SEKARIA 9 - BALA LUK DO'

Ukum Kuan Pupu Baken Luk Libut Yerusalim

¹ Ini bala Tuhan: Ieh pangeh nemutut ukum kuan tana' Hadrak idi bawang Damsik. Baken amung pupu Israil mo', iamo' bawang rayeh déi' Siria pana' Tuhan kuan.

² Hamat luk iring Hadrak, Tuhan kuan. Kudeng ineh teh bawang Sur idi Sidon, dengan maung ilehdeh.

³ Sur pangeh nemudut libung luk meraben libut bawangneh, idi pangeh nengamung pirak idi amas mepad kinula' bada!

⁴ Iamo' Tuhan miak ngalap amung-amung binawehneh. Ieh miak nala' binawehneh ineh bang abpa' rayeh, idi bawang ineh pana' miak sabpen pad na luk ketecan su ineh.

⁵ Idi bawang Askelon miak nier amung ineh, pad ieh matot. Bawang Gasa pana' miak kali' dereh. Kudeng ineh teh Ekron—luk inanneh merapet na miak mangun. Raca' Gasa miak pitayen, idi bawang Askelon miak tacin.

⁶ Puar-puar pupu miak tudo déi' Asdod. Idi kebala Tuhan, “Ui miak ngebeneh amung lun Pilistin luk medita' niat ini.

⁷ Ideh na miak kuman uang dengan dara', idi akan baken luk bibpeng. Amung-amung lemulun luk ketecan miak mangun ku aceh babpat pupuKu, mepad kudeng aceh inul ratnan pupu Yahuda. Ekron pana' miak mangun ku aceh babpat pupuKu, mepad kudeng lun Yebusi.

⁸ Ui miak matar tana'Ku idi mebpeng baweh pad ideh na miak lemaba ineh. Ui miak mebpeng amung raca' luk rayeh, pad ideh na miak ngedereh pupuKu sekua' teh. Ui pangeh nekali' dereh pupuKu ineh.”

Raca' Luk Miak Macing Muci

⁹ O lun Sion, do' muyuh mawang niat! O lun Yerusalim, do' ngitang mawang niat! Siruh, raca' muyuh amé' nemuyuh! Ieh luk meluun tueh, iamo' mebeneh niat, idi nalan maya' anak keladai.

¹⁰ Kebala Tuhan, “Ui miak ngusag keréta bunu' lun Israil idi ngusu amung kuda rat Yerusalim; idi busu luk pikai bang bunu' miak uen mutul. Raca' muyuh miak nguit amung pupu pedo'. Ieh miak ngimet rat abpa' rayeh selipa macing selipa, idi rat abpa' Pirat macing iring tana'.”

Pupu Allah Uen Nuneb

¹¹ Kebala Tuhan, “Ngaceku jani'Ku namu, luk itu ku dara' baré, Ui miak muit pupumu luk tiban ineh rat bang lubang luk na abpa'.

¹² Lemubed, O muyuh lun luk tiban luk inan rapet; amé inan bawang muyuh luk na susa'. Ui mada' nemuyuh nekini, Ui miak ngua' kuan muyuh dueh kua'. Peruan miak ngelibal dereh muyuh.

¹³ Ui miak makai Yahuda mepad kudeng binor lun pebunu', idi Israil mepad kudeng ilebneh. Ui miak makai nelun Sion mepad kudeng pelapet, pad ideh munu' nelun Grika.”

¹⁴ Tuhan miak silagan pa luun pupuNeh; Ieh mak ngelatik ilebNeh, mepad kudeng kilep. Tuhan Allah miak ngiup serupit; Ieh miak nalan maya' barui rat pa kabing busat aco.

¹⁵ Tuhan luk Melalud miak matar pupuNeh, pad ideh miak ngaté bunu'deh. Bang bunu' ideh miak ngitang mepad kudeng lun mabuk; ideh miak ngeruat dara' bunu'deh, pad dara' ineh manud mepad kudeng dara' baré, luk inutang luun bubpun rat bang bigan.

¹⁶ Idi kareb aco sineh Tuhan miak ngulun pupuNeh, mepad kudeng lun luk matar dumba muit sengeriudan dumbaneh ratnan bunu'. Ideh merasat bang bawangNeh mepad kudeng batu luk mesilo luun pata.

¹⁷ Pelaba do' bawang ineh! Anak adi' miak temubu' ngaceku padé idi abpa' anggurneh.