UKUM 1 - BALA LUK DO'

Baré Luk Sabpen

¹ Tuhan nenawar ni Musa rat bang Lepo su luk inan papu' Tuhan, kebalaNeh,

² “Do' lun Israil maya' bala ini: Kudeng idé rat arang muyuh pian maré aceh baré ratnan aya'neh, ieh ineh sapi', dumba, kian amék lek,

³ idi kudeng baré ineh aceh baré luk sabpen ratnan sapi' ineh, do' ieh maré aceh sapi' deléi luk do'. Do nguit neneh macing pa atun tanga' Lepo su luk inan papu' Tuhan, pelé Tuhan ngalap ineh.

⁴ Idi do' ieh ngerareng ticu'neh nan uluh luk barén sabpen ineh, pad ineh mangun ku aceh baré luk nguit pedo' kuanneh.

⁵ Idi do' ieh ngeret sapi' su ineh. Idi do' anak Arun luk imam-imam maré dara' ineh kuan Tuhan, idi ngisak ineh libut-libut bubpun luk pa atun tanga' Lepo ineh.

⁶ Idi kubil luk barén sabpen ineh uen mulu'-mulu'.

⁷ Idi do' imam-imam ineh nganau' kayuh apui luun bubpun idi nutud ineh.

⁸ Idi do' ideh nganau' uang pung ineh dengan uluhneh idi lemakneh luun apui.

⁹ Idi do' ieh maru' tinéi' idi kukudneh, idi do' imam ngeseb amung baré ineh luun bubpun, pad mangun ku aceh buen luk do' kuan Tuhan.

¹⁰ “Idi kudeng luk barén ineh ratnan aya' dumba, kian amék lek, do' ieh maré deléi luk do'.

¹¹ Idi do' ieh keretenneh pa tinueh busat aco bubpun ineh. Idi do' imam-imam ngisak dara' ineh libut-libut bubpun.

¹² Idi do' ieh uen mulu' perapu dengan uluh idi lemakneh, idi imam nganau' ineh luun apui.

¹³ Idi do' ieh maru' tinéi' idi kukudneh. Idi do' imam ineh ngeseb amung baré ineh luun bubpun, pad mangun ku aceh buen luk do' kuan Tuhan.

¹⁴ “Idi kudeng luk barén sabpen ineh ratnan suit, idi do' ieh maré suit sukur, kian suit limun lek.

¹⁵ Idi do' imam nguit ineh amé' inan bubpun idi ngekaka dierneh, idi ngeseb uluhneh luun bubpun, idi dara'neh uen ngeti luun iring bubpun.

¹⁶ Idi do' ieh nala' belunanneh idi mubput buluhneh idi nala' ineh pa busat aco bubpun su luk inan abuh.

¹⁷ Idi do' ieh narak su ilad suit ineh, iamo' aleg ngatad bururneh. Idi do' ieh ngeseb amung ineh luun bubpun pad mangun ku aceh buen luk do' kuan Tuhan.