UKUM 15 - BALA LUK DO'

Ratnan Et Deléi Luk Ku Gani'

¹ Kebala Tuhan ni Musa idi Arun,

² “Mada' kuan lun Israil: Kudeng aceh deléi luk mekebabpa', ineh mangun ku gani' kuanneh.

³ Kudeng ieh mekebabpa' kian mata babpa', ieh ineh ku gani'.

⁴ Idi amung pagau idi su luk inan lemulun luk mekebabpa' telubid, ieh ineh ku gani', idi su luk inanneh tudo pana' melutak teh.

⁵ Idi idé luk ngakem pagau ineh, idi do' ieh mupu' ayungneh idi ngediu' bururneh, idi ieh mangun ku gani' macing aco macep.

⁶ Idi kudeng idé luk tudo su luk inan lun luk mekebabpa' ineh tudo, do' ieh mupu' ayungneh idi ngediu' bururneh. Idi ieh mangun ku gani' macing aco macep.

⁷ Idi idé luk ngakem burur lun luk mekebabpa' ineh, do' ieh mupu' ayungneh idi ngediu' bururneh ku abpa'. Idi ieh mangun ku gani' macing aco macep.

⁸ Idi teh kudeng lun luk mekebabpa' ineh ngelica' aceh lun luk meligan, idi do' lun luk linica' ineh mupu' ayungneh, idi ngediu' bururneh, idi ieh mangun ku gani' macing aco macep.

⁹ Kudeng ineh teh amung su luk inanneh tudo luun keted keladai, ieh ineh mangun ku gani'.

¹⁰ Idi idé luk ngakem su luk inanneh tudo ineh, ieh ineh mangun ku gani' macing aco macep. Idi idé luk nguit binaweh ineh do' ieh mupu ayungneh, idi ngediu' bururneh. Idi ieh mangun ku gani' macing aco macep.

¹¹ Idé luk pangeh kikem lun luk mekebabpa' ineh dengan na nesibaru' ticu'neh bang abpa' atun, do' ieh mupu' ayungneh idi ngediu' bururneh. Idi ieh mangun ku gani' macing aco macep.

¹² Idi teh binaweh ratnan tana' kuden luk pangeh kikem lun luk mekebabpa' ineh, do' ieh uen mila'. Iamo' amung repapeh kayuh, do' ieh uen maru' ku abpa'.

¹³ “Idi kareb lun luk mekebabpa' ineh do' ratnan mekebabpa', idi do' ieh ngiap tudu' aco rat pun aco ieh nedo'. Idi do' ieh mupu' ayungneh idi ngediu' bururneh ku abpa' luk metaro. Idi ieh meligan.

¹⁴ Kareb aco luk kewaluh ineh, idi do' ieh ngalap dueh suit sukur, kian dueh anak limun lek. Do' ieh amé' pa kiung Tuhan pa atun tanga' Lepo su luk inan papu' Tuhan idi maré suit ineh kuan imam.

¹⁵ Idi do' imam maré ineh, sebuleng suit barén ngaceku sala' idi sebuleng barén sabpen. Kudeng ineh imam nganau' aceh luk nguit pedo' kuanneh pa kiung Tuhan.

¹⁶ “Idi kudeng seburur deléi ngeruat luk ku inulneh, do' ieh ngediu' amung bururneh bang abpa'. Idi ieh mangun ku gani' macing aco macep.

¹⁷ Idi amung ayung idi kubil luk neketukan luk ku inulneh, do' ieh baruin. Idi ieh ineh mangun ku gani' macing aco macep.

¹⁸ Kudeng decur idi deléi pamung do' didueh diu'. Idi didueh mangun ku gani' macing aco macep.

Ratnan Et Decur Luk Ku Gani'

¹⁹ “Kudeng seburur decur macing bulan, do' ieh utad tudu' aco kinioneh. Idi idé luk ngakem neneh ieh mangun ku gani' macing aco macep.

²⁰ Idi amung su luk inanneh telubid idi tudo kareb ieh macing bulan, ieh ineh mangun ku gani'.

^21-23 Idé luk ngakem su luk inanneh rudap, idi su luk inanneh tudo, do' ieh mupu' ayungneh idi diu', idi ieh mangun ku gani' macing aco macep.

²⁴ Kudeng aceh deléi pamung neneh kareb ieh macing bulan, idi tudu' aco kinioneh ieh mangun ku gani'. Idi amung su luk inanneh rudap, idi su luk inanneh telubid pana' mangun ku gani'.

²⁵ “Kudeng seburur decur mérat dara' tuda'-tuda' aco kinioneh luk baken bang kareb luk pekalai, idi teh meluun ratnan luk pekalai, idi ieh mangun ku gani' seruked ieh mérat dara'.

²⁶ Amung su luk inanneh rudap idi su luk inanneh tudo seruked ieh mérat dara' ineh mangun ku gani'.

²⁷ Idi idé luk ngakem binaweh ineh ieh mangun ku gani'. Do' ieh mupu ayungneh idi diu'. Idi ieh ku gani' macing aco macep.

²⁸ Idi kareb ieh do' ratnan mérat dara'neh do' ieh ngiap tudu' aco. Pangeh ineh idi ieh meligan.

²⁹ Idi kareb aco luk kewaluh, do' ieh ngalap dueh suit sukur kian dueh suit limun lek idi nguit ineh kuan imam, pa atun tanga' Lepo su luk inan papu' Tuhan.

³⁰ Idi do' imam ineh maré sebuleng ku baré ngaceku sala' idi sebuleng barén sabpen. Idi do' imam nganau' luk nguit pedo' kuanneh pa kiung Tuhan.”

³¹ Tuhan nengecuk ni Musa mada' kuan lun Israil ineh, pad ideh mepatad ratnan luk ku gani', pelé ideh na ngelutak Lepo su luk inan papu' Tuhan luk uned su luk inandeh nelupo ineh, pad ideh na maté.

³² Idi ini ukum lun luk mekebabpa' idi lun luk ngutat luk ku inulneh,

³³ idi decur luk macing bulan, idi deléi luk pamung dengan decur luk macing bulan.