SEPANIA 3 - BALA LUK DO'

Kudeng Apeh Tuhan Nguli' Yerusalim Ratnan Sala'neh

¹ Na miak na Yerusalim kumin, ieh ineh bawang luk dat ineh luk sikal metueh idi luk ngedereh pupuneh sebuleng.

² Na ieh neninger bala Tuhan idi na ieh nengalap bada'Neh. Na ieh merapet inan Tuhan, idi na ieh nemutuh pedengan rat Neneh.

³ Amung lun rayeh mepad kudeng balang luk melau; lun luk mutut besara' mepad kudeng bungalé luk pelaba anga pad ideh na necan sebuleng tulang pana' macing pekak.

⁴ Lun nabi na inan merapet. Ideh megéi' naluk. Idi lun imam ngelutak luk pangeh linigan. Ideh ngisu' Ukum Allah maya' piandeh sebuleng.

⁵ Iamo' Tuhan idi bang bawang ineh. Ieh nganau' luk matu, idi na tu-tu nganau' luk tekilu'. Anid-anid pekak Ieh ngegala' siriNeh kuan pupuNeh ineh. Iamo' lemulun luk na matu megéi' nganau' luk dat, idi na ideh migu'.

⁶ Kebala Tuhan, “Ui nengaté tuda'-tuda' pupu, idi nengusag bawangdeh, pad libung idi pudut luk medita' pana' inusag. Amung dalandeh dat ali idi seburur lemulun pana' nateh luk mulun su ineh.

⁷ Pangeh ineh Ui nengerawé pupuKu ineh sikal matot Negku, idi ngalap bada'Ku. Ui nengerawé nedeh na mekelupan luk bida'Ku nedeh. Iamo' na mio teh ideh mepad dat kudeng luk atun.”

⁸ Idi kebala Tuhan, “Nganét Negku! Nganét aco luk inanKu tuped ngadu' amung pupu. Ui pian ngamung amung pupu idi imet, pelé ideh kali' tueh usehKu. Amung tana' miak uen ngusag ku apui usehKu.

⁹ “Kareb ineh Ui miak ngisu' bala amung pupu mangun ku aceh bala luk meligan, pelé ideh nawar ngadan Tuhan idi maya' Neneh dengan sebuleng niat.

¹⁰ Rat bawang Sudan luk mado pana', pupuKu luk pitad ineh miak nguit barédeh kuanKu.

¹¹ O pupuKu, kareb ineh na muyuh migu' teh ngaceku muyuh pian metueh rat Negku atun. Ngaceku Ui miak nala' amung lemulun luk medita' niat, pelé muyuh na sikal metueh rat Negku teh, luun pegkungKu luk meligan déi' Yerusalim.

¹² Pupu luk tacinKu su ineh mebeneh niat. Idi ideh miak amé' Negku idi mutuh pedengan.

¹³ Lun israil luk mulun kareb ineh na ngedat nelun baken, idi na mebalih, idi na naluk pana'. Ideh miak do' udeng, idi na luk katot.”

Nani Mawang Niat

¹⁴ O lun Israil, do' muyuh menani idi ngitang mawang niat! O Yerusalim, do' iko mepanu' ku awang niat!

¹⁵ Tuhan pangeh nengusu bunu'mu. Ieh nenala' amung lemulun luk sikal metueh rat namu. Tuhan, Raca' lun Israil idi denganmu. Nekini na luk inan matot.

¹⁶ Karebneh miak macing idi ideh miak pebala kuan Yerusalim, “O bawang Sion, aleg matot! Aleg nima' ticu'mu melaya'!”

¹⁷ Tuhan Allahmu idi denganmu, laludNeh ngetueh namu. Tuhan miak mawang niat namu, dengan awaNeh Ieh maré ulun luk mebaruh namu. Ieh miak menani idi mawang niat namu,

¹⁸ idi awang niatNeh mepad kudeng awang niat lemulun kareb irau. Kebala Tuhan, “Ui pangeh nengagka' bala ratnan ukummu, idi pangeh nenala' igu'mu.

¹⁹ Karebneh malé macing! Ui miak ngukum lemulun luk ngedereh namu; Ui miak ngedo' lemulun luk mekio', idi nguit nelun luk tiban muli'. Ui miak ngisu' igu'deh mangun ku ubur, idi amung tana' ini miak ngubur nedeh.

²⁰ Karebneh malé macing! Ui miak nguit pupu muyuh luk pitad muli', pad muyuh buren idi mebala aput tana', kareb Ui nuneb nemuyuh su siren muyuh.” Tuhan pangeh nepebala.