SEKARIA 5 - BALA LUK DO'

Luk Sinier Ratnan Aceh Surat Luk Temulud

¹ Idi teh ui nenier aceh surat luk temulud.

² Idi melaikat ineh nengitun negku ratnan luk sinierku. Idi kebalaku neneh, “Ui nier aceh surat luk temulud, luk kikadang limeh depeh, idi pipangneh dueh depeh setangal.”

³ Idi kebalaneh negku, “Bang surat ini pangeh inayud ratnan kediman luk miak remuat aput-aput tana'. Baladneh selipa ngegala' ratnan amung lun luk mano miak talan ratnan tana' ini. Idi baladneh selipa teh ngegala' ratnan amung-amung lemulun luk mebalih kareb pebulung miak talan teh.

⁴ Tuhan luk Melalud pebala idi Ieh miak ngeruat kediman ineh, luk miak semuet bang ruma' anid-anid burur lun luk mano idi ruma' lemulun luk mebalih kareb pebulung. Idi kediman ineh miak tudo' bang ruma'deh pad kayuh idi batu ruma'-ruma' ineh uen ngusag.”

Luk Sinier Ratnan Decur Luk Bang Buan

⁵ Idi melaikat ineh nesilagan sekua' teh, kebalaneh, “Nier luk miak macing nekini!”

⁶ “Anun ineh?” kebalaku. Idi kebalaneh, “Ieh ineh aceh buan, idi ieh mangun ku pinginud sala' luk aput tana' ini!”

⁷ Idi kakeb buan ineh inau' ratnan semara'. Kareb ui nenier, kakeb luk inau' ratnan semara' ineh inukab, idi bang ineh inan seburur decur!

⁸ Idi kebala amelaikat ineh, “Decur ini, ieh ineh pinginud sala'!” Idi ieh nengeranek neneh bang buan ineh teh idi nengakeb neneh.

⁹ Idi ui netengook idi nekali' dueh burur decur luk inan ilad mepad kudeng suit rot luk temulud amé' matun negku. Idi teh ideh nenguit buan ineh amé' déi' dita'.

¹⁰ Idi kebalaku kuan melaikat ineh, “Iten didueh amé' iapeh buan ineh?”

¹¹ Idi kebalaneh, “Ideh pian mudut aceh ruma' sembayang kuanneh déi' Babil. Kareb ieh pangeh pinudut, buan ineh miak uen ngerareng bang ruma' ineh pad ieh inan sembayang.”