UKUM 13 - BALA LUK DO'

Tuda'-Tuda' Ukum Ratnan Et Luk Luun Kubil

¹ Kebala Tuhan ni Musa idi Arun,

² “Kudeng inan bara', kian mungeh, kian belita', luun kubil seburur lemulun luk miak mangun ku susud luun bururneh, do' lemulun ineh iten amé' pa kiung Arun luk imam, kian pa kiung anak-anakneh luk imam pana'.

³ Idi imam ineh miak nier do'-do' ét luk luun bururneh ineh. Kudeng buluh su luk inan mét ineh pangeh nisu' mebuda', idi megala' luk mét ineh meluun dalem nan kubil bururneh, ieh ineh susud. Kareb ieh pangeh sinier do'-do', do' imam neten neneh ku gani'.

⁴ Iamo' kudeng kubilneh inan belita' idi siren na meluun dalem ratnan kubilneh, idi buluh su luk inanneh na ieh misu' mangun mebuda', idi do' imam ngata lun luk mét ineh tudu' aco kinioneh.

⁵ Idi kareb aco luk ketudu', do' imam ineh nier neneh do'-do'. Kudeng matu-matu luk mét ineh lutep, na ieh kuman pelaba dalem luun kubilneh, idi do' imam ineh ngata neneh tudu' aco kinioneh teh.

⁶ Idi aco luk ketudu' ineh imam miak nier neneh do'-do' sekedueh kua'. Kudeng megala' luk mét ineh melena' idi na kuman pelaba dalem bang kubilneh, idi do' imam mala neneh meligan. Ieh ineh kererang mo'. Do' lemulun ineh mupu' ayungneh. Idi ieh mangun meligan.

⁷ Iamo' kudeng kererang ineh kuman iuk medalem bang kubilneh, kareb ieh pangeh nemada' bururneh siren imam pad ieh miak ruen meligan, do' ieh amé' papu' imam sekedueh kua'.

⁸ Idi kudeng imam nier luk mét ineh iuk kuman medalem bang kubilneh, idi do' imam mala neneh ku gani'. Ieh ineh ét susud.

Ratnan Et Susud

⁹ “Idi idé luk neketukan susud ineh, do' ieh iten amé' papu' imam.

¹⁰ Kudeng imam nier neneh mebara', mebuda' nan kubilneh, idi bara' ineh ngisu' ayu buluh su luk inanneh, pad ieh mangun mebuda', idi temubu' uang luk dat bang bara' ineh,

¹¹ idi ieh ineh ét susud luk pangeh mio luun kubil bururneh. Idi do' imam mala neneh ku gani'. Idi aleg ieh ngata neneh peh, ngaceku ieh mangun ku gani'.

¹² Iamo' kudeng susud ineh maput luun bururneh, ratnan uluh macing ku kukudneh, su luk sinier imam,

¹³ idi do' imam nier neneh sekua' teh, idi kudeng imam kali' amung bururneh maput ku susud ineh, do' imam ineh mala lun ineh meligan, kudeng amung kubilneh pangeh misu' mangun mebuda', meligan tieh.

¹⁴ Iamo' kudeng uang luk dat melagan bang susudneh, idi ieh mangun ku gani'.

¹⁵ Idi kudeng imam nier uang luk dat ineh, idi do' imam mala neneh ku gani', ngaceku uang luk dat ineh mangun ku gani'. Ieh ineh susud.

¹⁶ Iamo' kudeng uang luk dat ineh mepali' idi misu' mangun mebuda', do' lemulun ineh amé' papu' imam,

¹⁷ idi imam miak nier neneh, idi kudeng luk mét ineh mangun mebuda', idi do' imam ineh mada' neneh meligan. Ngaceku ieh meligan.

Ratnan Kimuh

¹⁸ “Idi kudeng seburur lemulun mekimuh idi kimuh ineh mepali',

¹⁹ iamo' su luk inan pilet kimuh ineh mulun aceh ayu luk mebuda' kian belita' luk mebuda' puar mesia', idi do' ieh badén inan imam.

