TIDO YEREMIA 1 - BALA LUK DO'

Susa' Yerusalim

¹ Nekini Yerusalim pelaba dat ali, ieh ineh bawang luk pelaba ula' lemulun atun! Atun ieh buren, iamo' nekini ieh mepad kudeng decur tinula'. Bawang luk meluun do' atun mangun ku demulun.

² Ieh nangi' kedangan-kedangan, pad abpa' matehneh mebpeh. Seburur pana' nateh luk ngubuk neneh, rat arang lemulun luk mawa neneh atun. Rurumneh pangeh nemasui neneh, idi nekini ideh mangun ku bunu'neh.

³ Pupu Yahuda pangeh tiban mangun ku demulun. Ideh tudo bang bawang baken, idi na ruma'deh sebuleng. Ideh linibut bunu' pad ideh na miak buro.

⁴ Seburur pana' nateh luk amé' Ruma' Allah, pad sembayang kareb aco rayeh. Anak adi' decur medereh, idi imam-imam ngarod mo'. Na lemulun déi' munung tanga' bawang, idi Sion ineh pelaba dereh.

⁵ Bunu'neh mangun ku lun rayehneh, idi ieh bang imetdeh. Tuhan nenganau' neneh medereh, ngaceku sala'neh luk mula'; idi anak-anak pana' pangeh tiban.

⁶ Ubur Yerusalim pangeh nabud. Lun luk nguyut neneh mepad kudeng payo luk buro kareb lun nganup. Na uduh kenendeh idi ideh melaya'.

⁷ Yerusalim ngerawé uburneh luk mon, kareb nateh ieh inusag. Kareb ieh nebpeh bang palad bunu'neh na luk ngedengan neneh. Lun luk nengelaya' neneh meriruh ku ebpehneh.

⁸ Sala' Yerusalim pelaba rayeh, pad ieh tila' mepad kudeng kibung luk melutak. Lemulun luk nengubur neneh atun ngedat neneh; ideh nenier neneh lubpa. Idi ieh ngarod idi sigapung ku igu'neh.

⁹ Lutakneh petatem nan takipneh, iamo' na ieh nengerawé kekipedneh. Ebpehneh pelaba dat, pad ieh na miak buken. Bunu'neh metueh idi ieh mutuh éi' ratnan Tuhan.

¹⁰ Bunu' ineh nemano amung binawehneh. Ieh nekali' nedeh semuet bang Ruma' Allah, luk bibpeng Tuhan na miak suaten lun luk na manu.

¹¹ Pupuneh ngarod kareb nakap akan. Ideh ngelibal binawehdeh ku akan, pad ideh miak mulun. “Nier negku, Tuhan,” kebala Yerusalim, “Nier derehku”.

¹² “Nier negku!” kebala Yerusalim kuan lemulun luk lemaba. “Na lun mét kudeng ui, Et ineh pangeh icing Tuhan kareb Ieh museh negku.

¹³ “Ieh nengacing apui rat déi' dita' luk ngeseb bang bururku. Ieh netumen abpung kuanku, pad ui mebpeh. Ieh nenecan negku, idi ui mét tebaco-tebaco.

¹⁴ “Idi Ieh nengiap sala'ku idi nengangel amung ineh; Ieh nengekito ineh nan dierku, pad ui melaya' ku beratneh. Tuhan nemaré negku kuan bunu'ku, idi ui na miak metueh rat nedeh.

¹⁵ “Tuhan meriruh ku bawehku luk meluun tueh. Ieh nengecuk aceh baweh ngerieng negku, idi nengaté anak adi'ku luk deléi. Ieh nengareg pupuku luk meluun do', mepad kudeng bua' anggur luk ridu'.

¹⁶ “Ineh punneh abpa' matehku mebpeh. Idi ui na miak buken idi mawang niat. Bunu' ineh metueh rat nekai; idi pupuku pelaba susa' niat.

¹⁷ “Ui nengegenang ticu'ku, iamo' na lun ngedengan negku. Tuhan nengecuk bunu'ku ngelibut negku. Ui mepad kudeng kibung luk melutak arangdeh.

¹⁸ “Iamo' Tuhan ineh mesiri, ngaceku ui nengelaba balaNeh. Ninger balaku, O amung pupu, idi nier derehku. Anak adi'ku luk delei idi decur pangeh tiban.

¹⁹ “Ui nenawar rurumku, iamo' ideh na pian ngedengan negku. Amung imam idi lun rayeh pana' naté luun dalan. Kareb ideh nenakap akan.

²⁰ “O Tuhan, nier derehku idi susa' niatku! Niatku nginuud ku sala'ku. Inan até luun dalan, idi bang ruma' pana' inan teh até.

²¹ “Ninger arodku; na lemulun ngubuk negku. Bunu'ku mawang niat ku susa' luk icingMu negku. Ngacing aco luk pijani'Mu, nganau' bunu'ku medereh mepad kudeng ui.

²² “Ngukum nedeh ngaceku datdeh. Mepad kudeng Iko nengukum negku ngaceku sala'ku. Ui ngarod ku derehku, idi teh ui mesusa' niat.”