UKUM 11 - BALA LUK DO'

Ratnan Pung Luk Miak Kenen

¹ Kebala Tuhan ni Musa idi Arun,

² “Mada' ukum ini kuan lun Israil. Ini pung luk miak kenen muyuh rat arang amung pung luk luun tana'.

³ Pung luk dueh lisun idi luk ngelua' miak kenen muyuh.

^4-6 Iamo' muyuh na miak kuman ratnan amung luk ngagat idi ngelua' mo', kian luk dueh lisun mo': kudeng unta, sapan, idi arnab. Amung pung ineh mangun ku gani' kuan muyuh.

⁷ Idi teh barek idi baka, ngaceku sagan pana' lisundeh dueh, iamo' na ideh ngagat luk linua', idi ideh mangun ku gani' kuan muyuh.

⁸ Aleg muyuh kuman pung ineh. Idi aleg muyuh ngakem butungdeh. Ideh mangun ku gani' kuan muyuh.

⁹ “Muyuh miak kuman amung lawid luk inan ragi idi rara, do' luk bang abpa' rayeh idi bang arur pana'.

¹⁰ Iamo' luk na ragi idi rara bang abpa' rayeh idi bang arur pana' na miak kenen muyuh.

¹¹ Lawid ineh mangun ku gani' kuan muyuh. Aleg muyuh kuman uangdeh, idi aleg ngakem butungdeh.

¹² Amung luk na ragi idi rara bang abpa' ineh mangun ku gani' kuan muyuh.

^13-19 “Idi aleg muyuh kuman amung-amung suit ini: amung-amung kanui, amung-amung puek, amung-amung bungkak, suit unta, suit luk mebuda' tangeb abpa' rayeh, manuuk, lal lakui, kekalit, idi pawat.

²⁰ “Idi amung pung luk inan ilad luk nalan dengan apat kukud mangun ku gani' kuan muyuh.

²¹ Iamo' luk miak uput miak kenen muyuh,

²² ieh ineh kato tulang, kato mebpuh, idi kato kesil.

²³ Iamo' amung pung luk baken luk inan ilad idi luk tekamang mangun ku gani' kuan muyuh.

^24-28 “Idé-idé luk ngakem butung pung ini mangun melutak macing aco macep: amung pung luk na dueh lisun idi na ngagat luk linua', idi amung pung luk nalan ku palad rat arang pung luk apat kukud. Idé-idé luk mabeh butungdeh, do' ieh mupu' ayungneh, idi ieh melutak macing aco macep.

^29-30 “Amung-amung labo, amung-amung alé, buayeh, kabuk, kedarat, idi garang, mangun ku gani' kuan muyuh.

³¹ “Amung pung luk tekamang mangun ku gani' kuan muyuh. Idé luk ngakem butungdeh, ideh melutak macing aco macep.

³² Idi amung luk neketukan butungdeh, ieh ineh melutak, ieh ineh kayuh, ayung, kubil, tebpung, idi amung binaweh luk ku pakai, idi do' ieh rerebpen bang abpa', idi ineh mangun ku gani' macing aco macep.

³³ Idi kudeng butung pung ineh mebpeh bang kuden, idi amung uangneh mangun ku gani', do' ieh ruen mila'.

³⁴ Amung luk kenen luk neketukan ku abpa' rat bang kuden ineh, idi amung luk rupen pana' mangun ku gani' kuan muyuh.

³⁵ Idi teh binaweh baken luk neketukan butung ineh mangun ku gani', do' tetel idi lacang pana' uen mila'.

³⁶ Iamo' bued abpa' idi subuk ineh meligan. Iamo' anun-anun luk nepisit ku butung ineh, kali' rungen ieh melutak.

³⁷ Idi kudeng butung ineh nepisit luun ilung luk uen ngisak, na ieh mangun ku gani'.

³⁸ Iamo' kudeng ilung ineh bang abpa' idi ieh neketukan ku butung ineh, idi ineh mangun ku gani' kuan muyuh.

³⁹ “Idi kudeng pung luk miak kenen muyuh maté, idé luk ngakem butung ineh, ieh mangun ku gani' macing aco macep.

⁴⁰ Idi teh kudeng idé luk nekuman uang butung ineh, do' ieh mupu' ayungneh, idi ieh mangun ku gani' macing aco macep. Idi idé luk nguit butungneh ineh, do' ieh mupu' ayungneh idi ieh pana' mangun ku gani' macing aco macep.

⁴¹ “Idi aleg muyuh kuman pung luk medari luk tekamang idi suloi luun tana',

⁴² do' luk nalan dengan apat kukud, idi luk mula' kukud pana'.

⁴³ Aleg muyuh ngelutak burur muyuh ku pung luk kudeng ineh.

⁴⁴ Ui ini Tuhan Allah muyuh. Do' muyuh meligan, ngaceku Ui ini meligan.

⁴⁵ Ui ini Tuhan luk nenated nemuyuh remuat rat bang bawang Masir, pad mangun ku Allah muyuh. Do' muyuh meligan ngaceku Ui ini meligan.

⁴⁶ “Idi ini ukum ratnan amung pung, suit, idi pudut luk mulun bang abpa' idi luk nalan luun tana',

⁴⁷ pad muyuh mili' rat arang luk mangun ku gani' dengan luk na mangun ku gani', idi rat arang pung luk kenen dengan pung luk na kenen lemulun.”