UKUM 16 - BALA LUK DO'

Ratnan Aco Rayeh Luk Nguit Pedo'

¹ Kebala Tuhan ni Musa muci ratnan até dueh anak Arun luk pinaté kareb didueh nenguit apui luk na petulu pa kiung Tuhan,

² “Do' iko mada' kuan kinanakmu Arun, aleg ieh semuet bang Su luk Meluun Ligan, maya' pianneh, ieh ineh bal selipa alad dicing macing pa atun su luk nguit pedo' luk pa luun Pati' Pejani' ineh pad ieh na maté. Ngaceku Ui silagan bang laput pa luun kakeb luk nguit pedo' ineh.

³ Idi Arun miak semuet bang Su luk Meluun Ligan ineh kudeng ieh nguit binaweh ini: aceh sapi' deléi luk pegawa' barén ngaceku sala', idi sebuleng dumba deléi barén sabpen.

⁴ Idi do' ieh diu' idi ngayung ku ayung imam, ieh ineh kuyu', siduar, abet awa', idi sigar ratnan kibung pu luk meligan.

⁵ Idi do' lun Israil maré dueh amék deléi ku baré ngaceku sala', idi sebuleng dumba deléi barén sabpen.

⁶ “Idi do' Arun maré sapi' deléi barén ngaceku sala' bururneh sebuleng, pad nganau' luk nguit pedo' kuan bururneh sebuleng idi kuan uang ruma'neh pana'.

⁷ Idi do' ieh ngalap amék deléi luk dueh ineh, idi naped nedidueh pa kiung Tuhan pa atun tanga' Lepo su luk inan papu' Tuhan.

⁸ Idi do' Arun nganau' udi kuan dueh amék deléi ineh, seudi kuan Tuhan idi seudi kuan amék luk uen ngusu.

⁹ Do' Arun nguit amék deléi luk nepetulu ku udi kuan Tuhan, barénneh ngaceku sala'.

¹⁰ Iamo' amék deléi luk pangeh nepetulu udi ruen ngusu, do' ieh uen naped mulun pa kiung Tuhan pad nganau' luk nguit pedo', idi ideh ngusu amék deléi ineh, idi muit neneh déi' su luk ali-ali.

¹¹ “Kareb Arun maré sapi' deléi luk barén ngaceku sala' bururneh sebuleng idi uang ruma'neh pana',

¹² do' ieh ngalap su luk inan bareh panu' ku bareh apui ratnan bubpun, idi dueh ragam umau luk do' buen luk meluun do'. Idi amung ineh iten semuet bang Su luk Meluun Ligan.

¹³ Idi do' umau ineh ruen luun apui pa kiung Tuhan, idi rabpun umau ineh mapen kakeb luk nguit pedo' luk pa luun su luk inan Allah pejani', pad ieh na maté.

¹⁴ Idi do' ieh ngalap sebuang dara' sapi' deléi idi ngisak dara' ineh ku bua' ticu'neh tudu' kua' pa busat aco kakeb luk nguit pedo', idi pa atun kakeb luk nguit pedo' pana'.

¹⁵ “Pangeh ineh do' ieh ngeret amék deléi barén ngaceku sala' lun mula', idi do' ieh nguit dara' ineh semuet bang Su luk Meluun Ligan, idi ngisak ineh luun kakeb luk nguit pedo', idi pa atun Pati' Pejani', mepad kudeng luk inau'neh ku dara' sapi' ineh.

¹⁶ Kudeng ineh teh ieh nganau' luk nguit pedo' kuan Su luk Meluun Ligan ineh ngaceku gani' amung lun Israil, idi ngaceku amung datdeh, idi amung sala'deh. Idi kudeng ineh teh do' ieh nganau' kuan Lepo su luk inan papu' Tuhan luk idi arangdeh idi luk linutak ku gani'deh.

¹⁷ Idi seburur pana' na miak amé' denganneh bang Lepo su luk inan papu' Tuhan, kareb ieh semuet nganau' luk nguit pedo' bang Su luk Meluun Ligan ineh, pad macing ieh remuat. Kudeng ineh teh ieh nganau' luk nguit pedo' kuan bururneh sebuleng, idi kuan uang ruma'neh, idi amung lun Israil pana'.