²⁰ Idi kudeng imam nier pilet ineh meluun dalem ratnan kubil ineh, idi buluh su luk inanneh pana' pangeh nisu' mangun mebuda', idi do' imam mala neneh ku gani'. Ieh ineh ét susud luk pangeh mulun su luk inan kimuh ineh.

²¹ Iamo' kudeng imam nier neneh na buluh su luk inanneh mebuda', na ieh meluun dalem ratnan kubilneh, iamo' iuk melena', idi do' imam ineh ngata neneh tudu' aco kinioneh.

²² Kudeng ieh kuman pelaba dalem bang kubil ineh, idi do' imam mala neneh ku gani'. Ngaceku ieh ineh ét susud.

²³ Iamo' kudeng belita' ineh na iuk amé' rayeh idi na remanat-remanat, ieh ineh pilet kimuh. Do' imam mala neneh meligan.

²⁴ “Idi kudeng kubil seburur lemulun nelupuk ku apui, idi piletneh mebuda' puar mesia' kian pelaba buda' lek,

²⁵ do' imam ineh nier neneh. Kudeng matu buluh su ineh misu' mangun mebuda', melagan ét ineh pelaba dalem luun kubilneh, idi susud luk mulun luun lupuk ineh. Idi do' imam ineh mala neneh ku gani', ngaceku ieh mét susud.

²⁶ Iamo' kudeng imam nier neneh do'-do' idi na luk idi buluh luk mebuda' luun ét ineh, idi teh na ieh pelaba dalem luun kubilneh, idi ieh iuk-iuk luna', idi do' imam ineh ngata neneh tudu' aco kinioneh.

²⁷ Idi kareb aco luk ketudu' ineh, do' imam nier neneh do'-do'. Kudeng ieh iuk kuman medalem bang kubilneh, idi do' imam ineh mala neneh ku gani'. Ngaceku ieh mét susud.

²⁸ Iamo' kudeng belita' ineh lutep su inanneh, idi na ieh meperuit luun kubil ineh, iamo' ieh amé'-amé' luna', idi megala' ieh ineh bara' lupuk mo'. Do' imam mala neneh meligan. Ngaceku ieh ineh pilet lupuk mo'.

Ratnan Et Luun Uluh Idi Ada

²⁹ “Kudeng aceh deléi kian decur neketukan ét luun uluhneh kian luun adaneh,

³⁰ idi do' ieh siren imam do'-do'. Kudeng ieh sirenneh meluun dalem ratnan kubilneh, idi inan abpukneh luk mebirar idi melipi teh, do' imam mala neneh ku gani'. Ngaceku puruh ineh mangun ku susud nan uluh kian luun adaneh.

³¹ Iamo' kudeng imam nier puruh luk luun uluhneh na ieh meluun dalem ratnan kubilneh, idi kudeng ieh na abpuk luk mebirar pana', do' imam ngata lun luk mét susud nan uluhneh tudu' aco kinioneh.

³² Idi aco luk ketudu' do' imam nier luk métneh. Kudeng na puruh ineh iuk kuman medalem idi na abpukneh mebirar, idi na ieh melagan medalem bang kubilneh,

³³ idi do' ngecuk neneh ngiki uluhneh. Iamo' su luk inan puruh ineh aleg uen ngiki. Do' imam ineh ngata neneh tudu' aco teh.

³⁴ Idi aco luk ketudu' do' imam nier puruh ineh. Kudeng na akan luun kubilneh amé' rayeh idi melagan na meluun dalem, idi do' imam mala neneh meligan. Idi do' lemulun ineh mupu' ayungneh pad ieh meligan.

³⁵ Iamo' kudeng puruh ineh meperuit luun kubilneh, kudeng bururneh pangeh bida' imam meligan,

³⁶ idi do' imam nier neneh sekua' teh. Kudeng puruhneh pangeh neperuit luun kubilneh, nima' imam na nakap abpuk luk mebirar, ngaceku ieh ku gani'.

