SEKARIA 4 - BALA LUK DO'

Luk Sinier Ratnan Kukud Dawan

¹ Melaikat luk pangeh nepebala negku iné' negku sekua' teh, idi nengalat negku, ayu-ayuneh ui rudap.

² Idi ieh nengitun negku, kebalaneh, “Anunké luk sirenmu?” Idi kebalaku, “Aceh kukud dawan luk ratnan amas. Idi pa luun inan aceh bigan luk inan umau, idi tudu' lapung.

³ Idi anid-anid lapung ineh inan tudu' su luk inan iring kukud dawan ineh.”

⁴ Idi ui nemutuh melaikat ineh mada' ilungneh.

⁵ Idi kebalaneh, “Naké iko kali'?” Idi ui nengor balaneh, “Na!”

Jani' Allah Kuan Serubabel

⁶ ‘Melaikat ineh nengecuk negku maré ni Serubabel bala ini luk ratnan Tuhan: “Baken ratnan lalud baweh, idi baken ratnan tuehmu sebuleng, iamo' ratnan RohKu, ieh ineh miak mangun.

⁷ Idéké iko, O pegkung luk rayeh? Do' iko mangun ku raked pa kiung Serubabel. Iko miak mudut Ruma' Allah baruh idi kareb iko ngerareng batuneh luk kekiped, lun mula' miak ngitang, ‘Do' Allah luk mekatu ngeperuan ruma' ini!’ ”

⁸ Inan teh aceh bala Tuhan negku.

⁹ KebalaNeh, “Serubabel nengimun mudut Ruma' Allah, idi ieh miak mangeh neneh. Idi kareb amung ini mangun, pupuKu miak kali' idi Ui luk nengecuk namu amé' nedeh.

¹⁰ Ideh mesusa' niat ngaceku sesuut mo' luk inau'deh. Iamo' ideh miak mawang niat kareb ideh nier ni Serubabel luk nguit nedeh mudut Ruma' Allah ineh.” Kebala melaikat negku, “Tudu' lapung ineh, ieh ineh tudu' mateh Tuhan luk nier aput-aput tana'.”

Ilung Luk Sinier Ratnan Kukud Dawan Linio

¹¹ Idi kebalaku neneh, “Anunké ilung dueh kayuh saitun luk pekop iring kukud dawan ineh?

¹² Idi anunké ilung dueh angat saitun luk iring dueh turuk luk ratnan amas luk mangun ku dalan umau saitun?”

¹³ Idi kebalaneh negku, “Na kali'mu?” Kebalaku, “Na!”

¹⁴ Idi kebala melaikat ineh, “Ieh ineh dueh burur lemulun luk pinili' idi inumau Allah luk tuped pa kiung Tuhan luk ngimet aput tana'.”