¹⁸ Idi do' ieh remuat amé' inan bubpun luk pa kiung Tuhan idi nganau' luk nguit pedo' kuan ineh, idi do' ieh ngalap sebuang dara' sapi' deléi, idi sebuang dara' amék deléi ineh, idi ngukit ineh luun unga bubpun ineh pekelibut.

¹⁹ Idi do' ieh ngisak bubpun ineh ku sebuang dara' ineh dengan bua' ticu'neh tudu' kua'. Kudeng ineh lawéneh ieh ngeligan bubpun ineh ratnan amung gani' lun Israil.

Amék Luk Uen Ngusu

²⁰ “Kareb Arun pangeh nenganau' luk nguit pedo' kuan Su luk Meluun Ligan idi kuan Lepo su luk inan papu' Tuhan idi bubpun ineh, idi do' ieh nguit amék deléi luk mulun ineh, pa kiung Tuhan.

²¹ Idi do' Arun ngerareng mop ticu'neh nan uluh amék ineh. Idi pa luun amék ineh do' ieh ngamo amung dat lun Israil, idi amung sala'deh. Idi amung-amung ineh rangen luun uluh amék ineh. Idi do' ngecuk nelun luk tinina' ku kekamen ineh nguit amék ineh amé' su luk ali-ali.

²² Idi amék ineh mabeh idi nguit amung datdeh ineh amé' nan aceh bawang luk mali. Idi amék ineh pana' do' ieh suen amé' déi' su luk ali-ali.

²³ “Pangeh ineh idi do' Arun semuet bang Lepo su luk inan papu' Tuhan. Idi ieh ngelengu ayung kibung pu luk iungen kareb ieh semuet bang Su luk Meluun Ligan idi necan ineh ieneh.

²⁴ Idi do' ieh diu' déi' su luk meligan idi ngayung ku ayungneh sebuleng. Pangeh ineh idi do' ieh remuat temina' ku baré luk sabpenneh, idi baré luk sabpen lun mula' pana'. Idi do' ieh nganau' luk nguit pedo' kuan bururneh sebuleng idi kuan lun mula'.

²⁵ Idi do' ieh ngeseb lemak baré ngaceku sala' ineh luun bubpun.

²⁶ Idi lun luk nenguit amék deléi luk inusu ineh, do' ieh mupu' ayungneh idi diu', kareb nateh ieh semuet bang su luk inan nelupo ineh.

²⁷ Idi sapi' deléi barén ngaceku sala', idi dumba deléi barén ngaceku sala' luk kuan dara' inuit semuet bang Su luk Meluun Ligan, pad nganau' luk nguit pedo', do' ideh iten remuat rat su inan lun mula', idi sabpen, do' kubil, uang, idi tinéi' didueh pana'.

²⁸ Idi lemulun luk ngeseb ineh, do' ieh mupu' ayungneh idi diu' kareb nateh ieh semuet bang su luk inan nelupo ineh.

Ratnan Ngimet Aco Rayeh Nguit Pedo'

²⁹ “Idi ini mangun ku aceh ukum kuan muyuh macing ruked-ruked. Idi kareb pulu' aco bulan luk ketudu' ineh do' ngebeneh burur muyuh idi mawa' na kuman. Aleg muyuh nganau' anun-anun, do' muyuh luk kuan bawang, idi lun sakai luk tudo arang muyuh pana'.

³⁰ Ngaceku aco sineh luk nguit pedo' kuan muyuh miak ruen, pad muyuh meligan ratnan amung sala' muyuh pa kiung Tuhan.

³¹ Idi aco sineh mangun kuan muyuh seaco luk inan mudeng pad muyuh ngebeneh burur muyuh. Idi ini aceh ukum luk meruked.

³² Idi luk nguit pedo' ineh miak ruen imam luk pangeh inumau, ieh ineh lemulun luk pangeh litep mangun ku imam ngelibal tamanneh. Idi do' ieh ngayung ku ayung kibung pu, ieh ineh ayung Su luk Meluun Ligan.

³³ Idi do' ieh nganau' luk nguit pedo' kuan Su luk Meluun Ligan, idi kuan Lepo su luk inan papu' Tuhan idi bubpun pana', idi teh kuan imam idi kuan lun mula'.

³⁴ Idi ini mangun ku aceh ukum luk meruked kuan muyuh, ieh ineh selak sekua' do' muyuh nganau' luk nguit pedo' kuan amung lun Israil ngaceku amung sala'deh.”

³⁵ Idi Musa nenganau' kudeng luk bida' Tuhan kuanneh.