SURAT RUT 3 - BALA LUK DO'

Boas Méi' Ni Rut

¹ Idi kebala Naomi ni Rut, “O iban, do' ui nakap aceh deléi kuanmu, pad iko inan ruma'.

² Idi kudeng apeh i Boas luk pupu tau, luk kuan lati' luk piranih muyuh? Malem ini ieh rumik ikunneh.

³ Ngaceku ineh do' iko diu', idi ngumau ku umau luk do' buen, idi ngayung ku ayung luk mebaruh, idi amé' su luk inanneh rumik ineh. Iamo' aleg iko silagan sirenneh, pad ieh pangeh akan.

⁴ Idi kareb ieh amé' telubid, do' nier su inanneh idi iko amé' ngukab tarub pa kukudneh idi telubid. Idi ieh miak mada' namu luk miak ruenmu.”

⁵ Idi Rut nengor balaneh, “Amung balamu ui miak maya'.”

⁶ Idi Rut iné' su luk inan Boas rumik. Idi ieh nemaya' amung luk icuk ibanneh.

⁷ Idi pangeh Boas kuman idi ngirup, idi ieh mawang niat. Idi ieh iné' telubid iring aceh bubpun ikun. Idi Rut iné' saak-saak. Idi ieh nengukab tarubneh pa kukud. Idi ieh netelubid.

⁸ Idi kareb tangal dacem idi Boas nekulat, idi ieh netebiring selipa. Idi ieh negagap nenier aceh decur telubid iring kukudneh!

⁹ Idi ieh nengitun neneh, “Idé' iko ni?” Ui ini Rut, ieh ineh lun dukenmu. Ngaceku iko pupu luk muneng negku idi luk miak ngedengan negku, do' iko ngalap negku ku awanmu.”

¹⁰ Idi Boas nengor balaneh, “O Amu, do' Tuhan ngeperuan namu. Do'mu luk nekini meluun rayeh ratnan luk atun. Na iko mili' anak adi', do' luk mula' binaweh, idi luk masi'.

¹¹ Idi nekini, O Amu, aleg iko matot. Idi ui miak nganau' anun-anun luk pianmu, ngaceku amung lun luk bang bawang ini kali' iko aceh decur luk do'.

¹² Idi matu teh ui pupu luk muneng, idi miak ngedengan namu. Iamo' inan teh luk meluun muneng rat negku.

¹³ Do' rudap ieni dacem ini. Idi pekak nebpa, kiteh miak ngitun neneh kudeng ieh pian ngalap namu. Kudeng ieh pian ngalap namu do' tieh, kudeng na ieh sikal ngalap namu, ui pebulung ku ngadan Allah luk mulun, ui miak ngalap namu. Nekini do' iko rudap.”

¹⁴ Idi Rut nerudap iring kukudneh macing macang. Idi ieh nekulat kareb acang dat-dat. Ngaceku kebala Boas, “Aleg nima' lun baken kali' namu iné' tungé'.”

¹⁵ Idi kebala Boas neneh, “Nguit kibung luk ku pakaimu ineh amé' tungé' idi malad ineh.” Idi Rut nenganau' kudeng ineh. Idi Boas nengutang lélé ualuh gatang ikun luun ineh. Idi ieh nengiding neneh kuanneh. Idi Rut nuli',

¹⁶ Idi kareb ieh nacing inan ibanneh, idi keburi' Naomi neneh, “Kudeng apeh lawému, Amu?” Idi Rut nemada' amung-amung luk inau' Boas kuanneh.

¹⁷ Idi teh kebalaneh, “Amung ikun ini biréneh negku teh. Ngaceku kebalaneh negku, ‘Iko na miak muli' dengan na anun-anun.’ ”

¹⁸ Idi kebala Naomi, “O Amu, do' mulai niat, pad iko kali' anun luk miak mangun. Ngaceku Boas na miak ugka', pad ieh mangeh ratnan lawé ini aco sini.”