UKUM 14 - BALA LUK DO'

Ratnan Lemulun Luk Mét Susud Uen Ngeligan

¹ Kebala Tuhan ni Musa,

² “Ini mangun ku ukum lemulun luk mét susud. Kareb aco luk inanneh uen ngeligan, idi do' ieh iten amé' papu' imam.

³ Idi do' imam ineh remuat rat su luk inan nelupo. Kudeng ieh kali' susud ineh pangeh neburo ratnan lemulun ineh,

⁴ idi do' ieh ngecuk nedeh ngalap kuan lemulun luk uen ngeligan ineh dueh suit luk do', kayuh tumuh, nuper sia' melidang, idi teh likudung.

⁵ Idi do' imam ngecuk nedeh ngeret aceh suit ineh pa luun aceh lacang luk inan apba' metaro.

⁶ Idi do' ieh nguit suit seluk mulun ineh, kayuh tumuh, nuper sia' melidang, idi likudung, idi ngerereb amung ineh perapu dengan suit luk mulun ineh bang dara' suit luk pangeh kirat pa luun abpa' luk metaro ineh.

⁷ Idi do' ieh mubpur lun luk uen ngeligan ratnan susudneh tudu' kua' ku dara' suit ineh. Pangeh ineh do' mala neneh meligan. Idi muit suit luk mulun ineh temulud déi' liang.

⁸ Idi do' lun luk linigan ineh mupu' ayungneh idi ngiki amung apbukneh, idi diu', pad ieh meligan. Idi ieh miak semuet su luk inan nelupo. Iamo' do' ieh tudo déi' liang lepo kibungneh sebuleng tudu' aco kinioneh.

⁹ Idi aco luk ketudu', do' ieh ngiki amung abpuk uluhneh, idi buluh adaneh idi madu'neh. Idi do' ieh ngiki uluhneh, idi mupu' ayungneh, idi diu' pad ieh meligan.

¹⁰ “Idi aco luk kewaluh, do' ieh ngalap dueh anak dumba deléi luk do', idi sebuleng dumba tineh luk uluhneh selak, idi luk do', idi teh segatang setangal banak luk rinabur ku umau mangun ku baré akan, idi setangal seréi' umau.

¹¹ Idi do' imam ngerareng lun luk uen ngeligan ineh idi amung baréneh pa kiung Tuhan pa atun tanga' Lepo su luk inan papu' Tuhan.

¹² Idi do' imam ineh ngalap sebuleng anak dumba deléi, idi maré neneh perapu dengan umau luk setangal seréi' ineh ku baré luk pingetap, idi nicul ineh ku baré luk tidulen pa kiung Tuhan.

¹³ Do' ngeret dumba deléi ineh su luk inan lun ngeret luk barén ngaceku sala', idi baré luk sabpen, ieh ineh su luk meligan, ngaceku mepad kudeng baré ku sala', kudeng ineh teh baré luk pingetap, ieh ineh babpat imam, luk meluun ligan.

¹⁴ Idi do' imam ngalap sebuang dara' anak dumba ineh, idi imam ngisit ineh nan ribaran lalid pa tinueh lun luk uen ngeligan ineh, idi nan bua' ticu' mebpuhneh pa tinueh, idi bua' kukud mebpuhneh pa tinueh.

¹⁵ Idi teh do' imam ngalap ratnan umau luk setangal seréi' ineh, idi ngukit ineh luun paladneh pa kabing.

¹⁶ Idi do' ieh ngerereb bua' ticu'neh pa tinueh nan umau luk bang ticu'neh pa kabing. Idi ieh ngisit ku bua' ticu'neh sebuang umau ineh tudu' kua' pa kiung Tuhan.

¹⁷ Idi do' imam ngisit teceh umau luk bang paladneh luun ribaran lalid pa tinueh lun luk uen ngeligan, idi bua' ticu' mebpuhneh pa tinueh idi bua' kukud mebpuhneh pa tinueh teh, ieh ineh meluun ratnan baré luk pingetap.

