nelupo kian mado ratnan su inan nelupo teh,

⁴ idi na nguit ineh amé' pa atun tanga' Lepo su luk inan papu' Tuhan, ku aceh baré kuan Tuhan, idi kali' rungen dara'neh ruen lemulun ineh mabeh. Ngaceku ieh pangeh nengeruat dara'. Idi lun ineh pana' duken buro rat arang pupuneh.

⁵ Ilungneh ukum ineh pad lun Israil nguit kuan Tuhan baré luk keretendeh déi' liang, idi pad baré ineh itendeh amé' pa atun tanga' Lepo su luk inan papu' Tuhan idi baré kuan imam, idi barén inan Tuhan mangun ku baré luk nguit pedo'.

⁶ Idi dara'neh do' uen imam ngisak luun bubpun Tuhan luk pa atun tanga' lepo ineh. Idi do' ieh ngeseb lemakneh mangun ku luk do' buen kuan Tuhan.

⁷ Aleg ideh maré luk keretendeh ineh inan sétan luk binaya'deh dengan sétdeh. Idi ini mangun ku aceh dalan luk meruked kuandeh.

⁸ “Idé-idé rat arang lun Israil idi rat arang amung lun sakai luk mudeng arang muyuh, kareb ideh maré aceh baré sabpen kian baré kereten lek,

⁹ idi na ideh nguit ineh amé' pa atun tanga' Lepo su luk inan papu' Tuhan, pad ieh barén kuan Tuhan, idi lemulun ineh duken buro rat arang pupuneh.

¹⁰ “Idi idé-idé rat arang lun Israil, idi rat arang lun sakai luk tudo arangdeh, luk kuman luk medara', idi Ui museh neneh idi ngusu neneh rat arang pupuneh.

¹¹ Ngaceku ulun pudut luk inan uang ineh inan bang dara'neh. Idi Ui pangeh nengecuk nemuyuh ngutang dara' ineh luun bubpun, pad nganau' luk nguit pedo' kuan ulun muyuh. Ngaceku dara', ieh ineh luk nganau' luk nguit pedo'.

¹² Idi ngaceku ineh Ui pangeh nepebala kuan amung lun Israil ini, rat arang muyuh seburur pana' aleg kuman dara'. Idi aceh sakai pana' luk tudo arang muyuh aleg kuman dara' teh.

¹³ “Idi rat arang lun Israil idi rat arang lun sakai luk tudo arang muyuh, kudeng ieh amé' nganup, idi ngalap aceh pung, kian suit lek, luk miak kenen, do' nala' dara'neh idi do' mapen ineh ku tana'.

¹⁴ Ngaceku ulun anid-anid pudut luk inan uang, ieh ineh dara'neh. Ngaceku ineh Ui pangeh neperiteteng kuan lun Israil: Aleg muyuh kuman dara' aceh pudut pana'. Idé-idé luk kuman ineh, ieh miak duken buro.

¹⁵ Idi teh do' lun luk kuan bawang idi lun sakai luk kuman aceh butung kian pung luk dirak-dirak lek, do' ieh mupu' ayungneh, idi diu'. Idi ieh mangun ku gani' macing aco macep, pad ieh meligan.

¹⁶ Idi kudeng ieh na nganau' kudeng ineh, kali' rungen ieh mabeh sala'neh.”