SEPANIA 1 - BALA LUK DO'

¹ Ini bala luk biré Tuhan ni Sepania, kareb Raca' Yosia anak Amon ngimet Yahuda. (Idi Sepania ineh inul Raca' Hesekia. Hesekia nenginul Amaria. Amaria nenginul Gedalia. Gedalia nenginul Kusi. Idi Kusi nenginul Sepania.)

Aco Luk Inan Tuhan Ngukum

² Kebala Tuhan, “Ui miak nala' amung-amung luk luun tana',

³ ieh ineh amung-amung lemulun, pung, suit idi lawid pana'. Ui miak ngacing ebpeh amung-amung luk dat. Ui miak ngaté lemulun, pad seburur pana' nateh luk ketecan luun tana' ineh. Ui ini Tuhan pangeh nepebala.

⁴ “Ui miak necat nelun Yahuda idi Yerusalim. Ui miak ngusag amung luk ketecan ratnan sembayang Baal su ineh, idi nala' ngadan idi terawé ratnan amung imam luk sembayang inan Baal, do' imam luk sembayang inan Baal mo', idi imamKu sebuleng pana'.

⁵ Ui miak ngaté lemulun luk sembayang luun apo ruma' inan aco, bulan, idi gituen. Ui miak ngaté lemulun luk sembayang Negku idi pebulung pa kiungKu, idi luk pebulung dengan ngadan akang Milkom pana'.

⁶ Ui miak ngaté lemulun luk teketed rat Negku idi na maya' Negku teh, ieh ineh lemulun luk na amé' Negku, idi luk na mutuh pedengan.”

⁷ Aco Tuhan ineh malé macing. Do' pirud pa kiungNeh. Tuhan temina' ngaté pupuNeh mepad kudeng aceh baré luk kereten.

⁸ Kebala Tuhan, “Kareb aco ngeret baré ineh, Ui miak ngukum amung pengulu idi anak raca', idi amung lemulun luk maya' adat pupu baken.

⁹ Ui miak ngukum amung lemulun luk sembayang mepad kudeng lun pupu baken, luk mano idi ngaté, idi luk manu' ruma' akangdeh ku binaweh luk pinodeh.”

¹⁰ Kebala Tuhan, “Bang aco sineh muyuh miak ninger arod lemulun luk munung Tanga' Lawid déi' Yerusalim. Muyuh miak ninger tido lemulun bang babpat bawang luk mebaruh, idi aceh uni luk rayeh luun surud.

¹¹ Do' temido idi nangi' kareb muyuh ninger uni ini, O muyuh luk tudo bang babpat bawang luk pa beneh, ngaceku amung lun luk pepua' pangeh naté!

¹² “Kareb ineh Ui miak ngalap aceh lapung idi ngilu' Yerusalim do'-do'. Ui miak ngukum lemulun luk metalang niat, idi luk lutep maya' piandeh sebuleng, luk pebala bang niatdeh, ‘Allah na nganau' anun-anun, luk do' idi luk dat pana'.’

¹³ Binawehdeh miak tebanen, idi ruma'deh uen ngusag. Na ideh miak tudo bang ruma' luk pidutendeh, idi na ideh miak ngirup abpa' anggur ratna kabun luk uendeh nibu.”

¹⁴ Aco rayeh Tuhan malé macing! Bang aco sineh lun pebunu' luk meluun sangit pana' miak ngarod ku dat niatdeh.

¹⁵ Ieh ineh aco useh, aco susa' idi dat niat, aco usag idi até, aco dacem idi meseraber, aco laput idi barui.

¹⁶ Ieh ineh aco uni serupit bunu' idi arod lun pebunu' luk ngerieng bawang luk linibung idi pudut luk medita'.

¹⁷ Kebala Tuhan, “Ui ngacing susa' luk pelaba rayeh kuan lemulun, pad ideh ngakap-ngakap mepad kudeng lun luk mebuser. Ideh pangeh nenganau' sala' pa kiungKu, idi nekini dara'deh uen ngutang mepad kudeng abpa' idi butungdeh miak melu luun tana'.”

¹⁸ Amung pirak idi amasdeh na miak ngulun nedeh, kareb aco luk inan Tuhan ngegala' usehNeh. Amung tana' miak uen ngusag ku apui usehNeh. Ieh miak ngaté amung-amung lemulun luk tudo bang tana'.