SURAT RUT 2 - BALA LUK DO'

Rut Bang Lati' Boas

¹ Idi Elimalek luk awan Naomi inan aceh pupu lun do', ngadanneh Boas.

² Idi kebala Rut ni Naomi, “Do' ui amé' lati' idi ngamung ikun luk tacin idi luk mebpeh pa puet idé luk méi' negku.” Idi Naomi nengor balaneh, “Amé' mo' iko.”

³ Idi Rut iné' lati'. Idi ieh nengamung ikun luk tican idi luk nebpeh pa puet lun luk ngeranih ineh. Idi ieh nepetulu nan lati' Boas luk pupu Elimalek.

⁴ Idi Boas nacing rat Baitlahim. Idi kebalaneh kuan lun luk ngeranih ineh, “Do' Tuhan ngedengan nemuyuh.” Idi ideh nengor balaneh, “Do' Tuhan ngeperuan namu.”

⁵ Idi Boas nengitun lun dukenneh luk rayeh, “Idé luk kuan anak adi' decur ineh?”

⁶ Idi lun rayeh ineh nengor balaneh, “Ineh anak decur sakai luk nemaya' ni Naomi rat bawang Moab.

⁷ Idi ieh nemutuh negku, kebalaneh, ‘Nima' negku ngamung ikun luk racin idi mebpeh pa puet lun luk ngeranih.’ Idi ieh iné' ngeranih ineh rat pekak macing malem. Idi ina ieh nucu' segageh bang lepo.”

⁸ Idi kebala Boas ni Rut, “Ninger bala kini, Amu'. Aleg iko amé' ngeranih lati' dulun. Iamo' do' iko lutep ngeranih dengan lun dukenku luk decur.

⁹ Do' nier su apeh inandeh ngeranih, idi iko amé' maya' nedeh. Ngaceku ui pangeh nemaré kali' nelun dukenku ratnan lawému, pelé ideh na nguto namu. Idi kareb iko meparing do' amé ngirup abpa' bang ruadeh.”

¹⁰ Idi Rut netekeradung pa kiungneh. Idi keburi'neh ni Boas, “Ngudeh iko méi' negku, ngaceku ui ini lun sakai.”

¹¹ Idi Boas nengor balaneh, “Ui pangeh nekali' ratnan amung-amung luk inau'mu kuan ibanmu rat pangeh até awanmu. Ui kali' lawému nenecan taman idi tinanmu idi bawangmu pana', idi iné' tudo arang pupu luk na inanmu pek, lai atun.

¹² Do' Tuhan ngua' ratnan luk inau'mu. Do' Tuhan Allah lun Israil luk nematar namu iang iladNeh, ngua' kuanmu dengan petap.”

¹³ Idi kebala Rut, “Pelaba do'mu negku. Iko pangeh nengubuk negku dengan bala luk do', sagan pana' ui na mepad kudeng lun dukenmu.”

¹⁴ Idi kareb ideh kuman idi Boas nenawar neneh, “Amé' tungé' ngalap ruti ini, idi ngerereb ineh bang abpa' luk malam ni.” Idi Rut netudo dengan lun luk ngeranih. Idi Boas nemaré aceh ikun luk kiriki neneh, idi Rut nekuman macing mebor. Inan teh tecehneh.

¹⁵ Idi kareb Rut nenalan iné' ngeranih, idi Boas nepebala nelun dukenneh, “Nima' neneh ngeranih idi ngalap sebuang ratnan luk inangel muyuh, idi aleg muyuh ngedat neneh.

¹⁶ Iamo' do' muyuh necan sesuut ratnan luk inangel muyuh lapenneh. Idi aleg muyuh mebpeng neneh.”

¹⁷ Idi Rut nengeranih pad macing malem. Idi ieh netupeh luk piranihneh ineh, amungneh lélé apat gatang.

¹⁸ Idi ieh nemabeh ineh dengan teceh luk kinanneh déi' lati' nuli' amé' ruma'. Idi kareb ieh nacing ruma' idi ieh nemada' ikun ineh siren ibanneh, idi ieh nemaré teceh luk kinanneh déi' lati' kuanneh.

¹⁹ Idi kebala ibanneh, “Nengeranih iapeh iko aco sini? Do' Allah ngeperuan lemulun luk méi' namu.” Idi ieh nemada' ngadan lemulun luk inanneh ngeranih, ieh ineh Boas.

²⁰ Idi kebala Naomi inan ibanneh, “Do' Tuhan luk lutep maya' jani'Neh kuan lun luk mulun idi lun luk naté, ngeperuan neneh.” Idi teh kebala Naomi neneh, “Lun ineh pupu tau luk muneng. Idi miak ieh ngedengan netau.”

²¹ Idi keburi' Rut, “Idi teh kebalaneh negku, ‘Do' iko pebaya' nelun dukenku teh pad mabud lati'ku periniendeh.’ ”

²² Idi kebala Naomi ni Rut, “Mo, iban, do' iko pebaya' dengan lun duken i Boas, pad iko na uen lun ngedat luun lati' dulun.”

²³ Idi Rut nengeranih dengan lun luk duken i Boas, pad macing mabud lati'neh. Idi ieh tudo dengan ibanneh kidi-kidi.