SURAT RUT 4 - BALA LUK DO'

Boas Ngaweh Ni Rut

¹ Idi Boas iné' su luk inan pegayam munung tanga' bawang ineh, idi netudo ieneh. Idi pupu Elimalek luk muneng luk pangeh bila Boas ineh nelemba. Idi Boas nenawar, “Tungé' iko, tudo ieni.” Idi ieh iné' ku tawarneh.

² Idi Boas nenawar pulu' burur lun rayeh bawang ineh, kebalaneh, “Tudo ieni.” Idi ideh netudo.

³ Idi kebala Boas inan pupu Elimalek luk muneng ineh, “Nekini Naomi pangeh nelemubed rat Moab. Idi ieh pian masui tana' Elimalek luk pupu tau.

⁴ Idi nekini ui mada' ineh namu. Idi kudeng iko pian ku tana' ineh do' iko melih ineh nekini pa kiung amung lun luk tudo ieni idi pa kiung lun rayeh tau. Iamo' kudeng iko na pian ku ineh maré kali' kuanku, ngaceku setuneh iko luk petulu inan mada' ineh atun. Kudeng iko na pian ku ini, ui luk petulu miak ngalap ineh teh.” Idi lun ineh nengor balaneh, “Ui pian melih tana' ineh.”

⁵ Idi kebala Boas, “Kudeng iko melih tana' ineh rat ni Naomi, idi i Rut lun Moab luk tinula' ineh mangun ku awanmu, pad tana' ineh lutep kuan inul Elimalek.”

⁶ Idi lun ineh nengor balaneh, “Kudeng ineh peh lawéneh ruenmu, na ui pian melih tana' ineh peh, ngaceku na ui pian ngurang babaptku sebuleng. Do' iko melih tana' ineh ku libalku. Ngaceku na ui pian.”

⁷ Kudeng ini adat lun Israil kareb ideh melih tana' idi ngelibal teh: Lun luk masui ngelengu kasutneh, idi maré ineh kuan lun luk melih. Kudeng ini dalan lun Israil mutut ratnan lawé masui tana'.

⁸ Ngaceku ineh kareb lun ineh nepebala ni Boas, “Do' iko melih ineh, “Idi ieh nengelengu kasutneh, idi nemaré ineh ni Boas.

⁹ Idi kebala Boas inan amung lun rayeh idi lun mula' ineh, “Idi bang aco sini amung muyuh mangun ku lun luk nekali' ratnan ui pangeh nengalap rat ni Naomi amung-amung luk Elimalek kuan, idi amung luk Kilion idi Malun kuan.

¹⁰ Idi teh Rut lun Moab, ieh ineh awan Malun teh miak mangun ku awanku, pad amung binaweh ineh lutep kuan lun luk naté ineh, pad ngadanneh tetanen meruked arang pupuneh, idi bang bawangneh. Idi aco sini amung muyuh mangun ku lun nekali'.”

¹¹ Idi kebala lun mula', “Amung kai mangun ku lun nekali'.” Idi kebala amungdeh luk lun rayeh, “Idi do' Tuhan nganau' decur ini luk amé' bang ruma'mu, mepad kudeng Rakel idi kudeng Lia luk pangeh nenginul nelun Israil. Merapet namu mangun ku lun do' bang bawang Eprata, idi mebala bang bawang Baitlahim.

¹² Do' anak luk barén Tuhan namu ratnan decur ineh mepad kudeng inul Paris luk anak Yahuda didueh Tamar.”

Boas Idi Inulneh

¹³ Idi Boas pana' nengalap ni Rut ku awanneh idi pamung neneh. Idi Tuhan teh nengedengan neneh pad ieh mali' idi nenganak aceh anak deléi.

¹⁴ Idi kareb ineh amung lun decur nepebala ni Naomi, “Ngubur Tuhan! Ieh pangeh nemaré aceh mupun kuanmu aco sini, luk miak ngasa' namu. Merapet anak ini mebala bang bawang Israil.

¹⁵ Idi do' ieh ngawang niatmu idi ngasa' namu macing mengered. Ibanmu luk nenganak neneh luk méi' namu, meluun do' ratnan tudu' burur anak deléi.”

¹⁶ Idi Naomi nengalap anak ineh idi nengabin neneh idi nengasa' neneh.

¹⁷ Idi amung decur luk bang bawang ineh nenganau' ngadan anak ineh Obed, kebaladeh, “Anak ini tinganak kuan Naomi.” Idi ieh mangun ku taman Isai luk taman Daud.

Tepun Raca' Daud

^18-22 Idi ini inul Paris macing Daud: Paris, Esron, Aram, Aminadab, Nasun, salmun, Boas, Obed, Isai, Daud.