SEKARIA 14 - BALA LUK DO'

Yerusalim Idi Amung-Amung Pupu

¹ Aco luk inan Tuhan nganau' amung ineh miak macing. Idi bawang Yerusalim miak uen ngaro, idi binaweh luk ilap miak uen mabpat su siren muyuh.

² Tuhan miak ngamung amung-amung pupu pad ideh munu' Yerusalim. Bawang rayeh ineh miak lapen, ruma'-ruma' miak uen ngaro, idi decur-decur miak inan pasét. Sebuang lemulun miak tebanen, iamo' lemulun luk ketecan na uen ngusu rat bang bawang rayeh ineh.

³ Idi Tuhan miak amé' munu' amung pupu ineh, maya' kudeng luk inau'Neh rat mon.

⁴ Kareb ineh Ieh miak tuped luun Pegkung Saitun, luk pa busat aco Yerusalim. Idi Pegkung Saitun ineh miak mekupa rat pa busat aco macing pa acep aco, pad inan aceh raked luk rayeh. Setangal pegkung ineh miak mubuh amé' pa tinueh busat aco, idi setangal miak mubuh amé' pa kabing busat aco.

⁵ Muyuh miak buro maya' raked ineh, luk macing bal déi' pegkung ineh. Muyuh miak buro mepad kudeng luk inau' tepun muyuh kareb tana' meruyuh, kareb imet Usia, raca' Yahuda. Tuhan Allahku miak macing dengan amung melaiaktNeh.

⁶ Kareb ineh na melau' idi meteneb.

⁷ Idi na medacem teh. Idi kareb malem pana' macang kidi-kidi. Tuhan mo' luk kali' kareb amung ini miak mangun.

⁸ Bang aco sineh, abpa' ulun miak manud rat Yerusalim, idi sebuang miak macing nan Abpa' luk Mepaci' idi sebuang nan Abpa' Rayeh. Idi abpa' ineh miak manud ruked lak.

⁹ Idi Tuhan miak mangun ku raca' aput-aput tana'. Idi kareb ineh Tuhan sebuleng mo', idi ngadanNeh sebuleng mo'.

¹⁰ Idi tana' luk libut-libut Yerusalim miak uen ngeraked rat Giba luk pa tinueh busat aco macing inan Rimon luk pa kabing busat aco, Yerusalim miak uen ngedita' meluun ratnan tana' luk libut-libutneh, ieh ineh rat Tanga' Beniamin macing nan Tanga' Lidung, su luk inan aceh tanga' atun, idi rat Pudut luk Medita' luk titen Hananel macing su luk inan raca' ngeradu' bua' anggur.

¹¹ Idi lun mula' miak do' udeng su ineh. Idi na inan susa'.

¹² Tuhan miak ngacing aceh ét luk pelaba bura' kuan amung pupu luk munu' Yerusalim. Uangdeh miak melu kareb ideh tuped pana'. Ideh teh matehdeh idi dila'deh miak melu.

¹³ Kareb ineh Tuhan miak nganau' nedeh pelaba gagau idi matot, pad anid-anid burur miak ngakem lemulun luk iringneh idi munu' neneh.

¹⁴ Lun Yahuda miak munu', pad ideh matar Yerusalim. Ideh miak ngaro binaweh maung-amung pupu—ieh ineh amas, pirak, idi kibung luk mula' pana'.

¹⁵ Idi teh aceh ét luk pelaba bura' miak macing luun kuda, idi aya' luk seupa kuda idi seupa keladai, unta idi keladai pana', ieh ineh amung aya' baweh bunu' ineh.

¹⁶ Kareb bunu' ineh pangeh linaya', idi amung-amungdeh luk neketecan miak amé' Yerusalim anid lak, pad sembayang inan Raca', ieh ineh Tuhan luk Melalud, idi pad ngerayeh Irau Lepo.

¹⁷ Kudeng aceh pupu ara' amé' sembayang inan Raca', ieh ineh Tuhan luk Melalud, idi udan na mebpeh luun tana'deh.

¹⁸ Kudeng lun Masir ara' ngerayeh Irau Lepo, ideh miak mekaneh ét luk barén kuan anid pupu luk ara' amé'.

¹⁹ Ini ukum luk miak macing kuan Masir idi kuan amung pupu baken, kudeng na ideh ngerayeh Irau Lepo.

²⁰ Kareb ineh icung kuda miak uen ngarit dengan bala ini, “Linigan kuan Tuhan.” Idi lacang bang Ruma' Allah pana' mepad ligan kudeng ligan luk pa atun bubpun.

²¹ Anid-anid lacang luk déi' Yerusalim idi Yahuda miak uen ngeligan kuan Tuhan luk Melalud. Lemulun luk maré baré miak amé' ngalap lacang ineh, ku nanek uang pung luk barén kuan Tuhan. Idi kareb ineh na luk idi lemulun luk pepua' bang Ruma' Tuhan luk Melalud.