TIDO YEREMIA 4 - BALA LUK DO'

Pangeh Tabpa Yerusalim

¹ Amas tau luk mesilo na mesilo peh; usag Ruma' Allah tila' luun dalan.

² Anak adi' Sion mepad kudeng amas kuan tau atun, iamo' nekini ideh inau' lun ku kuden.

³ Tineh bungalé sikal maman anakneh, iamo' pupuku mepad kudeng suit luk megateh inan anakneh.

⁴ Ideh nima' anakdeh luk niti', maté ku lau idi paring. Anak dari mutuh akan mo', idi na lun maré nedeh.

⁵ Lemulun luk pekalai kuman akan luk pelaba do' maté luun dalan. Lun do' nakap akan arang arap.

⁶ Sala' Yerusalim meluun rayeh ratnan sala' Sodom, luk inusag bang palad Allah.

⁷ Atun anak adi' deléineh meluun buda' ratnan salju idi rata sapi'. Ideh do' ulun idi metueh.

⁸ Butungdeh telubid luun dalan, kiungdeh mitem idi ideh na miti. Kubildeh tekering kudeng kayuh idi tegeribpir luun tulangdeh.

⁹ Meluun samal kuan lemulun luk naté bang bunu' ratnan lun luk naté ku lau ngaceku na akan.

¹⁰ Decur luk méi' nenanek anakdeh sebuleng ku akandeh; ineh luk kenendeh kareb pupuku mesusa'.

¹¹ Tuhan nengacing usehNeh dengan meriput, idi nemaré apui déi' Sion pad ieh nabud neseb.

¹² Amung raca' idi uang tana' ini na ngerawé bunu' semuet maya' tanga' Yerusalim.

¹³ Iamo' ineh nangun. Nabi idi imamneh pangeh nenganau' sala', pad ngacing até kuan lemulun luk na mesala'.

¹⁴ Ideh lawé-lawé maya' dalan mepad kudeng lemulun luk nebuser. Bururdeh medara', pad lun baken na pian ngakem nedeh!

¹⁵ Lun baken pebala, “Buro muyuh. Melutak muyuhneh. Aleg ngakem negku!” Idi ideh lawé-lawé rat aceh bawang macing nan bawang baken. Idi na lun pian nganak nedeh.

¹⁶ Idi teh Tuhan na pian ngerawé nedeh. Ieh nengatad nedeh. Meluun teh Ieh na méi' nan imam idi lun rayehdeh.

¹⁷ Kai pian denganin, iamo' na tu luk nengedengan nekai. Kai merapet inan aceh pupu luk na miak ngedengan nekai.

¹⁸ Bunu' ineh ngabang nekai, pad kai na miak nalan déi' liang. Tarek kai pangeh nacing.

¹⁹ Ideh nengerada' nekai mepad kudeng kanui luk semiling. Ideh nemupud dalan kai luun pegkung, idi teh ideh nengagap nekai déi' su luk ali-ali.

²⁰ Ideh nengakem lun luk ngedengan nekai, ieh ineh raca' luk pinili' Tuhan, idi luk inan kai merapet miak matar nekai ratnan bunu'.

²¹ O lun Edom idi lun Us, do' muyuh meriruh idi mawang niat nekini. Iamo' kareb susa' macing nemuyuh, kali' rungen muyuh migu' idi lubpa.

²² Sion pangeh nemabeh salaneh; ukumneh pangeh nepelaba rat neneh. Iamo' Edom miak kumin Tuhan luk ngegala' sala'mu ineh.