¹⁸ Idi ela umau luk ketecan bang palad imam ineh, do' ieh ruenneh luun uluh lun luk uenneh ngeligan. Idi imam nganau' luk nguit pedo' kuan lemulun ineh pa kiung Tuhan.

¹⁹ Pangeh ineh do' imam maré baré ngaceku sala', idi nganau' luk nguit pedo' kuan lemulun luk uen ngeligan ratnan lutakneh. Pangeh ineh do' ngeret baré luk sabpen ineh.

²⁰ Idi baré luk sabpen idi baré akan ineh, do' ineh barén imam luun bubpun. Kudeng ineh teh do' imam nganau' luk nguit pedo' kuanneh, pad ieh meligan.

²¹ “Iamo' kudeng lemulun ineh masi' idi na miak maré amung ineh, idi do' ieh ngalap sebuleng anak dumba deléi ku baréneh luk pingetap, ieh ineh baré luk tidulen, pad nganau' luk nguit pedo' kuanneh, idi teh tudu' lio banak luk rinabur ku umau saitun mangun ku baré akan, idi umau saitun setangal seréi',

²² idi dueh suit sukur kian dueh anak suit limun lek, maya' asi'neh. Idi sebuleng barén ngaceku sala', idi sebuleng barén sabpen.

²³ Idi aco luk kewaluh do' ieh nguit ineh kuan imam, mangun ku liganneh pa kiung Tuhan, pa atun tanga' Lepo su luk inan papu' Tuhan.

²⁴ Idi do' imam ngalap anak dumba idi maré ineh ku baré luk pingetap dengan umau saitun ineh, pad ineh tidulen pa kiung Tuhan.

²⁵ Idi do' ieh ngeret anak dumba, ieh ineh baré luk pingetap idi ngalap sebuang dara', idi ngisit ineh luun ribaran lalid lemulun luk uen ngeligan ineh, idi luun bua' ticu' mebpuhneh pa tinueh, idi bua' kukud mebpuhneh pa tinueh teh.

²⁶ Idi teh do' imam ngukit sebuang umau ineh bang paladneh pa kabing.

²⁷ Idi do' ieh ngisak sesuut umau ineh ku bua' ticu'neh pa tinueh tudu' kua' pa kiung Tuhan.

²⁸ Idi ratnan umau luk ketecan bang paladneh do' imam ngisit sesuut nan ribaran lalid pa tinueh lemulun luk uen ngeligan ineh, idi nan bua' ticu' mebpuhneh pa tinueh, idi bua' kukud mebpuhneh pa tinueh teh, su luk inan dara' baré luk pingetap inisit atun.

²⁹ Idi ela umau luk bang paladneh uenneh ngisit nan uluh lun luk uen ngeligan ineh, pad nganau' luk nguit pedo' kuanneh pa kiung Tuhan.

³⁰ Pangeh ineh do' ieh temina' ku aceh suit sukur, kian aceh anak limun lek, petulu maya' asi'neh.

³¹ Sebuleng mangun ku baré luk pingetap, idi sebuleng barén sabpen perapu dengan baré akan ineh. Kudeng ineh imam nganau' luk nguit pedo' kuan lun luk uen ngeligan ineh pa kiung Tuhan.

³² Kudeng ini ukum kuan lemulun luk neketukan ét susud, luk na miak maré petap kuan liganneh.”

Ratnan Ruma' Luk Ku Gani'

³³ Kebala Tuhan ni Musa idi Arun,

³⁴ “Kareb muyuh semuet bang bawang Kanaan luk barénKu ku babpat muyuh, kareb Ui ngacing rapung kuan sebuleng ruma' bang bawang luk ku babpat muyuh ineh,

³⁵ do' lun luk kuan ruma' ineh maré kali kuan imam, idi pebala, ‘Bang terawéku ruma'ku neketukan ét rapung.’

