TIDO YEREMIA 3 - BALA LUK DO'

Ukum, Uren, Idi Rapet

¹ Ui ini pangeh nekali' dereh idi useh Allah.

² Ieh nenguyut negku amé' bang su luk medacem.

³ Dengan na méi' Ieh nenecat negku kidi-kidi.

⁴ Ieh nengurat bururku, idi nemutul tulangku.

⁵ Ieh nenganau' negku bang tutup dereh idi susa'.

⁶ Ieh nenganau' negku tudo bang dacem até.

⁷ Ieh nengaling negku, pad na miak mepuit ratnan su luk inanku tinutup.

⁸ Ui ngitang mutuh pedengan, iamo' sembayangku na pedingeren!

⁹ Ui idar-idar karebku nalan, linibut ku libung batu.

¹⁰ Ieh nenginulat negku mepad kudeng beruang; Ieh nengeramit negku mepad kudeng balang.

¹¹ Ieh nengerada' negku ratnan dalan idi nengerarak negku idi nenecan negku.

¹² Ieh nengalap binorNeh idi nengelatik negku ku ilebNeh.

¹³ Ieh nengelatik negku ku ilebNeh.

¹⁴ Lemulun meriruh negku tebaco-tebaco. Ui ini luk inan uang tana' ini situnga.

¹⁵ Dengan mesaad Ieh nemaré luk mepét rupenku idi luk kenenku.

¹⁶ Ieh nengasa kiungku luun tana', idi nemutul lipenku luun batu.

¹⁷ Ui nekelupan ratnan do' ulun, do' udeng, idi awang.

¹⁸ Na mio teh ui maté; rapetku nan Tuhan pangeh neburo.

¹⁹ Terawé ratnan dereh idi dat udengku pelaba galih;

²⁰ pad ui megéi' meberat niat.

²¹ Iamo' rapetku lemubed kareb ui ngerawé ini:

²² Awa idi éi' Tuhan na miak ugka',

²³ mebaruh kudeng pekak, idi lutep kudeng masat aco.

²⁴ Tuhan mo' luk kuanku, idi ui merapet Neneh.

²⁵ Tuhan ineh do' kuan lemulun luk merapet Neneh.

²⁶ Meluun do' tau mulai niat nginulat Neneh, pad Ieh ngulun netau.

²⁷ Idi meluun do' sibada' mulai niat karebmu mangud.

²⁸ Kareb tau medereh do' tau tudo idi ungeng.

²⁹ Aleg tau ngedureng, ngaceku inan teh rapet.

³⁰ Kudeng tau bibal idi dinat, nima'neh.

³¹ Tuhan luk méi', idi na Ieh necan netau ruked-ruked.

³² Kareb Ieh ngacing susa' netau, Ieh na ugka' méi' netau.

³³ Na Ieh mawang niat ngedereh netau.

³⁴ Tuhan kali' kareb niat tau nurat bang tutup;

³⁵ Tuhan kali' kareb tau bibpeng lun na nganau' luk petulu.

³⁶ Idi teh Ieh kali' kareb lemulun mutut ukum luk na matu.

³⁷ Pian Tuhan mo' sebuleng miak mangun.

³⁸ Luk do' idi luk dat mangun maya' ecukNeh.

³⁹ Petuluké tau ngedureng kareb tau kumin ngaceku sala' tau?

⁴⁰ Do' tau ngerawé lawé tau, idi lumi inan Tuhan.

⁴¹ Do' tau sembayang idi ngukab niat tau kuan Allah luk déi' surga, kesembayang tau,

⁴² “Kai nenganau' sala' idi sikal metueh rat Namu, O Tuhan, idi na Iko maré do' nekai.

⁴³ “Iko nengerada' idi nengaté nekai, éi'Mu liniged ku usehMu.

⁴⁴ UsehMu mepad kudeng laput pad sembayang kai na miak petacu amé' Namu.

⁴⁵ Iko nenganau' nekai ku lubang arap bang tana' ini.

⁴⁶ “Kai dinat idi inan bunu' kai situnga.

⁴⁷ Kai nekali' dereh idi usag, pad kai mulun dengan merapang.

⁴⁸ Abpa' matehku mebpeh idi manud mepad kudeng abpa' ngaceku usag pupuku.

⁴⁹ “Abpa' matehku mepad kudeng arur luk na mekeket,

⁵⁰ pad macing Tuhan nier rat surga.

⁵¹ Susa' bawangku nengesusa' niatku.

⁵² “Mepad kudeng suit ui nekaneh abpung bunu'ku luk megateh negku dengan na punneh.

⁵³ Ideh nenala' negku bang aceh lubang idi nemapen neneh ku batu.

⁵⁴ Abpa' temubu', idi ui ngerawé maté.

⁵⁵ “Ui nenawar Namu O Tuhan rat bang lubang ineh.

⁵⁶ Kareb ui nemutuh Namu ninger sembayangku, idi Iko neninger.

⁵⁷ Iko nengua' putuhku, idi nemada' negku pad ui na matot.

⁵⁸ “Iko nengedengan negku O Tuhan, idi nengulun negku.

⁵⁹ Mutut kuanku dengan méi'; Iko kali' sala'deh negku.

⁶⁰ Iko kali' gateh bunu'ku negku, idi gayamdeh luk sikal ngaté negku.

⁶¹ “O Tuhan, Iko neninger nedeh ngedat negku idi kali' gayamdeh.

⁶² Tebaco kedangan ideh pegayam ngedat negku.

⁶³ Rat pekak macing malem ideh situnga negku.

⁶⁴ “O Tuhan, ngukum nedeh idi ngua' kekamendeh.

⁶⁵ Ngediman nedeh pad ideh na tuman ku dat niatdeh.

⁶⁶ Ngusu nedeh rat bang tana' ini!”