TIDO YEREMIA 2 - BALA LUK DO'

Tuhan Ngukum Yerusalim

¹ Nekini Tuhan pangeh nemapen Sion ku dacem ngaceku usehNeh. Kareb aco usehNeh, Ieh nenecan ruma'Neh pana'.

² Dengan na méi' Tuhan nengusag amung bawang Yahuda, idi Ieh nengusag libung batu luk ku matar bawang. Ieh nengigu' imet ineh idi lun luk ngimet pana'.

³ Ieh nengelaya' Israil dengan usehNeh. Ieh na nengedengan neneh kareb bunu' nacing. Ieh museh ni Yakub mepad kudeng apui luk ngeseb.

⁴ Ieh nengelatik ilebNeh mepad kudeng bunu'. Dengan tuehNeh Ieh nengaté amung lemulun luk do' taga. Ieh nengacing apui usehNeh bang ruma'deh pana'.

⁵ Mepad kudeng aceh bunu', Tuhan nengusag Israil, dengan amung libung batu idi ruma' raca' pana'. Ieh nengacing susa' luk na miak ugka' kuan lun Yahuda.

⁶ Ieh nengareg Ruma'Neh luk inandeh tebubpun. Ieh nengagka' aco rayeh idi Aco luk inan Mudeng. Raca' idi imam pana' kali' tueh usehNeh.

⁷ Tuhan nenecan bubpunNeh idi Ruma'Neh luk meligan. Ieh nenima' bunu' ngusag aladneh. Ideh nengitang bang Ruma' Allah mepad kudeng kareb aco rayeh.

⁸ Tuhan nengeletep usag libung Sion; Ieh nenari libung ineh, pad ngeletep usagneh. Pudutneh luk medita' idi libungneh pad-pad netabpa.

⁹ Tanga'neh nepapen ku usagneh, idi palin-palindeh neputul. Raca' idi lun rayehdeh pangeh tiban. Ukum Musa na badén, idi na luk siren nabi-nabi ratnan Allah.

¹⁰ Lun mengered rat Yerusalim tudo idi ungeng; idi nacung dengan abuh luun uluhdeh. Anak adi' decur munel idi nier i tana'.

¹¹ Matehku mebara' ku tangi'; idi ui pelaba susa' niat. Ui medereh ku susa' niatku, ngaceku usag pupuku. Anak-anak dari idi luk niti' pana' melepu luun dalan.

¹² Kebaladeh nan tinandeh, “Iapehké nuba'?” Ideh mebpeh luun dalan, mepad kudeng lun nurat, idi maté bang abin tinandeh.

¹³ O Yerusalim luk inanku mawa, anunké luk belénku? Kudeng apehké ui ngubuk namu? Na luk medereh kudeng iko. Susa'mu meluun rayeh ratnan abpa' rayeh; idi na iko miak uen ngubat.

¹⁴ Amung nabimu mebalih mo'. Bada'deh nenaluk namu idi na nengegala' sala'mu. Ideh nengeraruh namu pad iko na miak uren.

¹⁵ Lemulun luk maya' dalan lemaba bawang, situnga idi mepag palad. Ideh siguling idi meriruh ku usag Yerusalim. “Iniké bawang luk pelaba do' taga?” Ideh meriruh. “Iniké luk ku awang amung tana' ini?”

¹⁶ Amung bunu'mu situnga namu idi nutong namu dengan gateh niatdeh. Ideh ngeraceng, kebaladeh, “Kai nengusag ineh! Ini aco luk inan kai nginulat!”

¹⁷ Tuhan pangeh nenganau' luk litepNeh atun. Ieh nengusag namu dengan na méi', mepad kudeng luk bilaNeh atun. Ieh nemaré tueh kuan bunu'mu, pelé ideh mawang niat ku ebpehmu.

¹⁸ O Yerusalem, do' libungmu ngitang kuan Tuhan. Nima' abpa' matehmu manud tebaco kedangan. Do' iko merur kidi-kidi ku tangi' idi dat niat!

¹⁹ Do' megéi' kulat medacem idi ngitang pa kiung Allah. Ngegala' amung-amung luk bang niatmu kuan Allah, idi mutuh éi' kuan anak-anakmu, luk maté ku lau déi' lisangen dalan!

²⁰ O Tuhan, nier nelun luk uenMu ngedereh! Decur kuman butung anak luk inandeh mawa! Imam idi nabi pana' pitayen bang Ruma' Allah!

²¹ Butung anak adi' idi lun mengered telubid luun dalan, anak adi' luk deléi idi decur luk pinaté bunu'. Dengan na méi' Iko nengaté nedeh, kareb aco usehMu.

²² Iko nenawar bunu'ku nganau' aco rayeh luk ngatot negku. Idi aco sineh seburur pana' nateh luk mepuit ratnan usehMu. Ideh nengaté anak luk isa'ku idi luk inanku mawa.