³⁷ Iamo' kudeng ieh nier puruh ineh na iuk medalem idi inan abpuk mitam temubu' luunneh, idi puruh ineh pangeh mepali', idi lemulun ineh meligan. Idi do' imam mala neneh meligan.

³⁸ “Kudeng seburur deléi kian decur lek, mebelita' kubil bururneh, idi putok mebuda',

³⁹ idi imam nier maput nan kubil bururneh na mebuda' tu, ieh ineh mungeh idi ieh meligan.

⁴⁰ “Idi teh kudeng abpuk selemulun nebubput pad ieh mebutal, idi ieh meligan.

⁴¹ Idi kudeng nebubput abpuk pa madu'neh, pad ieh mebutal, idi ieh meligan.

⁴² Iamo' kudeng luun uluh luk mebutal inan luk mét mebuda' uar mesia', ieh ineh susud luk mulun su ineh.

⁴³ Idi kudeng imam nier luun uluhneh mebuda' uar mesia' ayuneh mepad kudeng susud nan kubil bururneh,

⁴⁴ idi do' imam mala neneh ku gani', ngaceku luk mét ineh inan luun uluhneh.

⁴⁵ “Idi lun luk mét susud luk neketukan ineh dengan matu, do ayungneh deraken idi ngesasung abpukneh idi ngebpu bibirneh. Do' ieh ngitang, ‘Megani'! Megani'!’

⁴⁶ Seruked ieh mét susud, ieh mangun ku gani', idi do' ieh amé' setau', idi mado rat su luk inan lun mula' nelupo.

Tuda'-Tuda' Ukum Ratnan Ayung Luk Mangun Ku Gani'

⁴⁷ “Idi kudeng rapung nepisit luun aceh ayung, do' kibung buluh amék idi buluh kibung pu,

⁴⁸ kian luun gitian luk tuped, kian luun gitian luk tepalang bang pu idi buluh pana', kian kubil, kian luk inau' ratnan kubil lek,

⁴⁹ idi kudeng su luk neketukan ineh mebata' kian mesia' ayuneh, ieh ineh rapung. Idi do' ieh badén nan imam.

⁵⁰ Kareb imam nier su luk neketukan ineh, idi do' ieh ngecuk nganug luk neketukan ineh tudu' aco kinioneh.

⁵¹ Do' ieh nier bang aco luk ketudu' ineh su luk neketukan ineh. Kudeng rapung ineh amé' mula', ieh ineh rapung luk meperuit. Idi ieh ineh ku gani'.

⁵² Idi do' imam ngeseb amung ineh. Ngaceku ineh rapung luk dat. Na miak na ieh sabpen.

⁵³ “Iamo' kudeng imam nier dat ineh na neperuit luun amung ineh,

⁵⁴ idi do' imam ngecuk nelun mupu' luk nekaneh ku ineh. Do' ieh nugen tudu' aco teh.

⁵⁵ Idi kareb imam nier dat ineh pangeh biru' do'-do', idi dat ineh na ieh misu' ayu, idi sagan pana' dat ineh na amé' rayeh, idi ieh ku gani' teh. Idi do' ieh sabpen, sagan pana' luk dat ineh pa luun, kian pa liang lek.

⁵⁶ Iamo' kudeng imam nier su luk neketukan ineh pangeh mepileh, idi do' ieh deraken ratnan kibung, kian kubil, idi gitian luk tuped idi gitian luk tepalang.

⁵⁷ Iamo' kudeng pangeh ineh idi inan luk kudeng ineh mulun baruh idi do' muyuh ngeseb amung luk dat ineh.

⁵⁸ Kudeng muyuh mupu' ineh, idi luk dat ineh buro, idi do' ieh baruin sekua' teh, pad ieh meligan.”

⁵⁹ Kudeng ini ukum kuan susud luk nan ayung ratnan pu idi kibung buluh, kian gitian luk tuped idi gitian luk tepalang, idi amung repapeh kubil.