³⁶ Idi do' imam ngecuk nelun nganau' ruma' ineh na uang, kareb nateh imam amé' nier ét ineh, pelé amung luk bang ruma' ineh na mangun melutak. Pangeh ineh idi do' imam amé' nier ruma' ineh.

³⁷ Idi kareb ieh nier ét ineh pelaba dat luun alad ruma' ineh, ieh ineh pileh-pileh mebata' kian mesia', idi melagan pelaba dalem bang alad ineh,

³⁸ idi do' imam ineh remuat rat bang ruma' ineh. Idi do' ieh ngecuk ngitek tanga' ruma' ineh tudu' aco kinioneh.

³⁹ Idi aco luk ketudu', idi do' imam ineh lemubed baruh. Kudeng ieh nier luk dat ineh iuk meperuit luun alad ruma' ineh,

⁴⁰ idi do' ieh ngecuk nelun nakul batu luk neketukan dat ineh, idi nala' amung batu ineh bang su luk melutak.

⁴¹ Idi do' ieh ngecuk mekud-mekud bang ruma' ineh pekelibut. Idi abuh apur luk bikud ineh do' ieh iten remuat rat bang bawang, idi talan bang su luk melutak.

⁴² Pangeh ineh, idi do' ngalap batu luk baken ngelibal batu luk tikul ineh. Idi teh ngalap apur luk baken, idi uen nguda luun ruma' ineh.

⁴³ “Idi kudeng luk dat ineh mulun bang ruma' ineh, pangeh ideh nenakul batu idi nemekud ruma' ineh, idi nenguda apur,

⁴⁴ idi do' imam amé' nier. Kudeng rapung ineh iuk meperuit bang ruma' ineh, kali' rungen ineh melutak.

⁴⁵ Idi do' ruma' ineh uen ngusag, idi batu, kayuh, idi amung apur ruma' ineh iten remuat amé' su luk melutak.

⁴⁶ Idé-idé luk semuet bang ruma' ineh seruked ruma' ineh initek, lemulun ineh mangun ku gani' macing aco macep.

⁴⁷ Idi idé luk rudap idi kuman bang ruma' ineh, do' ieh mupu' ayungneh.

⁴⁸ “Iamo' kudeng imam pangeh semuet idi nier, kudeng ét ineh na mulun baruh bang ruma' ineh rat pangeh ruma' ini inuda ku apur, idi do' imam mala ruma' ineh meligan, ngaceku ét ineh pangeh neburo.

⁴⁹ Do' imam ngalap dueh suit, kayuh tumuh, nuper sia' melidang, idi likudung, pelé ruma' ineh uen ngeligan.

⁵⁰ Idi sebuleng suit ineh keretenneh pa luun sebuleng kuden luk inan abpa' metaro.

⁵¹ Idi do' ieh ngalap kayuh tumuh, likudung, nuper sia' melidang, idi suit seluk mulun ineh, idi ngerereb amung ineh bang dara' suit luk pangeh kirat, idi bang abpa' luk metaro ineh, idi ngisak ineh luun ruma' tudu' kua'.

⁵² Kudeng ineh lawéneh ngeligan ruma' ineh ku dara' suit, idi abpa' luk metaro perapu dengan suit luk mulun, kayuh tumuh, likudung, idi nuper sia' melidang.

⁵³ Idi suit seluk mulun ineh itenneh remuat idi ieh muit neneh temulud déi' liang. Kudeng ineh lawéneh nganau' luk nguit pedo' bang ruma' ineh, pad ineh meligan.”

⁵⁴ Idi ini ukum ratnan amung ayu ét susud idi puruh uluh luk dat,

⁵⁵ rapung luk luun ayung idi bang ruma',

⁵⁶ idi teh bara', mungeh, idi balita',

⁵⁷ pad miak mada' kareb luk inan melutak idi kareb luk inan meligan. Idi teh ini ukum ratnan susud.