SEKARIA 10 - BALA LUK DO'

Jani Tuhan Ratnan Muit Nelun Israil

¹ Mutuh Tuhan maré udan bang kareb luk petulu. Tuhan luk maré laput mitem luk nguit udan, pad amung-amung lati' lun mebata'.

² Lemulun ngitun akang, iamo' ideh ngalap or luk mebalih idi mebacé. Lun luk ngelio nupi mebalih: idi ubukdeh na ulek. Idi lun mula' lawé-lawé mepad kudeng dumba luk neraruh. Ideh mesusa' ngaceku na lun luk nguyut nedeh.

³ Kebala Tuhan, “Ui museh nelun luk ngimet pupuKu, idi Ui pian ngukum nedeh. Pupu Yahuda Ui kuan, idi Ui ini Tuhan luk Melalud miak matar nedeh. Ideh miak mangun ku kuda bunu'Ku luk melalud.

⁴ Amung lun luk ngedereh, ieh ineh lun luk ngimet, lun luk nguyut, idi lun rayeh baweh, perigéi' buro rat bawang Yahuda.

⁵ Lun Yahuda miak metueh mepad kudeng lun pebunu' luk ngeradu' bunu'deh luun dalan luk meburi. Ideh miak pebunu' ngaceku Tuhan idi dengandeh. Idi ideh miak ngelaya' bunu' luk maya' kuda pana'.

⁶ “Ui miak ngetueh pupu lun Yahuda; Ui miak ngulun nelun pupu Israil. Ui miak méi' nedeh idi nguit amung-amungdeh muli'. Ayu-ayuneh Ui na tu-tu nenala' nedeh. Ui ini Tuhan Allahdeh luk miak ngua' sembayangdeh.

⁷ Kareb ineh lun Israil mepad kudeng lun pebunu' luk mawang niat ku abpa' anggur. Inuldeh miak ngerawé tuehdeh dengan mawang niat ngaceku luk inau' Tuhan.

⁸ “Ui miak nawar pupuKu idi ngamung nedeh, Ui miak ngulun nedeh, pad ideh amé' mula', mepad kudeng luk atun.

⁹ Sagan pana' Ui matad nedeh arang pupu baken, ideh miak ngerawé Negku bang bawang luk mado. Ideh miak mulun idi muli' dengan anakdeh pana'.

¹⁰ Ui miak nguit nedeh muli' rat Masir idi Asur, idi ngeletep nedeh bang bawangdeh sebuleng. Ideh miak tudo déi' Giliad idi Lebanon pana', pad aput tana' ineh mepanu' ku lemulun.

¹¹ Kareb ideh manud bang abpa' susa'deh, Ui ini Tuhan miak necat amung ribut, idi ribaruh Abpa' Nil miak mekeket. Asur miak uen ngebeneh, idi lalud Masir miak metutu'.

¹² Ui miak ngetueh pupuKu, pad ideh sembayang Negku idi maya' balaKu.” Tuhan pangeh nepebala.