SURAT RUT 1 - BALA LUK DO'

Elimalek Dengan Awan Idi Anakneh Amé Déi' Bawang Moab

¹ Idi kareb bawang Israil bang imet lun luk nguyut, idi inan aceh iru' bang bawang ineh. Idi ngaceku ineh inan aceh deléi rat Baitlahim luk bang tana' Yahuda, idi ieh iné' tudo déi bawang Moab, dengan awanneh idi dueh anakneh luk deléi.

² Idi ngadan deléi ineh Elimalek, idi ngadan awanneh Naomi. Idi ngadan anak didueh luk dueh ineh Malun idi Kilion. Ideh lun Eprata rat Baitlahim luk bang tana' Yahuda. Idi ideh iné' bawang Moab idi ideh netebawang déi'.

³ Idi Elimalek naté. Idi Naomi dengan anakneh luk dueh ineh ketecan.

⁴ Idi didueh nengalap decur lun Moab ku awan didueh. Ngadan sebuleng Orpa. Idi ngadan sebuleng Rut. Idi ideh tudo déi' pulu' lak kinioneh.

⁵ Idi Malun didueh Kilion naté. Idi Naomi ketecan sebuleng dengan na anak idi awan.

Naomi Idi Rut Lemubed Amé' Baitlahim

⁶ Idi Naomi gugkang dengan dueh ibanneh ineh pian lemubed amé' bawang Baitlahim, ngaceku ieh neninger Tuhan pangeh nengedengan pupuneh idi nemaré petap akan kuandeh.

⁷ Idi diteluh nenalan pian muli' amé' tana' Yahuda.

⁸ Kareb ideh arang dalan Naomi nekidi inan ibanneh, “Do' medueh muli' amé' tudo dengan tinan medueh. Idi Tuhan ngedengan nemedueh, mepad kudeng medueh pangeh nengedengan negku idi nedidueh luk naté ineh.

⁹ Merapet Tuhan maré awan nemedueh, pad medueh inan ruma'.’ ” Idi Naomi nepetabi' nedidueh. Idi didueh pelaba tangi'.

¹⁰ Idi kebala didueh neneh, “Ara' kai dueh lemubed. Iamo' kai dueh pian amé' maya' namu amé' inan pupumu'.”

¹¹ Iamo' kebala Naomi, “Lemubed mo' medueh iban. Ngudeh medueh pian amé' maya' negku? Na anakku luk ngalap nemedueh peh.

¹² Lemubed mo' medueh. Ngaceku ui mengered idi na lun pian ngalap negku peh. Idi kudeng ui merapet miak lapen lun, idi kudeng ui lapen lun malem ini pana', idi ui inan anak teh,

¹³ miak medueh nganet nedidueh rayeh? Miak medueh tuman na lapen lun baken? Kali' rungen medueh na tuman. Tuhan pangeh nenecan negku, idi ui pelaba méi' nemedueh.”

¹⁴ Idi didueh pelaba tangi'. Idi Orpa nepetabi' inan ibanneh, idi nelemubed iné' inan pupuneh. Iamo' Rut ara' patad rat neneh.

¹⁵ Idi kebala Naomi inan ibanneh Rut, “Siruh, seruaimu pangeh nuli' iné' matun pupuneh idi akangneh. Do' iko pana' muli' maya' seruaimu.”

¹⁶ Iamo' kebala Rut, “Aleg ngesaad negku necan namu idi mebpeng negku na amé' maya' namu. Ngaceku iapeh-iapeh suetmu, ui maya' namu. Idi iapeh-iapeh inanmu tudo, ieneh teh inanku tudo. Idi pupumu, ineh teh pupuku. Idi Allahmu, ineh teh Allahku.

¹⁷ Iapeh-iapeh inanmu maté, su ineh teh inanku maté, idi su ineh teh inan nanem negku. Do' ukum Tuhan macing luunku kudeng ui necan namu. Iamo' até' mo' luk ngatad negku rat namu!”

¹⁸ Kareb Naomi nekali' ni Rut mesaad amé' maya' neneh, idi ieh nugka' pebala neneh.

¹⁹ Idi didueh nenalan pad macing déi' Baitlahim. Kareb didueh nacing bawang Baitlahim amung lun bang bawang ineh negagap. Kebala dawa' decur, “Ini Naomiké?”

²⁰ Idi kebala Naomi nedeh, “Aleg neten negku Naomi. Ilung Naomi ineh ‘mawang niat.’ Iamo' do' neten negku Mara ngaceku ilung Mara ‘mesusa’ niat.’ Idi Allah luk Melalud ineh pangeh nengedereh negku tu-tu.

²¹ Kareb kai nenalan rat ieni kai mula'. Iamo' Tuhan nenguit negku lemubed dengan na anun-anun. Ngudeh muyuh neten negku ‘Mawang Niat’, ngaceku Tuhan luk Melalud pangeh nengukum negku idi nengedereh negku.”

²² Idi kudeng ini lawéneh Naomi nuli' rat Moab dengan i Rut, luk ibanneh, ieh ineh lun Moab. Idi didueh nacing Baitlahim kareb pun ngeranih ikun.