SEKARIA 2 - BALA LUK DO'

Luk Sinier Ratnan Luk Pinari

¹ Bang aceh luk sinier teh, idi ui nekali' seburur lemulun luk ngimet aceh luk pinari.

² Kebalaku, “Amé' iapeh iko?” Idi kebalaneh, “Ui pian nari Yerusalim pad ui kali kikadangneh idi kirayehneh.”

³ Idi ui nenier melaikat ineh nukang, idi seburur melaikat luk baken iné' papu' neneh.

⁴ Idi kebala melaikat luk pun-pun ineh inan melaikat luk baken, “Do' upun amé' mada' anak adi' luk ngimet luk pinari ineh, kebalamu, ‘Aleg nganau' alad bawang Yerusalim, ngaceku mula' lemulun idi sapi' pana' miak macing bang bawang neh.

⁵ Tuhan pangeh nepejani', idi Ieh sebuleng miak mangun ku alad apui libut-libut bawang ineh, pad Ieh ngelibung neneh, idi tudo su ineh dengan amung uburNeh.’ ”

Lun Luk Tiban Titeng muli'

^6-7 Idi kebala Tuhan kuan pupuNeh, “Ui nematad nemuyuh amé' iapeh-iapeh. Iamo' nekini, do' muyuh lun luk tiban buro rat bawang Babil idi muli' amé' Yerusalim.

⁸ Idé-idé luk necat nemuyuh, ieh ineh luk necat luk meluun raga kuanKu.” Idi Tuhan luk Melalud nengecuk negku nated bala ini kuan pupu baken luk nengaro bawang pupuNeh, kebalaNeh.

⁹ “Tuhan sebuleng luk ngua' nemuyuh, idi lemulun luk mangun ku demulun muyuh atun miak ngaro bawang muyuh.” Kareb ini mangun megala' ratnan Tuhan luk Melalud luk nengecuk negku.

¹⁰ Kebala Tuhan, “O lun Yerusalim do' menani mawang niat. Ngaceku Ui amé' tudo arang muyuh!”

¹¹ Idi bang kareb ineh mula' pupu miak amé' inan Tuhan idi mangun ku pupuNeh. Ieh miak tudo arang muyuh, idi muyuh miak kali' Tuhan luk nengecuk negku amé' nemuyuh.

¹² Sekua' teh Yahuda miak mangun ku babpat Tuhan luk inanNeh mawa bang bawang luk meligan, idi Yerusalim miak mangun ku bawang luk inanNeh meluun awa.

¹³ Pirud muyuh pa kiung Tuhan. Ieh macing netau ratnan su luk inanNeh mudeng luk meligan.